ބިލެތްފަހިން ދެއްކީ ރައްޔިތުންގެ ހިތުގައި ޤައުމިއްޔަތަށް އޮތްލޯބި

ށ. އަތޮޅުން އަތޮޅު ފެންވަރުގައި ޤައުމީ ދުވަހުގެ ރަސްމީ ޖަލްސާ ބާއްވައިފިއެވެ. މި ޖަލްސާ އޮތީ ށ. ބިލެއްފަހީ ސުކޫލުގައެވެ.

ޤައުމީ ދުވަހުގެ ރަސްމީ ޖަލްސާ ޝަރަފުވެރިކޮށްދެއްވީ ސިޓީތަކާއި އިދާރީ ދާއިރާތައް ހިނގުމާއި އާންމު މަސައްކަތްތަކާއި ބެހޭ ވަޒީރު އާދަމް ޝަރީފު އުމަރުއެވެ. އަދި ދަނޑުވެރިކަމާއި ދިރޭތަކެއްޗާއި ބެހޭ ވަޒީރު ޑރ. މަރިޔަމް މާރިޔާ ވަނީ ބައިވެރިވަޑައިގެންފައެވެ.

މިރަސްމިއްޔާތުގައި ވާހަދައްކަމުން ށ. އަތޮޅު ކައުންސިލް ރައީސް މުހައްމަދު ޝިޔާމް ވިދާޅުވީ ޤައުމީ ދުވަސް ފަދަ ބޮޑެތި ދުވަސްތައް މިގޮތައް އަތޮޅު ފެންވަރުގައި ބޭއްވުމުގެ ބޭނުމަކީ އަތޮޅުގެ ރައްޔިތުންގެ އެއްބައިވަންތަކަމާއި އެކުވެރިކަމާއި ގުޅުން ބަދަހި ކުރުމަށްކަމަށެވެ.

ޝިޔާމް ވިދާޅުވީ ށ. އަތޮޅު ކައުންސިލުން ކުރަމުންދާ މަސައްކަތްތަކަކީ ނަމޫނާ މަސައްކަތްތަކެއް ކަމަށެވެ. އަތޮޅުގެ ކޮންމެ ގޮވާލުކަމަށް ރައްޔިތުން އިޖާބަދީ ވަކި ކުލައެއް ފިކުރެއް ނެތި އެއްބައިވަންތަކަމާއިއެކީ ކުރަމުންދަނީ ޝުކުރު ހައްގު މަސައްކަތްތަކެއްކަމަށް އޭނާ ވިދާޅުވިއެވެ.

"ށ. އަތޮޅުގެ ރައްޔިތުންގެ ހިތުގައި ގައުމީ ދުވަހަށް އޮތްލޯބި ފެނިގެން ހިގައްޖެ. ކޮންމެ ކައުންސިލަކީވެސް ގޮވާލާ ކޮންމެ ގޮވާލުމަށް އިޖާބަދީ ވަރަށް އެކުވެރިކަމާއެކު މަސައްކަތް ކުރާ ބައެއް. ށ. އަތޮޅުން ކައުންސިލްތަކުުން ޑަބްލިއުޑީސީއިން މިކުރަނީ ވަރަށް ބުރަ މަސައްކަތެއް" ޝިޔާމް ވިދާޅުވިއެވެ.

މި ޖަލްސާގައި ވަނީ ށ. އަތޮޅު އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުން ކުރާ މަސައްކަތްތަކާއި ހިއްވަރު ދިނުމުގެ ގޮތުން ށ. އަތޮޅު ކައުންސިލުން އަހަރަކު 1 ފަހަރުދޭ މާރެސް އެވޯޑުވެސް ދީފައިއެވެ. އަދި އެންމެ ރަނގަޅަށް މަސައްކަތް ކުރި 3 ކޮމިޓީއަކަށް ވަނީ އެވޯޑް ދީފައެވެ.

1 ވަނަ ލިބިފައިވަނީ ށ. ފުނަދޫ އަންހެނުންގެ ތަރައްޤީއަށް މަސައްކަތް ކުރާ ކޮމިޓީއަށެވެ. މި އެވޯޑު ހަވާލުކޮށްދެއްވީ ވަޒީރު އާދަމް ޝަރީފު އުމަރުއެވެ. 2 ވަނަ ބިލެތްފަހީ އަދި 3 ވަނަ ށ. ގޮއިދޫ އަންހެނުންގެ ތަރައްޤީއަށް މަސައްކަތް ކުރާ ކޮމިޓީއަށް ލިބުނު އިރު މި އެވޯޑު ހަވާލުކޮށްދެއްވީ ވަޒީރު ޑރ. މަރިޔަމް މާރިޔާއެވެ.

މި ދަތުރުފުޅުގައި ވަޒީރު އާދަމް ޝަރީފު އުމަރުވަނީ ށ. އަތޮޅު ކައުންސިލާއި ބައްދަލުކުރައްވާފައެވެ. ބިލެއްފަހީގައި ކުރިއަށްދިޔަ މި ބައްދަލުވުމުގައި އަތޮޅުގެ ރައްތަކާއި ގުޅުންހުރި މުހިންމު ކަންކަމާއި ގުޅޭ ގޮތުން ވަނީ މަޝްވަރާކޮށްފައެވެ. 2 ދުވަހުގެ މުއްދަތައް ބިލެއްފަހީީގައި ކުރިއަށްދިޔަ ޤައުމީ ދުވަހުގެ ހަރަކާތްތަކުގައި ށ.އަތޮޅު އެކި ރައްރަށުގެ ކައުންސިލުންވަނީ ބައިވެރިވެފައެވެ.