ވިކްޓަރީ ބަލިކޮށް މާޒިޔާ ލީޑު ދަމަހައްޓައިފި

ދިވެހި ޕްރިމިއަރ ލީގުގައި ވިކްޓަރީ ސްޕޯޓްސް ކުލަބް ބަލިކޮށް މާޒިޔާ ސްޕޯޓްސް އެންޑް ރެކްރިއޭޝަނުން ތާވަލުގެ އެއްވަނައިގައި ލިބިފަ އޮތް ލީޑު ދަމަހައްޓައިފިއެވެ. އޭއެފްސީ އޭޝިޔަން ކަޕް ކޮލިފައިންގައި ފިލިޕީންސްއާ ދެކޮޅަށް ޤައުމީ ޓީމު ކުޅުނު މެޗަށް ލީގު މެދުކަނޑާލުމަށްފަހު ކުޅުނު މެޗު މާޒިޔާ ކާމިޔާބު ކުރީ 3-0 ލަނޑުންނެވެ.

ވިކްޓަރީ އަތުން ހޯދި މޮޅާއެކު މާޒިޔާ ވަނީ ލީގުގެ އެއްވަނައިގައި ހަތް ޕޮއިންޓުގެ ލީޑެއް ނަގައިފައެވެ. ދެ ވަނައިގައި އޮތް ނިއުރޭޑިއަންޓް ސްޕޯޓްސް ކްލަބަށް ހަތް މެޗުން 17 ޕޮއިންޓް ލިބިފައިވާއިރު، އެއް ވަނައިގައި އޮތް މާޒިޔާއަށް ވަނީ 8 މެޗުން ވެސް މޮޅުވެ، 24 ޕޮއިންޓް ލިބިފައެވެ.

ދެ ވަނައިގައި އޮތް ނިއުއިން މިރޭ ކުޅޭނީ ތިން ވަނައިގައި އޮތް އޮޑި ސްޕޯޓްސް ކްލަބާ ދެކޮޅަށެވެ. އޮޑިއަށް ވަނީ ހަތް މެޗުން 16 ޕޮއިންޓް ލިބިފައެވެ.

މާޒިޔާ މުޅި މެޗު ޑޮމިނޭޓް ކޮއްގެން ކުޅުނު މެޗުގައި ވިކްޓަރީއަށް މާގިނަ ހަމަލާއެއް ނުއުފެއްދުނު ނަމަވެސް އެޓީމުން ވަނީ މާޒިޔާ ކައިރީގަ ރަނގަޅު ކުޅުމެއް ދައްކައިފައެވެ.
މެޗުގެ ކުރީކޮޅު މާޒިޔާގެ ހަމްޒާ މުހައްމަދާއި އެޓީމުގެ ސްޕެއިންގެ ފޯވާޑް ސާޖިއޯ މެންޑީއަށް ވަނީ ލަނޑުޖަހަން ރަނގަޅު ފުރުސަތުކެއް ލިބިފައެވެ.

ވިކްޓަރީއަށް މެޗުގެ އެންމެ ރަނގަޅު ފުރުސަތެއް ލިބުނީ ޢަބްދުﷲ މިދުހަތު ފަހުމީ އަށެވެ. 15 ވަނަ މިނޓުގައި މާޒިޔާގެ ޕެނެލްޓީ އޭރިއާ ތެރެއިން ހުސްކޮށް ހުރެ ފޮނުވާލި ބޯޅަ ދިޔައީ ގޯލާ އަމާޒުނުވެ ބޭރަށެވެ.

މާޒިޔާ އިން މެޗުގައި ފުރަތަމަ ލަނޑު ޖެހީ 37 ވަނަ މިނިޓުގައި ހަމްޒާ ނަގައިދިން ކޯނަރަކުން މެންޑީ ބޮލުން ގޯލުތެރެއަށް ވައްދައިލައިގެންނެވެ. މިއީ މެންޑީ ލީގުގައި ޖެހި ނުވަވަނަ ލަނޑެވެ. މި ލަނޑަށް ފަހު މާޒިޔާގެ އަހުމަދު އައިހަމް ވަނީ ލަނޑު ޖަހަން ރަނގަޅު ދެ ފުރުސަތު ލިބިފައެވެ.

މެޗުގެ ދެވަނަ ހާފުގައި ސާޖިއޯ މެންޑީއަށް ވަނީ ގާތްގާތުގައި ލަނޑުޖަހަން ރަނގަޅު ފުރުސަތުތަކެއް ލިބިފައެވެ. މާޒިޔާގެ ފަހު ދެލަނޑު ފެނިގެން ދިޔައީ މެޗުގެ ފަހުކޮޅުގައެވެ. 84 ވަނަ މިނިޓުގައި އިއަހަމް އޭރިޔާ ތެރެއިން ލިބުނު ބޯޅައެއް ގޯލަށް ވައްދާލި އިރު މެޗުގެ އިތުރު ވަގުތު ތެރޭގައި މާޒިޔާއަށް ތިންވަނަ ލަނޑު ކާމިޔާބުކޮށްދިނީ ނާއިޒް ހަސަން ދިން ބޯޅައަކުން ހައިޝަމްއެވެ.

ލީގުގެ ފުރަތަމަ ބުރުގެ ފަހު މެޗުގައި މާޒިޔާ ނުކުންނާނީ ނިއުރޭޑިއަންޓާ ދެކޮޅަށެވެ.