ހއ. އިހަވަންދޫގެ ނަރުދަމާ ނިޒާމްގެ ޢަމަލީ މަސައްކަތް ރަސްމީގޮތުން އިފްތިތާޙްކުރައްވައިފިއެވެ.
އެކަމަށްޓަކައި ރޭ އިހަވަންދޫގައި ބޭއްވެވި ޚާއްޞަ ރަސްމިއްޔާތެއްގައި އެރަށުގެ ނަރުދަމާ ނިޒާމްގެ ޢަމަލީ މަސައްކަތް ރަސްމީގޮތުން އިފްތިތާޙްކޮށްދެއްވީ، އެންވަޔަރަމަންޓް މިނިސްޓަރ ޠާރިޤް އިބްރާހީމްއެވެ.
ހއ. އިހަވަންދޫ ނަރުދަމާ ނިޒާމްގެ ޢަމަލީ މަސައްކަތް ކުރުމަށް ޑިޒައިން އެންޑް ބިލްޑް އުސޫލުން ހަވާލުކުރައްވާފައި ވަނީ މާލޭ ވޯޓަރ އެންޑް ސްވަރޭޖް ކޮމްޕެނީ، އެމް.ޑަބްލިޔު.އެސް.ސީއާއެވެ. މި މަޝްރޫޢަށް ގާތްގަނޑަކަށް 66 މިލިއަން ރުފިޔާ ޙަރަދުވާނެކަމަށް އެންވަޔަރަމަންޓް މިނިސްޓްރީން ހާމަކުރައްވައެވެ.
img:http://s3.psmnews.mv/images/660x400/14722103233873.jpg|އިހަވަންދޫގެ ނަރުދަމާނިޒާމްގެ މަސައްކަތް ކުރިއަށްދަނީ- ފޮޓޯ: ރިޟްވާން، ޕީއެސްއެމް
މި މަޝްރޫޢުގެ ދަށުން އިހަވަންދޫގައި ނަރުދަމާ ހޮޅި އަޅާ، ޕަންޕް ސްޓޭޝަން ބެހެއްޓުމުގެ އިތުރުން، ސީ- އައުޓްފޯލް އެޅުމަށްވެސް ހަމަޖެހިފައިވެއެވެ. އިހަވަންދޫ ނަރުދަމާ ނިޒާމް ޑިޒައިން ކުރުމުގެ މަސައްކަތް ނިމި، މި މަޝްރޫޢަށް ބޭނުންވާ ސައިޓް މޮބިލައިޒް ކުރުމުގެ މަސައްކަތް މިއަހަރުގެ އޭޕްރިލް މަހުގެ ތެރޭ ވަނީ ކޮށްފައެވެ. އަދި މިހާރު ކުރިއަށްދަނީ ނަރުދަމާ ނިޒާމުގެ ހޮޅި ވަޅުލުމާއި، ޕަންޕް ސްޓޭޝަންތަކުގެ ކޮންކްރީޓް މަސައްކަތްތަކެވެ.
އިހަވަންދޫ ނަރުދަމާ ނިޒާމުގެ ޢަމަލީ މަސައްކަތް ރަސްމީކޮށް އިފްތިތާޙްކުރުމަށް ބޭއްވި ޖަލްސާގައި ވާހަކަފުޅު ދައްކަވަމުން އެންވަޔަރަމަންޓް މިނިސްޓަރ ޠާރިޤު އިބްރާހީމް ވިދާޅުވީ، މި މަޝްރޫޢަކީ މީގެ އެތަކެއް އަހަރު ކުރިއްސުރެއް އިހަވަންދޫ ރައްޔިތުން ދެކެމުންއައި ހުވަފެންތަކާއި ގުޅިފައިވާ ވަރަށްވެސް އުއްމީދީ މަޝްރޫޢެއްކަމަށެވެ. އަދި މިއީ ސީދާ ދަޢުލަތުގެ ބަޖެޓުން ޚަރަދުކުރައްވައިގެން ހިންގާ މަޝްރޫޢެއް ކަމަށާއި، ރައްޔިތުންނާއި ގުޅުންހުރި އަސާސީ މުހިއްމު ޙިދުމަތްތައް ފޯރުކޮށްދެއްވުމަށް ސަރުކާރުން އަބަދުވެސް ޙާއްސަ އިސްކަމެއް ދެއްވާނެކަން މިނިސްޓަރ ޠާރިޤު ފާހަގަކުރެއްވިއެވެ.
އެމް.ޑަބްލިޔު.އެސް.ސީގެ ފަރާތުން ވާހަކަދައްކަވަމުން އެކުންފުނީގެ މެނޭޖިންގ ޑިރެކްޓަރ އިބްރާހީމް ފަޒުލްރަޝީދު ވިދާޅުވީ، މި މަޝްރޫޢުގެ ދަށުން 16.71 ކިލޯމީޓަރރުގެ ދިގު ނަރުދަމާއެއް އެޅިގެންދާނެކަމަށާއި، 5 ޕަމްޕް ސްޓޭޝަން ޤާއިމުކުރުމަށް ހަމަޖެހިފައިވާކަމަށެވެ. އަދި މަޝްރޫޢު ނިންމުމަށް ސަރުކާރުން ކަނޑައަޅުއްވާފައިވާ މުއްދަތުގެ ތެރޭގައި މަސައްކަތް ވިހާވެސް ފުރިހަމަކޮށް ނިންމާލުމަށް އެކުންފުނިން މަސައްކަތްކުރައްވާނެކަމަށެވެ.
img:http://s2.psmnews.mv/images/660x400/14722103495157.jpg|އިހަވަންދޫގެ ނަރުދަމާނިޒާމްގެ މަސައްކަތް ކުރިއަށްދަނީ- ފޮޓޯ: ރިޟްވާން، ޕީއެސްއެމް
މި ރަސްމިއްޔާތުގައި ވާހަކަފުޅު ދައްކަވަމުން ރައްޔިތުންގެ މަޖިލީހުގެ އިހަވަންދޫ ދާއިރާގެ މެމްބަރު މުޙައްމަދު ޢަބްދުﷲ ވިދާޅުވީ، އަދުގެ ސަރުކާރަކީ ރައްޔިތުންގެ އަޑު އަހާ، ރައްޔިތުން އެންމެ ބޭނުންވެފައި ތިބި ކަންކަން ފުރިހަމަކޮށްދެއްވާ ސަރުކާރެއްކަން ރާއްޖޭގެ އެކި ކަންކޮޅުތަކުގައި މިވަގުތު ކުރިއަށްދާ ތަރަޢްޤީގެ ބިޔަ މަޝްރޫޢުތަކަށް ބަލާލުމުން ހާމަވާކަމަށެވެ. އަދި އިހަވަންދޫގެ ތަރައްޤީއަށް ބޭނުންވާ މުހިއްމުކަންކަން ސަރުކާރުގެ ތެރެއިން ކުރައްވާނެކަމަށް މެމްބަރު ވިދާޅުވިއެވެ.
ޕީއެސްމްއެމާއި ވާހަކަދެއްކި އިހަވަންދޫ ރައްޔިތުން ބުނިގޮތުގައި މިއީ އެރަށު ރައްޔިތުން ވަރަށް ކުރިންސުރެ ކުރަމުންއައި އިންތިޒާރެއްގެ ނިމުމެވެ. އަދި އުއްމީދަކީ ކައިރި މުސްތަޤްބަލެއްގައި ނަރުދަމާގެ މަސައްކަތް ނިމި މިޚިދުމަތް ލިބުންކަމަށް އެރަށު ރައްޔިތުންވަނީ ބުނެފައެވެ.
ގާތްގަނޑަކަށް 3000 އަށްވުރެ ބޮޑު އާބާދީއެއް ދިރިއުޅެމުން އަންނަ އިހަވަންދޫ ނަރުދަމާ ނިޒާމްގެ މަސައްކަތް އެމް.ޑަބްލިޔު.އެސް.ސީއާއި ހަވާލުކުރައްވާފައިވަނީ 31 ޖުލައި 2017ގެ ނިޔަލަށް މަސައްކަތް އެއްކޮށް ފުރިހަމަކުރާގޮތަށެވެ.