ދަރިމައިވުމުގެ މައްސަލަތައް ހުންނަ އަންހެނުންނަށް ފަރުވާކުރެވޭނޭ އިންތިޒާމް މިއަހަރުގެ ތެރޭގައި ޤާއިމްކުރައްވާނެ ކަމަށް އައި.ޖީ.އެމްއެޗުން ވިދާޅުވެއްޖެއެވެ.
އައި.ޖީ.އެމް ހޮސްޕިޓަލުގެ ތަރައްޤީގެ މަޝްރޫއުތަކާބެހޭ މަޢުލޫމާތު ޕީ.އެސް.އެމްއާއި ޙިއްޞާ ކުރައްވަމުން އެ ހޮސްޕިޓަލުގެ ސީ.އީ.އޯ ފަރްޙަތު ޝަހީރު ވިދާޅުވީ، އެންމެ އިސްކަމެއް ދެއްވަނީ އެ ހޮސްޕިޓަލުގައި މިހާރު ލިބެން ނެތް ސްޕެޝަލިޓީ އަދި ސުޕަރ ސްޕެޝަލިޓީ ޚިދުމަތް ތަޢާރަފު ކުރެއްވުމަށް ކަމަށެވެ. އެގޮތުން މިހާރު ލިބެން ނެތް ޚިދުމަތްތަކުގެ ތެރެއިން ދަރިމައިވުމުގައި އަންހެނުންނަށް ދިމާވާ ތަފާތު އެކި މައްސަލަތަކަށް ދެވޭ ޚާއްޞަ ފަރުވާ އައި.ޖީ.އެމްޗްގައި ޤާއިމުކުރެއްވުމާބެހޭ މުހިންމު މަޝްވަރާތަކެއް ކުރައްވަމުން ގެންދަވާ ކަމަށް ވިދާޅުވިއެވެ.
ދަރިމައިވުމުގައި އަންހެނުންނަށް ދިމާވާ މައްސަލަތަކަކީ މިހާރު ރާއްޖެއިން ފަރުވާދެވެން ނެތް ކަމެކެވެ. އަދި ދަރިމައިވުމުގެ މައްސަލަތައް ހުންނަ ގިނަ އަދަދެއްގެ ދިވެހިން މި ފަރުވާ ހޯދުމަށް ރާއްޖެއިން ބޭރަށް ދާކަން އާސަންދައިގެ ތަފާސް ހިސާބުތަކުން ދައްކައެވެ.
އަދި މިއީ އެހާމެ އަގުވެސް ބޮޑު، އަދި ގިނަ ދުވަހު ޤައުމުން ބޭރުގައި ފަރުވާ ހޯދަން މަޑުކުރަންޖެހޭ ފަރުވާއެއްވެސް މެއެވެ. ފަރްޙަތު ޝަހީރު ވިދާޅުވީ، އުންމީދަކީ މިހާރު ރާއްޖޭގައި ލިބޭނޭ އިންތިޒާމް ހަމަޖެހިފައިނެތް ހުރިހާ ފަރުވާއެއް އެއްފުރާޅެއްގެ ދަށުން ލިބޭނޭ އިންތިޒާމް ހަމަޖެހިގެން ދިއުން ކަމަށެވެ.
އައި.ޖީ.އެމް.އެޗުގައި މިހާރު ޤާއިމު ކުރައްވަން މަސައްކަތް ކުރައްވަމުން ގެންދަވާ ޑައިގްނޯސްޓިކް ސެންޓަރު ނިމުމާއެކު، ސުޕަރ ސްޕެޝަލިޓީ ގިނަ ޚިދުމަތްތަކެއް ރާއްޖޭގައި ލިބޭނޭ އިންތިޒާމް ހަމަޖެހިގެންދާނެއެވެ.