ޑިސެމްބަރު މަހުގެ 1-23 އަށް ބާއްވާ އެފްއޭއެމް ވިމެންސް ލީގު 2025 ގެ ފުރަތަމަ މެޗުގައި އޮޑި ސްޕޯޓްސް ކުލަބާއި ދެކޮޅަށް ނުކުންނާނީ ވަރަށް ވަރުގަދައަށް ތައްޔާރުވެގެން ކަމަށް ނިއު ރޭޑިއަންޓް ސްޕޯޓްސް ކުލަބުގެ ކުޅުންތެރިން ބުނެފިއެވެ.
ނިއުރޭޑިއަންޓަށް ކުޅެމުން އަންނަ ރާއްޖޭގެ ގައުމީ އަންހެން ފުޓްބޯޅަ ޓީމުގެ ކެޕްޓަން ހައްވާ ހަނީފާ ބުނީ ނިއުގެ އަމާޒަކީ މިއަހަރު ލީގު ތަށި އުފުލާލުން ކަމަށެވެ.
ކުޅުންތެރިންގެ ފަރާތުން ޕީއެސްއެމް ނިއުސްއާއި ވާހަކަ ދައްކަމުން ހަނީފާބުނީ ފަރިތަކުރުންތަކުގައި ހުރިހާ ކުޅުންތެރިންވެސް ވަރަށް ގަޔާވެގެން ރަނގަޅު މޮޓިވޭޝަނާއެކު ޓީމެއް ގޮތަށް ވަރަށް ރަނގަޅަށް ތައްޔާރުވަމުން އަންނަކަމަށެވެ.
ގައުމީ ޓީމުގެ ތަޖުރިބާއާއި ބިދޭސީ ކުޅުންތެރިންގެ ތަޖުރިބާއާއި ހިމެނޭހެން ނިއުރޭޑިއަންޓުގެ އަންހެން ޓީމުން ފަރިތަކުރުންތައް ކުރިޔަށްދަނީ ގިނަ އަދަދެއްގެ އައު ކުދިންވެސް ހިމަނައިގެންނެވެ.
ހަނީފާ ބުނީ އައު ކުޅުންތެރިން މިއަހަރު ނިއުރޭޑިއަންޓުން ފެންނާނެ ކަމަށާއި ހުރިހާ ކުޅުންތެރިން ވެސް މަސައްކަތް ކުރަނީ ތަށި ނެގުމަށް ކަމަށެވެ. އަދި ލީގުގައި ފުރަތަމަވެސް ނިކުންނަން ޖެހެނީ ވަރުގަދަ މެޗަކަށްކަން ފާހަގަކުރަމުން އޭނާ ބުނީ އެ މެޗަށް ވަރަށް ރަނގަޅަށް ތައްޔާރުވާނެ ކަމަށެވެ.
ނިއުރޭޑިންޓަށް ޗެމްޕިއަންކަން ހޯދޭނެ ކަމަށާއި، އެ އުންމީދު ވަރަށް ބޮޑުކަން ފާހަގަކުރަމުން ހަނީފާ ބުނީ ލީގަށް ނިކުންނާނީ ވެވުނު އެންމެ ރަނގަޅަކަށް ތައްޔާރުވެގެން ކަމަށެވެ.
ނިއުރޭޑިއަންޓުން ވަނީ 2014 ވަނަ އަހަރާއި 2015 ވަނަ އަހަރު އެފްއޭއެމުން ބޭއްވި ވިމެންސް ޗެމްޕިއަންޝިޕް ކާމިޔާބުކޮށްފައެވެ. ނިއުރޭޑިއަންޓުގެ ސްކޮޑުގައި ކުރީގެ މަޝްހޫރު ކުޅުންތެރިންގެ ތެރެއިން ފަދުވާ ޒާހިރާއި، ގައުމީ ޓީމުގެ ހަނީފާގެ އިތުރުން އަދިވެސް ތަޖުރިބާކާރު ގިނަ ކުޅުންތެރިން ހިމެނެއެވެ.
ނިއުގެ އުންމީދަކީ ފުރަތަމަ މެޗުގައި އޮޑި ސްޕޯޓްސް ކުލަބު ބަލިކޮށް ލީގުގެ ހުރިހާ މެޗެއް ކާމިޔާބުކޮށްގެން ފައިނަލާއި ހަމައަށް ދަތުރުކުރުމެވެ. އަދި ވާދަވެރި ޓީމުތައް ފަހަތަށް ޖައްސާލުމަށްފަހު ލީގު ތަށި އުފުލާލުމެވެ.
ރާއްޖޭގައި އަންހެން ފުޓްބޯޅަ ލީގު ނުފަށާތާ 10 އަހަރަށްފަހު އަލުން ފުޓްބޯޅަ ކަލަންޑަރުގައި ހިމަނާފައިވާއިރު މިއަހަރުން ފެށިގެން ދެން ކޮންމެ އަހަރެއްގެ ސީޒަން ކަލަންޑަރުވެސް އެކުލަވާލާނީ އަންހެން ލީގު ހިމަނައިގެންނެވެ.
އަންހެނުންގެ ފުޓްބޯޅަ މުބާރާތަށް އެހީވުމުގެ ގޮތުން "ފީފާ ފޯވަޑް ޕްރޮޖެކްޓް" ގެ ދަށުން އެހީތެރިވާނެ ކަމުގެ ޔަގީންކަން ފީފާއިން މިދިޔަ އޮކްޓޫބަރުގައި އެފްއޭއެމަށް ދީފައެވެ.