ޚަބަރު

ފުލުހުންގެ ޚިދުމަތުގެ ފެންވަރު ރަނގަޅުކުރުމަށް ރައީސް ދަނީ ގިނަ މަސައްކަތްތަކެއް ކުރައްވަމުން: ވަޒީރު އިޙްސާން


  • ފުލުހުންގެ ޚިދުމަތަކީ ރައްޔިތުންގެ ތެރެއިން ދެވޭ ޚިދުމަތެއްކަން ވަޒީރު ފާހަގަކުރެއްވި

  • ފުލުހުންގެ ޚިދުމަތް މުޅި ރާއްޖެއަށް ފުޅާކުރެއްވުމަށް ކުރައްވާ މަސައްކަތްވެސް ވަޒީރު ފާހަގަކުރެއްވި

ދިވެހި ފުލުހުންގެ ޚިދުމަތުގެ ފެންވަރު ރަނގަޅުކޮށް ދިވެހި ފުލުހުންގެ ޚިދުމަތް ތަރުތީބުކުރުމަށްޓަކައި ރައީސުލްޖުމްހޫރިއްޔާ ވަރަށް ގިނަ މަސައްކަތްތަކެއް ކުރައްވަމުން ގެންދަވާކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.

ވަޒީރު މިހެން ވިދާޅުވީ، 40 ވަނަ ފުލުހުންގެ އަސާސީ ތަމްރީން ކޯހުގެ ދަސްވެނިވެ ހިނގާލުމުގެ ރަސްމިއްޔާތު ޝަރަފްވެރިކޮށްދެއްވައި ވާހަކަފުޅުދައްކަވަމުންނެވެ.

40 ވަނަ ފުލުހުންގެ އަސާސީ ތަމްރީން ކޯހުގެ ދަސްވެނިވެ ހިނގާލުމުގެ ރަސްމިއްޔާތު ޝަރަފްވެރިކޮށްދެއްވައި ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާން ވިދާޅުވީ، ފުލުހުންގެ ޚިދުމަތަކީ ހިތްވަރާއި ކެރުމާއި، ޤައުމަށް ލޯތްބެއް އޮވެގެން އަދި ދިވެހި ރައްޔިތުންނަށް ޚިދުމަތްކުރުމުގެ އާދަޔާ ޚިލާފު ވިސްނުމެއް ހުރެގެން މެނުވީ ކުރެވޭނެކަމެއް ނޫންކަމަށެވެ. މިކަން ކުރުމަށްޓަކައި ތަމްރީން ފުރިހަމަކޮށް ނިކުތް ހުރިހައި ފުލުހުންނަށް ވަޒީރު އިޙްސާން ވަނީ މަރުހަބާ ދަންނަވާފައެވެ.

ފުލުހުންގެ ޚިދުމަތަކީ ޤައުމެއް ކުރިއަށްދިއުމަށް އެ ޤައުމެއްގައި އޮންނަންޖެހޭ މުހިންމު އަސާސްތަކެއް ހިފަހައްޓާ ޚިދުމަތެއްކަމަށް ވަޒީރު ވިދާޅުވިއެވެ. އެގޮތުން ޤައުމެއްގެ ސަލާމަތާއި ރައްކާތެރިކަމާއި ޤައުމެއްގައި އޮންނަންޖެހޭ ހަމަޖެހުން ހިފެހެއްޓުމުގެ ފުރިހަމަ ޒިންމާ މިއޮންނަނީ ފުލުހުންގެ ބޮލުގައި އެޅިފައިކަމަށް ވިދާޅުވިއެވެ.

ދިވެހި ފުލުހުންގެ ޚިދުމަތުގެ ފެންވަރު ރަނގަޅުކޮށް ދިވެހި ފުލުހުންގެ ޚިދުމަތް ތަރުތީބުކުރުމަށްޓަކައި ދިވެހިރާއްޖޭގެ އަދުގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަރަށް ގިނަ މަސައްކަތްތަކެއް ކުރައްވާކަމަށް ވަޒީރު ވިދާޅުވިއެވެ. މިހާރު ދިވެހިރާއްޖޭގެ ކޮންމެ ރަށެއްގައި މިއަހަރު ނިމުމުގެ ކުރިން ދިވެހި ފުލުހުންގެ ޚިދުމަތް ފިޒިކަލީ އެތަނެއްގައި ގާއިމްވެގެން ފުރިހަމައަށް ދެވޭނެގޮތައް ހިންގަމުން މިދާ ޕްރޮޖެކްޓަކީ އޭގެ އެއް ނަމޫނާކަމަށް ވިދާޅުވިއެވެ.

"ދިވެހި ފުލުހުންނަށް ބޭނުންވާ އިންފްރާސްޓްރަކްޗަރ ރަނގަޅު ގޮތުގައި ބޮޑު ބިޔަ ޕްރޮޖެކްޓެއް މިވަގުތު ރާއްޖޭގައި ހިނގަމުން އެބަދޭ. 100 އަށްވުރެ ގިނަ ރަށަށް ކޮމިޓްމަންޓްދެވި ޕްރޮޖެކްޓްގެ މަސައްކަތްތައް އެކި ހިސާބުތަކުގައި މިވަނީ. މި ހުރިހައި ކަމެއް އިއްޒަތްތެރި ރައީސުލްޖުމްހޫރިއްޔާ ކުރައްވަމުން އެ ގެންދަވަނީ ދިވެހި ރައްޔިތުންނަށް އެންމެ އެދެވޭފަދަ ޚިދުމަތެއް ތިޔަ ފުލުހުންގެ ފަރާތުން ހޯދައިދިނުމަށް." ވަޒީރު އިޙްސާން ވިދާޅުވިއެވެ.

ފުލުހުންގެ ޚިދުމަތަކީ ޤައުމެއް ކުރިއަށްދިއުމަށް މުހިންމު އަސާސްތަކެއް ހިފަހައްޓާ މުވައްސަސާއެއްގެ ގޮތުގައި ވަޒީރު ސިފަކުރެއްވިއެވެ. އަދި ފުލުހުން ލޯތްބާއި އިހްތިރާމާއިއެކު ރައްޔިތުންނަށް ޚިދުމަތް ދިނުމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާން ވަނީ ގޮވާލައްވާފައެވެ.