ސްކޮލަރޝިޕް ސްކީމްތަކަށް: އަހަރެއްގެ ތެރޭ 344 މިލިޔަނަށްވުރެ ގިނަ ރުފިޔާ
-
މިއަހަރުގެ މިހާތަނަށް އެކަނިވެސް 95.3 މިލިޔަން ރުފިޔާ ޚަރަދުކޮށްފައިވޭ
-
ރާއްޖެހިމެނޭހެން 20 ޤައުމެއްގައި ދަރިވަރުން އަންނަނީ ކިޔަވަމުން
2024 ވަނަ އަހަރުން ފެށިގެން މިއަހަރުގެ މިހާތަނަށް 344 މިލިޔަނަށްވުރެ ގިނަ ރުފިޔާ ސްކޮލަރޝިޕް ސްކީމުގެ ދަށުން މަތީ ތަޢުލީމު ހާސިލްކުރާ ދަރިވަރުންނަށް ޚަރަދުކޮށްފިއެވެ.
މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާބެހޭ ވުޒާރާއިން ވަނީ ސްކޮލަރޝިޕްތަކާއި ގުޅޭ އެންމެ ފަހުގެ ތަފާސްހިސާބުތައް އާންމުކުރައްވާފައެވެ.
މަތީ ތަޢުލީމާބެހޭ ވުޒާރާގެ ތަފާސްހިސާބުތައް ދައްކާގޮތުން މިއަހަރުގެ މިހާތަނަށް އެކަނިވެސް 95.3 މިލިޔަން ރުފިޔާ ސްކޮލަރޝިޕްއަށް ޚަރަދުކޮށްފައިވާކަމަށް ތަފާސް ހިސާބުތަކުން ދައްކައެވެ. މިއީ ޖުމްލަ 45 ދަރިވަރުންނަށް އެހީތެރިވެދީފައިވާ އަދަދެކެވެ. އޭގެތެރޭގައި ހިމެނެނީ 34 އަންހެން ކުދިންނާއި، 11 ފިރިހެން ކުދިންނެވެ. މީގެތެރެއިން މިއަހަރުގެ މިހާތަނަށް 48 ދަރިވަރުން ސްކޮލަރޝިޕް ސްކީމުގެ ދަށުން މަތީ ތައުލީމު ހާސިލްކޮށްފައިވާކަމަށް އެ ވުޒާރާއިން ވިދާޅުވެއެވެ. އެއީ 30އަންހެން ކުދިންނާއި 18 ފިރިހެން ކުދިންނެވެ.
📊 Scholarship Schemes Higher Education Statistics 2024–2025
— Min. of Higher Edu, Labour and Skills Development (@MoHEmv) July 29, 2025
🌍 607 students are currently pursuing higher education in 20 countries, including the Maldives.
📈 A total of 357 students have graduated through scholarship schemes to date.
Updated: 24th July 2025 pic.twitter.com/wRDC7680wM
ތަފާސްހިސާބުތައް ދައްކާގޮތުން 2024 ވަނަ އަހަރުން ފެށިގެން މިއަހަރުގެ މިހާތަނަށް 93 ސްކޮލަރޝިޕް ސްކީމްއަކަށް 344 މިލިޔަން ރުފިޔާ ވަނީ ޚަރަދުކޮށްފައެވެ. އަދި މި ސްކީމްގެ ދަށުން ޖުމްލަ 268 ދަރިވަރުން ތަޢުލީމު ހާސިލުކުރަމުންދާކަމަށް އެ ވުޒާރާގެ ތަފާސްހިސާބުތަކުން ދައްކައެވެ. އޭގެތެރޭގައި ހިމެނެނީ 176 އަންހެން ކުދިންނާއި 80 ފިރިހެން ކުދިންނެވެ.
ސްކޮލަރޝިޕް ސްކީމުގެ ދަށުން 357 ދަރިވަރުން މަތީ ތައުލީމު ހާސިލްކޮށްފައިވާކަމަށް އެ ވުޒާރާއިން ވިދާޅުވެއެވެ. އެއީ220 އަންހެން ކުދިންނާއި، 137 ފިރިހެން ކުދިންނެވެ. މި ތަފާސްހިސާބުތައް ދައްކާގޮތުން ރާއްޖެ ހިމެނޭހެން 20 ޤައުމެއްގައި 607 ދަރިވަރަކުން އަންނަނީ ތަޢުލީމު ހާސިލްކުރަމުންނެވެ.
ސަރުކާރުން ދެއްވާ ހައި އެޗީވާރސް ސްކޮލަރޝިޕްއާއި ރައީސުލްޖުމްހޫރިއްޔާ ދެއްވާ ޚާއްސަ ސްކޮލަރޝިޕްތަކުގެ އިތުރުން އެކި ޤައުމުތަކުންވެސް ސްކޮލަރޝިޕްތައް ލިބެއެވެ.