ވިއްސާރައާ ގުޅިގެން ސްރީލަންކާއިން ނުފުރި ލަސްވާ ފަރާތްތަކަށް ވިސާގެ ލުއިތަކެއް ދެނީ

ސްރީލަންކާއަށް މިވަގުތު ކުރިމަތިވެފައިވާ ކާރިސީ ޙާލަތުގައި ފްލައިޓްތައް ކެންސަލްވުމާއި ގުޅިގެން ނުފުރި ލަސްވާ ފަރާތްތަކުގެ ވިސާއަށް ލުއިތަކެއް ދިނުމަށް ސްރީލަންކާގެ ޑިޕާޓްމަންޓް އޮފް އިމިގްރޭޝަން އެންޑް އެމިގްރޭޝަނުން ނިންމައިފިއެވެ.

އެޤައުމުގައި ހުންނަ ދިވެހި އެމްބަސީން ވިދާޅުވީ، ސްރީލަންކާގައި މިވަގުތު ތިބި އެހެން ޤައުމުތަކުގެ ރައްޔިތުންނަށް މިޙާލަތުގައި ނުފުރި ލަސްވުމާއި ގުޅިގެން ވިސާ ހަމަވުމުގެ މައްސަލަތައް ކުރިމަތިވަމުންދާތީ ސްރީލަންކާގެ އިމިގްރޭޝަނުން އެކަމުގައި ލުއިގޮތްތަކެއް ހަމަޖައްސަވައިދެއްވާފައިވާ ކަމަށެވެ. އެގޮތުން މިމަހުގެ 28 ވަނަ ދުވަހު ފުރަން ހަމަޖެހިފައިވާ ފަރާތްތަކުގެ ތެރެއިން މޫސުން ގޯސްވެ، ފްލައިޓްތައް ކެންސަލް ކުރުމާއި ގުޅިގެން ނުފުރި ތިބި ފަރާތްތަކުގެ ވިސާގެ ފީއާއި، ވިސާ ހަމަވެ އިތުރަށް މަޑުކުރަންޖެހޭ މުއްދަތުގައި އަރާ ޖޫރިމަނާ ފީތައް މާފު ކުރުމަށް ސްރީލަންކާގެ އިމިގްރޭޝަނުން ނިންމާފައިވާ ކަމަށް އެމްބަސީން ވިދާޅުވެއެވެ.

ކުރު މުއްދަތަކަށް ދަތުރުކުރާ ފަތުރުވެރިންނާއި، ބިޒްނަސް ވިސާއާއި ރެސިޑެންސް ވިސާ ފުރިހަމަ ކުރުމަށް 7 ދުވަހުގެ މުހުލަތެއް ދިނުމަށްވެސް ސްރީލަންކާގެ އިމިގްރޭޝަނުން ވަނީ ނިންމަވާފައެވެ. އަދި މި ޚިދުމަތްތައް ސްރީލަންކާގެ އިމިގްރޭޝަންގެ ވެބްސައިޓު މެދުވެރިކޮށް ލިބޭނެ އިންތިޒާމް ވަނީ ހަމަޖައްސަވާފައެވެ.

Visa Facilitation Measures for Foreign Nationals Affected by Adverse Weather Conditions:-

For urgent assistance, please contact:
High Commission Hotline: +94 76 881 6666
Email: [email protected] pic.twitter.com/APVspRrzGd

— Maldives in SriLanka (@MDVinSriLanka) November 29, 2025

ސްރީލަންކާއަށް މިހާރު ކުރަމުންދާ ވިއްސާރައިގައި އެޤައުމުގައި ވަނީ، ކުއްލި ޙާލަތު ޢިއުލާންކޮށްފައެވެ. އެޤައުމަށް ކުރަމުންދާ ވިއްސާރައަކީ، ތޫފާން ދީތުވާއާއި ގުޅިގެން ކުރާ ވިއްސާރައެކެވެ. ތޫފާން މިހާރު ސްރީލަންކާއާއި ދުރަށް ދަތުރު ކުރަމުން ދިޔަ ނަމަވެސް، ވިއްސާރައިގައި އެޤައުމަށް މިހާރު ވަނީ ފެންބޮޑުވުމާއި ބިންގަނޑު ކަނޑައިގެން ދިޔުން ފަދަ ނުރައްކާތެރި ހާލަތެއް ކުރިމަތިވެފައެވެ. މިހާރު ކުރަމުންދާ ވިއްސާރައިގައި މިހާތަނަށް 100 އަށްވުރެ ގިނަ މީހުން މަރުވެފައިވާ ކަމަށް ރިޕޯޓުކޮށްފައިވެއެވެ. ބައިނަލްއަޤުވާމީ މުޖުތަމަޢުން ސްރީލަންކާއަށް އެހީވުމުގެ މަސައްކަތް ފަށާފައިވާއިރު، ރާއްޖެއިންވެސް ވަނީ އެހީތެރިކަން ފޯރުކޮށްދިނުމަށް ނިންމާފައެވެ.