18 ވަނަ އެސޯސިއޭޝަން ޗެމްޕިއަންޝިޕްގެ ސީނިއާ ކެޓަގަރީގެ އެންމެ މޮޅު ފެތުންތެރިންނަކީ އާން އާއި އަންޖަލް

ސްވިމިންގ އެސޯސިއޭޝަން އޮފް މޯލްޑިވްސް އިން އިންތިޒާމުކޮށްގެން ބޭއްވި، 18 ވަނަ ސްވިމިންގ އެސޯސިއޭޝަން ޗެމްޕިއަންޝިޕްގެ ސީނިއަރ ކެޓަގަރީގެ އެންމެ މޮޅު ފިރިހެން ފެތުންތެރިއަކަށް މުޙައްމަދު އާން ހުސައިން އަދި އެންމެ މޮޅު އަންހެން ފެތުންތެރިއަކަށް ފާތިމަތު އަންޖަލް ފަޔާޒް ހޮވިއްޖެއެވެ.

ސްވިމިންގ އެސޯސިއޭޝަން ޗެމްޕިއަންޝިޕްގެ މިއަހަރުގެ އެންމެ މޮޅު ފެތުންތެރިންނަށް ހޮވިފައިވަނީ ޖާއިޝް، ޒިވާ، އަލްމާން، ޒާޔާ، ޒާކިން، ތަޒްކިޔާ، އާން އަދި އަންޖަލް ހޮވިއްޖެއެވެ.

މި ފެތުންތެރިންގެ ތެރެއިން މޫސާ ޖާއިޝް ސަނާއުﷲ ޝަކީބް އެންމެ މޮޅު ފެތުންތެރިޔާގެ މަގާމު ހޯދީ އީއޭޑީ ކެޓަގަރީގެ ފިރިހެން ކުދިންގެ ބައިންނެވެ. މި ކެޓަގަރީގެ އަންހެން ކުދިންގެ ބައިން އެންމެ މޮޅު ފެތުންތެރިއަކަށް ހޮވިފައިވަނީ މަރިޔަމް ޒިވާ ޒާހިދެވެ.

ފިރިހެން ކުދިންގެ ޖޫނިއަރ އޭ ކެޓަގަރީން އެންމެ މޮޅު ފެތުންތެރިޔާގެ މަގާމު ހޯދީ މުޙައްމަދު އަލްމާން ޒޫމަލް ރަޝީދެވެ. މި ކެޓަގަރީގެ އެންމެ މޮޅު އަންހެން ފެތުންތެރިއަކަށް ހޮވިފައި ވަނީ އައިޝާ ޒާޔާ ހުސައިން އެވެ.

ޒާކިން އަޝްރަފް އެންމެ މޮޅު ފެތުންތެރިޔާގެ މަގާމު ހޯދީ ފިރިހެން ކުދިންގެ ޖޫނިއަރ ބީ ކެޓަގަރީންނެވެ. މި ކެޓަގަރީގެ އެންމެ މޮޅު އަންހެން ފެތުންތެރިއަކަށް ހޮވިފައި ވަނީ އަމްނާ ތަޒްކިޔާ މިރުޝާދެވެ.

ނޮވެމްބަރު 24 ން ފެށިގެން 28 ވަނަ ދުވަހުގެ ނިޔަލަށް ކުރިޔަށް ގެންދިޔަ މި މުބާރާތުގައި އެކި ކެޓަގަރީތަކުގައި 200 އަށްވުރެ ގިނަ ކުދިން ބައިވެރިވިއެވެ.

މި މުބާރާތުން ވަނަތަކަށްދިޔަ ފެތުންތެރިންނަށް މެޑެލް އަދި އިނާމު ދެއްވީ އެކަމަށްޓަކައި 29 ނޮވެމްބަރު 2025 ވަނަދުވަހު ހުޅުމާލެ ސްވިމިންގ ޕޫލްގައި ބޭއްވި ރަސްމިއްޔާތުގައެވެ. މި ރަސްމިއްޔާތު ޝަރަފުވެރިކޮށްދެއްވީ ކުޅިވަރާއި ހަށިހެޔޮކަމާއި ބެހޭ ވުޒާރާގެ ސްޓޭޓް މިނިސްޓްރަ އަބްދުއްރައްޒާގް އިބްރާހިމްއެވެ.

އެންމެ މޮޅު ފެތުންތެރިންގެ އިތުރުން ކޮންމެ ކެޓަގަރީއެއްގެ ދެވަނަ އަދި ތިންވަނައަށް އައި ފެތުންތރިންނަށްވެސް މި ރަސްމިއްޔާތުގައި ވަނީ ޓްރޮފީ އާއި މެޑެލް ހަވާލުކޮށްދެއްވާފައެވެ.