ފާއިތުވި ހަފްތާއަށް ބަލާލާއިރުވެސް ކުންފުނިތަކުން މަސްގެންފައިވާ މިންވަރު އިތުރުވެފައިވާކަން ފާހަގަކުރެވެއެވެ. ފާއިތުވެދިޔަ ހަފްތާގައި މަސްކިރާ ކުންފުނިތަކުން މަސް ކިރުވާފައިވާ މިންވަރަށް ބަލާލާއިރު، ކުންފުނިތަކުން ވަނީ އަތުނަނުން ބޭނި 134 ހާހަށްވުރެ ގިނަ ކިލޯގެ ރީނދޫ އުރަހަ ކަންނެލި ކިރުވާފައެވެ. އަދި ދޮށީގެ މަސްވެރިކަމުން ބާނާފައިވާ 287 ހާހަށްވުރެ ގިނަ ކިލޯގެ ކަޅުބިލަމަސް ކިރުވާފައިވާއިރު، 23 ހާހަށްވުރެގިނަ ކިލޯގެ ފާނަ ވަނީ ކިރުވާފައެވެ. އަދި ލޭނު މަސްވެރިކަން ކޮށްގެން ބާނާފައިވާ 10 ހާހަށްވުރެ ގިނަ ކިލޯގެ ލޯ ބޮޑުކަންނެއްޔާއި ހިބަރުވެސް މިދިޔަ ހަފްތާގައިވަނީ ކުންފުނިތަކުން ކިރުވާފައެވެ.
އެވްރެޖްކޮށް ކުންފުނިތަކުން މަސްގަންނަ އަގުތަކަށް ބަލާލާއިރު، ފިނިކުރި ކަޅުބިލަމަސް ކިލޯއެއް ގަންނަނީ، 19 ރުފިޔާއަށެވެ. އަދި ފިނި ނުކުރާ ކަޅުބިލަ މަހުގެ ކިލޯއެއް ގަންނަނީ، 17 ރުފިޔާއަށެވެ. އަދި ރީދޫ އުރަހަ ކަންނެލި ކިލޯއެއް ގަންނަނީ، 96 ރުފިޔާ ފަންސާސް ލާރިއަށެވެ.
img:http://s1.psmnews.mv/images/660x400/14645084426783.jpg|ގއ.ކޫއްޑޫ-
މިފްކޯއިން ބުނީ، މިދުވަސްކޮޅު މެދުރާއްޖެތެރޭގެ ސަރަޙައްދުގައި މަސްވެރިކަން ރަނގަޅުވުމާ ގުޅިގެން، މިފްކޯގެ މަސްގަންނަ ހުރިހާ ބޯޓްފަހަރު އެސަރަޙައްދުގައި ޙަރަކާތްތެރިވަމުން އަންނަކަމަށެވެ. ޚާއްޞަގޮތެއްގައި މ.އަތޮޅާއި ޅ.އަތޮޅުގައި މިދުވަސްވަރު މަސްވެރިކަން ރަނގަޅުވެ، އެވްރެޖްގޮތެއްގައި ދޯންޏަކުން ހަތަރު ޓަނާއި ހަޓަނާ ދެމެދުގެ ޢަދަދަކަށް މަސްކިރަމުން އަންނަކަމަށް މިފްކޯއިން ބުނެއެވެ. އަދި ކުރިއަށް އޮތް ދުވަސްތަކުގައި މިޢަދަދު އިތުރުވެގެންދާނެ ކަމަށް ލަފާކުރެވޭތީ އެ ސަރަޙައްދުން މަސްވެރިން ބާނާ މަސް ގަތުމަށް މިފްކޯގައި ބޭނުންކުރާ މަސްގަންނަ ހުރިހާ ބޯޓުފަހަރު މިހާރު ދަނީ އެސަރަޙައްދުގައި ޙަރަކާތްތެރިވަމުންނެވެ.
img:http://s2.psmnews.mv/images/660x400/7912.jpg|މަސްވެރިންތަކެއް މަސްބޭނުމުގައި / ފޮޓޯ: ފިޝަރީޒް މިނިސްޓްރީ
ކޫއްޑޫން ބުނީ ފާއިތުވި ތިންމަހަށް ބަލާއިރު، އެންމެ ގިނަ އަދަދަކަށް މަސްކިރުވާފައިވަނީ މިހިނގާ އޮގަސްޓްމަހުކަމަށެވެ. އެގޮތުން މިމަހުގެ މިހާތަނަށް ރާއްޖޭގެ އެކިސަރަޙައްދުތަކުން 547 ދޯނިން 912 ޓަނުގެ މަސް ކިރުވާފައިވާ ކަމަށް އެކުންފުނިން ބުނެއެވެ. އަދި ފާއިތުވި ދެމަހަށް ބަލާއިރު ޖޫންމަހު 315 ޓަނުގެ މަސް ކިރުވާފައިވާއިރު ޖުލައި މަހު ވަނީ 630 ޓަނުގެ މަސް ކިރުވާފައިވެއެވެ.
މިހިނގާ އޯގަސްޓް މަހު އެންމެ ގިނައަދަދަކަށް މަސްކިރުވާފައިވަނީ 20 ވަނަ ދުވަހުކަމަށާއި އެދުވަހު 103 ޓަނުގެ މަސްކިރުވާފައިވާކަމަށް އެކުންފުނިން ހާމަކުރެއެެވެ. މިދުވަސްވަރު މަސްވެރިކަން އެންމެރަނގަޅު ކަމަށް ފާހަގަކުރެވެނީ މުލަކަތޮޅު ސަރަޙައްދުގައި ކަމަށާއި އެގޮތުން މިމަހުގެ މިހާތަނަށް އެންމެ ގިނައިން މަސްކިރުވާފައިވަނީ އެއަތޮޅު މުލަކުންކަންވެސް އެކުންފުނިން ފާހަގަކުރެއެވެ.