މިއަހަރު ބާއްވަވާ 2 ވަނަ "ކިއްސަރު ފެއަރ" އދ. މަހިބަދޫގައި ބޭއްވެވުމަށް ހަމަޖައްސަވައިފިއެވެ.
ކިއްސަރު ފެއަރއަކީ، ރާއްޖޭގެ ވަޒީފާގެ ބާޒާރުގައި ހުރި ފުރުޞަތުތައް އަތޮޅުތަކުގައި ދިރިއުޅޭ ޒުވާނުންނަށް ބުނެދީ، އެ ފުރުޞަތުތައް ތަނަވަސްކޮށްދީ، ވަޒީފާތަކަށް ޝައުޤުވެރިކުރުވައި، އަދި ކަމާބެހޭ މަޢުލޫމާތު ޒުވާނުންނަށް ދެއްވުމަށް ބާއްވަވަމުން އަންނަ ފެއަރއެއކެވެ. "ކިއްސަރު - މަސައްކަތްތެރިންގެ މައިޒާން" ގެނަމުގައި ކިއްސަރު ފެއަރ އެންމެ ފުރަތަމަ ބާއްވާފައި ވަނީ 2006 ވަނަ އަހަރެވެ.
ޔޫތް މިނިސްޓްރީގެ ޑިރެކްޓަރ ޖެނެރަލް ޢަލީ ޒަކީ އަޙުމަދު ވިދާޅުވީ، އަތޮޅުތަކުގައި ޤާއިމުކުރައްވާފައިވާ ޔޫތް ސެންޓަރުތައް މެދުވެރިކުރައްވައި، ޒުވާނުންނަށް އެކިކަހަލަ ވަޒީފާގެ ފުރުޞަތުތައް ތަނަވަސްކޮށްދެއްވުމަށް މަސައްކަތް ކުރައްވަމުން ގެންދަވާކަމަށެވެ. އަދި އަތޮޅުތަކަށް ޚާއްޞަ ކުރައްވައިގެން ބާއްވަވަމުން އަންނަ ކިއްސަރު ފެއަރ އދ. މަހިބަދޫގައި ބޭއްވެވުމަށް ހަމަޖެހިފައިވާކަމަށާއި، އެކަމުގެ ތައްޔާރީތައް މިނިސްޓްރީގެ ފަރާތުން ނޭޝެނަލް ކެރިއަރ ގައިޑެންސް ސެންޓަރާއި ގުޅިވަޑައިގެން މިހާރު ކުރައްވަމުން ގެންދަވާކަމަށެވެ.
img:http://s2.psmnews.mv/images/660x400/9694.jpg|ކިއްސަރު ފެއާރގެ ތެރެއިން- ފައިލް ފޮޓޯ: ޔޫތް މިނިސްޓްރީ
"މިނިސްޓްރީގެ ފަރާތުން މިހާރު ހުރިހާ އަތޮޅެއްގައި ކަހަލަގޮތަކަށް ޔޫތް ސެންޓަރތައް ހެދިފައި ހުންނާނެ އެރަށަކަށް ވުރެ ގިނަ ރަށުގައި. ޔޫތް ސެންޓަރުތަކުން ޒުވާނުންނަށް ވަޒީފާ ހޯދުމުގެ ފުރުޞަތުތައް ލިބިގެންދާނެ. ނޭޝެނަލް ކެރިއަރ ގައިޑެންސްގެ ފަރާތުން ވަޒީފާއަށް ޚާއްޞަކޮށްގެން ކިއްސަރު ފެއަރ އަތޮޅުތެރޭގައި ބާއްވަމުން ދާނެ. މިހާރު ތައްޔާރުވަމުން މިދަނީ އދ. މަހިބަދޫގައި މި ފެއަރ ބޭއްވުމަށް" ޔޫތް މިނިސްޓްރީގެ ޑިރެކްޓަރ ޖެނެރަލް ވިދާޅުވިއެވެ.
ވަޒީފާގެ މައިދާނަށް ނުކުތުމަށް މައިންބަފައިންގެ ފަރާތުން ޒުވާނުންނަށް ބާރު އަޅައި، އޯލެވެލް އާއި އޭލެވެލް ނިންމާ ދަރިވަރުން ސަރުކާރުން ފަހިކޮށްދެއްވާ މިފަދަ ފުރުޞަތުތަކުގެ ބޭނުން އެންމެ ހެޔޮގޮތުގައި ހިފުމަށް ޔޫތް މިނިސްޓްރީން އެދިވަޑައިގަންނަވައެވެ.
img:http://s2.psmnews.mv/images/660x400/9676.jpg|ކިއްސަރު ފެއާރގެ ތެރެއިން- ފައިލް ފޮޓޯ: ޔޫތް މިނިސްޓްރީ
މިއަހަރު ބޭއްވެވުމަށް ހަމަޖެހިފައިވާ ފުރަތަމަ ފެއަރ، މިއަހަރުގެ ކުރީކޮޅު އައްޑޫ ސިޓީގައި ވަނީ ބާއްވާފައެވެ. 38 ސްޓޯލާއެކު އައްޑޫ ސިޓީގައި ބޭއްވެވި ފެއަރއަށް ބޮޑު ތަރުޙީބެއް ލިބިގެންދިޔައިރު، އެފަހަރުގެ ފެއަރއިން 200 އަށްވުރެގިނަ ވަޒީފާގެ އެޕްލިކޭޝަން ފޯމް ލިބިގެންދިޔަކަމަށް ޔޫތް މިނިސްޓްރީން ވިދާޅުވެއެވެ. ހަމައެހެންމެ 65 ސްޓޯލާއެކު ދަރުބާރުގޭގައި ބޭއްވެވި ޔޫތް ޗެލެންޖުގެ ތެރެއިން 1500 ވަޒީފާގެ އެޕްލިކޭޝަން ފޯމް ލިބިގެންދިޔަކަމަށް އެ މިނިސްޓްރީން ހާމަކުރައްވައެވެ.