ސިންގަޕޫރުގެ ކުރީގެ ރައީސް އަވަހާރަވުމާ ގުޅިގެން ރައީސުލްޖުމްހޫރިއްޔާ ޢަބްދު ﷲ ޔާމީން ޢަބްދުލްޤައްޔޫމް، ސިންގަޕޫރުގެ ބޮޑުވަޒީރު ލީ ސިއެން ލޫންގއަށް ތަޢުޒިޔާ ވިދާޅުވެއްޖެއެވެ.
ރައީސުލްޖުމްހޫރިއްޔާ ފޮނުއްވެވި މެސެޖުގައި، ސިންގަޕޫރުގެ ކުރީގެ ރައީސް އަވަހާރަވުމުގެ ޚަބަރު އެއްސެވީ ފުން ހިތާމައާއި އެކު ކަމުގައި ވިދާޅުވެފައިވެއެވެ. އަދި، ސިންގަޕޫރުގެ ކުރީގެ ރައީސް ސެލަޕަން ރަމަނަތަންއަކީ ސިންގަޕޫރުގައި އެންމެ ގިނަ ދުވަހު ވެރިކަން ކުރެއްވި ބޭފުޅާކަމަށާއި، އެމަނިކުފާނަކީ ސިންގާޕޫރުގެ ތަރައްޤީއަށް އަގުނުކުރެވޭ ގިނަގުނަ ޚިދުމަތްތަކެއް ކުރެއްވި ޤައުމީ ބަޠަލެއް ކަމުގައި ފާހަގަކުރައްވާފައިވެއެވެ. އަދި، އެމަނިކުފާނު އަވަހާރަވުމަކީ ސިންގަޕޫރަށް ލިބުނު ވަރަށް ބޮޑު ގެއްލުމެއްކަމަށާއި، ނަމަވެސް އެމަނިކުފާނުގެ އަގުހުރި މަސައްކަތްޕުޅުތަކުން ކުރިއައް އޮތް ޖީލުތަކުގެ ތަރައްޤީއަށް އިތުރަށް ހިތްވަރުލިބޭނެ ކަމުގައި ވެސް ރައީސުލްޖުމްހޫރިއްޔާ ފޮނުއްވި މެސެޖުގައި ވިދާޅުވެފައިވެއެވެ.
ރައީސުލްޖުމްހޫރިއްޔާ ފޮނުއްވި މެސެޖުގައި، ޤައުމީ ހިތާމައިގެ މިދަނޑިވަޅުގައި، ދިވެހި ސަރުކާރާއި ރައްޔިތުންނާއި އަދި ރައީސުލްޖުމްހޫރިއްޔާގެ އަމިއްލަ ނަންފުޅުގައި، ސިންގަޕޫރުގެ ސަރުކާރަށާއި، ރައްޔިތުންނަށާއި، އަދި ޙާއްޞަކޮށް ސިންގަޕޫރުގެ ކުރީގެ ރައީސްގެ ޢާއިލާއަށް ތަޢުޒިޔާ ފޮނުއްވާފައިވެއެވެ.