އަންހެން ފުޓްބޯޅަ މުބާރާތް ހުޅުވާ މެޗުގައި ވިކްޓްރީ އާއި ޓީސީ

10 އަހަރަށް ފަހު ފަށާ އެފްއޭއެމް ވިމަންސް ލީގު 2025 ހުޅުވާ މެޗުގައި ބައްދަލުކުރާނީ ވިކްޓްރީ ސްޕޯޓްސް ކުލަބާއި ޓީސީ ސްޕޯޓްސް ކުލަބު ކަމަށް ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ބުނެފިއެވެ.

އަންނަމަހުގެ 1 ވަނަ ދުވަހުން ފެށިގެން 23 ޑިސެންބަރުގެ ނިޔަލަށް ބާއްވާ އަންހެނުންގެ ފުޓްބޯޅަ މުބާރާތް ހުޅުވާ މެޗު އޮންނާނީ އެދުވަހު ހަވީރު ގަލޮޅު ދަނޑުގައެވެ. އެރޭ ދެވަނަ މެޗުގައި ބައްދަލުކުރާނީ ނިއުރޭޑިއަންޓް ސްޕޯޓްސް ކުލަބާއި އޮޑި ސްޕޯޓްސް ކުލަބެވެ.

ދެވަނަ ދުވަހު ބައްދަލުކުރާނީ ބިސްބުރު ސްޕޯޓްސް ކުލަބާއި މާޒިޔާ ސްޕޯޓްސް އެންޑް ރެކްރިއޭޝަން ކުލަބެވެ.

ޖުމްލަ 6 ޓީމު ބައިވެރިވެފައިވާ އެފްއޭއެމް އަންހެން ފުޓްބޯޅަ މުބާރާތް ކުރިޔަށްދާނީ ފީފާގެ ރިކޮމެންޑޭޝަނާއި އެއްގޮތަށް ލީގު އުސޫލުންނެވެ.

ލީގު ފޯމެޓަށް ކޮންމެ ޓީމެއް ކޮންމެ ޓީމަކާއި ކުޅޭ ގޮތަށް ހަމަޖެހިފައިވާ މި މުބާރާތުގެ ހުރިހާ މެޗެއްވެސް ކުޅޭނީ ގަލޮޅު ދަނޑުގައެވެ. މެޗެއްގައި 35 މިނިޓްގެ ދެ ހާފް ކުޅުމަށް ހަމަޖެހިފައިވާ އިރު ކޯޓު ސައިޒަކީ ފުލް ދަނޑެވެ.

ދެ މެޗު ދޭތެރެއިން ކޮންމެ ޓީމަކަށްވެސް އެންމެ މަދުވެގެން ދެ ދުވަހުގެ ބްރޭކެއް ލިބޭގޮތަށް އުސޫލު ކަނޑައަޅާފައިވާއިރު މިއަދު ވަނީ ޓީމުތަކުގެ މެދުގައި ގުރުއަތުލުން ބާއްވާފައެވެ.

ގަލޮޅު ދަނޑުގައި ބޭއްވި ގުރުނެގުމުގެ ރަސްމިއްޔާތުގައި ކުލަބުތައް ތަރުތީބުކޮށްފައިވާ ގޮތަށް ބަލާއިރު ޓީސީ ސްޕޯޓްސް ކުލަބު އޮތީ ގުރޫޕް އޭގައެވެ. ނިއުރޭޑިއަންޓް ސްޕޯޓްސް ކުލަބު އޮތީ ގުރޫޕް ބީގައެވެ. ބިސްބުރު ސްޕޯޓްސް ކުލަބު އޮތީ ގުރޫޕް ސީގައެވެ. މާޒިޔާ ސްޕޯޓްސް އެންޑް ރެކްރިއޭޝަން ކުލަބު އޮތީ ގުރޫޕް ޑީގައެވެ. އޮޑި ސްޕޯޓްސް ކުލަބު އޮތީ ގުރޫޕް އީގައެވެ. އަދި ވިކްޓްރީ ސްޕޯޓްސް ކުލަބު އޮތީ ގުރޫޕް އެފްގައެވެ.
.