އަބުރު ރައްކާތެރިކޮށްދިނުމާއި ޚިޔާލުފާޅުކުރުމުގެ މިނިވަންކަމުގެ ޤާނޫނަކީ ދިވެހިރައްޔިތުންނަށް ލިބިގެންދިޔަ ވަރަށް ބޮޑު ހަދިޔާއެއްކަމަށް ސިފަކުރައްވައި، އެޤާނޫނަށް މަރުޙަބާކިޔުމަށް ދިވެހި ރައްޔިތުންނަށް ހޯމް މިނިސްޓަރ އަޒްލީން އަޙްމަދު ގޮވާލައްވައިފިއެވެ.
ހޯމް މިނިސްޓަރުކަމަށް ޢައްޔަންކުރެއްވުމަށްފަހު ފުރަތަމަފަހަރަށް ދެއްވި ބަސްދީގަތުމުގައި ޓީވީއެމްގެ ރާއްޖެ މިއަދު ޕްރޮގްރާމްގައި ރޭ ވާހަކަފުޅު ދައްކަވަމުން ހޯމް މިނިސްޓަރ އަޒްލީން އަޙްމަދު ވިދާޅުވީ، އަބުރު ރައްކާތެރިކޮށްދިނުމާއި ޚިޔާލުފާޅުކުރުމުގެ މިނިވަންކަމުގެ ޤާނޫނަކީ މިވަގުތު ރާއްޖެއަށް ކޮންމެހެންވެސް ބޭނުންވާ ޤާނޫނެއްކަމަށެވެ. އަދި މިއީ ޚިޔާލުފާޅުކުމުގެ މިނިވަންކަމަށް އެޅޭނެ ހުރަހެއް ނޫންކަމަށް މިނިސްޓަރ ވިދާޅުވިއެވެ. މި ޤާނޫނު ވުޖޫދަށް އައުމުގެ ކުރިން މީހުންގެ އަބުރު ނަގާލުން، ރާއްޖޭގައި އޮތީ ކަންބޮޑުވާ ހިސާބަށް ގޮސްފައިވާކަމަށާއި، މި ޤާނޫނުގެ ދަށުން އަބުރު ރައްކާތެރިކުރުމުގެ ޙައްޤު ކޮންމެ ރައްޔިތަކަށްވެސް ޤާނޫނީ ގޮތުން ލިބިގެންދާނެ ކަމަށް ވިދާޅުވިއެވެ. ޚިޔާލު ފާޅުކުރުމުގެ މިނިވަންކަމަކީ އަނެކާގެ ޙައްޤަށް އަރައިގަތުން ނޫންކަން ފާހަގަކުރައްވައި މިނިސްޓަރ ވިދާޅުވީ، މި ޤާނޫނުގެ ދަށުން ތެދެއް ހާމަކޮށްގެން އެއްވެސް އަދަބެއް ނުލިބޭނެކަމަށެވެ. ތެދު ބުނެގެން ޖޫރިމަނާއަކާ ހަމައަށްވެސް އަދި ޖިނާޢީ ކުށެއްގެ ޙުކުމާ ހިސާބަށްވެސް ދާން ނުޖެހޭންކަމުގެ ޔަޤީންކަން ރައްޔިތުންނަށް މިނިސްޓަރ ދެއްވިއެވެ.
"މި ބިލް ނެތީމަ އަޅުގަނޑުމެނަށް އަޅުގަނޑުމެންގެ ދުލަށް މި ގެނެވެނީ ހިތަށްއަރާ ކޮންމެ އެއްޗެއް އެއްވެސް ކަހަލަ ކޮންޓްރޯލެއް ނެތި ހިތަށް އެރިހާ އެއްޗެއް ދުލުން ބޭރުވެގެން އެމީހެއްގެ ޖަޒުބާތީ ޙާލަތުގައި ދުލުން ބޭރުކުރަން ބޭނުންނުވާ ކިތަންމެ އެއްޗެއް އެމީހެއްގެ އަޚުންނާއި އުޚުތުންނާ ދިމާލަށް ދިވެހި ރައްޔިތުންގެ ކުރިމަތީގައި ފާޅުކުރެވިގެންދާކަމީ ޙަޤީޤަތެއް. މިފަދަ ދަނޑިވަޅެއްގައި މިކަހަލަ މުހިންމު ބިލެއްގެ ބޭނުންތެރިކަން ރައްޔިތުންނަށް ޖެހިފައިވާ މިދަނޑިވަޅުގައި ރައްޔިތުންގެ މަޖިލީހުން މުހިންމު މަސައްކަތެއް ކުރައްވާ ޤާނޫނީ ހަމަތަކުގުގެ ތެރެއިން ސަރުކާރާ އިދިކޮޅު ފަރާތްތަކާއި ޢާންމު ރައްޔިތުންގެ ޙައްޤުތައް ރައްކާތެރިކުރުމަށް ފާސްކުރެއްވުމަކީ ރައްޔިތުންނަށް ލިބުނު ވަރަށް ބޮޑު ނަޞީބެއް" މިނިސްޓަރ ވިދާޅުވިއެވެ.
އަބުރު ރައްކާތެރިކޮށްދިނުމާއި ޚިޔާލުފާޅުކުރުމުގެ ޤާނޫނުގެ ދަށުން އަބުރު ރައްކާތެރިވެގެން ދާނީ ހަމައެކަނި ސަރުކާރުގައި ތިއްބެވި ބޭފުޅުންގެ އެކަނި ނޫންކަމަށާއި، އިދިކޮޅު ފަރާތްތަކާއި، ޢާންމުކޮށް ހުރިހާ ދިވެހި ރައްޔިތުންގެ އަބުރު ރައްކާތެރިކޮށް ކަށަވަރުކޮށްދޭކަމަށް ހޯމް މިނިސްޓަރ އަޒްލީން އަޙްމަދު ވިދާޅުވިއެވެ. އެހެންކަމުން މި ޤާނޫނު ބަލައިގަތުމަށް ރައްޔިތުންނަށް މިނިސްޓަރ ގޮވާލެއްވިއެވެ.
"ތެދު ޙަޤީޤަތްކަމަށްވާނަމަ މި ޤާނޫނުގެ ތެރެއިން ފިޔަވަޅު ނޭޅޭނެކަން ވަރަށް ސާފުކޮށް ބުނެފައި އޮބައޮތް. ދެން މިޤާނޫނާ ދޭތެރޭ ނެގެޓިވް ވާހަކަ ދެއްކުމުގެ ކޮބައިތޯ ޙައްޤަކީ؟ އެހެންކަމުން ތެދު މަޢުލޫމާތު ނުފެތުރިގެން އަޅުގަނޑުމެނަށް އުނދަގޫވާ ކަމަށްވާނަމަ އެއީ ރައްޔިތުން ބަލައިގަންނާނެ ކަމެއް ނޫން" މިނިސްޓަރ ވިދާޅުވިއެވެ.
މި ޤާނޫނާއެކު ޚިޔާލުފާޅުކުރުން ހުއްޓިގެންދާނެ ކަމަށް ބުނާ ބުނުމަކީ ކަނޑައެޅިގެން ދޮގެއްކަމަށް ވިދާޅުވެ ހޯމް މިނިސްޓަރ ވަނީ، ޤާނޫނާ ޚިލާފަށް އެއްވެސް މީހަކަށް އަދަބު ނުދޭނެކަމުގެ ޔަޤީންކަން ދެއްވާފައެވެ. އަދި ޤާނޫނާ ޚިލާފުވާ ފަރާތަކާމެދު އަޅަންޖެހޭ ފިޔަވަޅުތައް އެޅުއްވުމުގައި ފަސްޖެހިވަޑައިނުގަންނަވާނެ ކަމަށް މިނިސްޓަރ އަޒްލީން އަޙްމަދު ވިދާޅުވިއެވެ.