އިންތިޚާބާ ގުޅުންހުރި ކަންކަން ހަރުދަނާކުރެއްވުމުގެ ގޮތުން ސަރަޙައްދީ ޤައުމުތަކުގެ މެދުގައި މަޝްވަރާކުރެއްވުމަށް ބޭއްވެވި "ފޯރަމް އޮފް އިލެކްޝަންސް މެނޭޖްމަންޓް ބޮޑީސް އޮފް ސައުތް އޭޝިއާ" ފެމްބޯސާގެ 7 ވަނަ ޖަލްސާ ނިންމަވާލައްވައިފިއެވެ. ދެ ދުވަހުގެ މިބައްދަލުވުން ކުރިއަށްގެންދަވާފައިވަނީ ބަނޑޮސް އައިލެންޑް ރިސޯޓްގައެވެ.
ފޯރަމް އޮފް އިލެކްޝަންސް މެނޭޖްމަންޓް ބޮޑީސް އޮފް ސައުތް އޭޝިއާ" ފެމްބޯސާގެ 7 ވަނަ ޖަލްސާގައި ސާރކްގެ 8 ޤައުމުގެ މެދުގައި އެކުލަވާލެވުނު ޚާއްސަ އެއްބަސްވުމެއްގައި އެ ޤައުމުތަކުންވަނީ ސޮއިކުރައްވާފައެވެ. މި އެއްބަސްވުމުގައި ހިމެނޭ ކަންކަން ޤައުމުތަކުން ތަންފީޒުކުރަންޖެހޭއިރު އެ ނިންމުންތައް ތަންފީޒުކުރުމުގައި އެއް ޤައުމުން އަނެއް ޤައުމަށް އެހީތެރިކަން ފޯރުކޮށްދޭންޖެހެއެވެ.
img:http://s2.psmnews.mv/images/660x400/14702447420850.jpg|ފެމްބޯސާގެ 7 ވަނަ ޖަލްސާގެ ތެރެއިން- ފޮޓޯ: ޕީއެސްއެމް
ފެމްބޯސާގެ 7 ވަނަ ބައްދަލުވުމުގައި ސާރކުގެ 8 ޤައުމުގެ އިންތިޚާބީ އިދާރާތަކުގެ އެންމެ އިސްވެރިން ވަނީ ބައިވެރިވެޑައިގެންފައެވެ. މިއަހަރުގެ ބައްދަލުވުމުގައި ޤައުމުތަމުގެ މެދުގައި މަޝްވާރާކުރައްވާފައި ވަނީ އިންތިޚާބުތަކުގައި ޒަމާނީ ޓެކްނޮލޮޖީ ބޭނުންކުރެވިދާނެ ގޮތްތަކާއި ގުޅޭގޮތުންނެވެ. 2010 ވަނަ އަހަރު އުފެދުނު މި ޖަމްޢިއްޔާގެ މި ފަހަރުގެ ބައްދަލުވުމުގެ ރިޔާސަތު ބަލަހައްޓަވާފައިވަނީ ރާއްޖޭގެ އިލެކްޝަންސް ކޮމިޝަނުންނެވެ.
މި ބައްދަލުވުމުގައި ކޮންމެ ޤައުމަކުންވެސް ކަރުދާހެއް ހުށައަޅާ، މަޝްވަރާކޮށްފައިވެއެވެ. އެގޮތުން ރާއްޖެއިން ހުށައެޅި ކަރުދާހުގައި މައިގަނޑު ގޮތެއްގައި އަލިއަޅުވާލާފައިވަނީ ކުރިޔަށް އޮތް އިންތިޚާބުތަކުގައި ޒަމާނީ ޓެކްނޮލޮޖީ ބޭނުންކޮށްގެން އިންތިޚާބުގެ މަސައްކަތްތައް ކުރިޔަށް ގެންދިއުމާއި ގުޅޭ ގޮތުންނެވެ. އަދި އިންތިޚާބަށް ރަޖިސްޓްރީވުމަށް ފޯމް ހިފައިގެން އެމީހަކު އައުމުގެ ބަދަލުގައި ހުރި ތަނެއްގައި ހުރެ އޮންލައިންކޮށް ރަޖިސްޓްރީވުމާއި، އިންޓަރނެޓް މެދުވެރިކޮށް ނުވަތަ އޮންލައިންކޮށް އެހެނިހެން ކަންކަން ކުރުމާއި ގުޅޭގޮތުން މަޝްވަރާކުރެވުނުކަމަށް އިލެކްޝަންސް ކޮމިޝަނުން މަޢުލޫމާތުދެއްވައެވެ.
img:http://s3.psmnews.mv/images/660x400/14702448637714.jpg|ފެމްބޯސާގެ 7 ވަނަ ޖަލްސާގެ ތެރެއިން- ފޮޓޯ: ޕީއެސްއެމް
ބައްދަލުވުން ނިންމަވާލެއްވުމަށްފަހު ބޭއްވެވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން އިލެކްޝަންސް ކޮމިޝަންގެ ރައީސް އަޙްމަދު ސުލައިމާން ވިދާޅުވީ، މި ބައްދަލުވުމުގެ ސަބަބުން ސާރކް ޤައުމުތަކުގެ އިންތިޚާބީ އިދާރާތަކާ ދެމެދު އޮތް ގުޅުން ހަރުދަނާކުރެވިފައިވާކަމަށެވެ.
މިފަހަރުގެ ބައްދަލުވުމުން ނިންމުނު ކަންތައްތަކާއި ގުޅޭ އިތުރު މަޢުލޫމާތު ދެއްވަމުން އިލެކްޝަންސް ކޮމިޝަންގެ މެމްބަރ އަޙްމަދު އަކްރަމް ވިދާޅުވި ގޮތުގައި، މިފަހަރުގެ ބައްދަލުވުމުން ސަރަޙައްދީ ޤައުމުތަކުގެ މެދުގައި މައިގަނޑު 8 ކަމެއްގެ މައްޗަށް އެއްބަސްވެވިފައިވާކަމަށެވެ. އަދި މީގެތެރޭގައި އިންތިޚާބީ އިދާރާތަކުން އިންސާފުވެރި މިނިވަން އިންތިޚާބެއް ބޭއްވުމުގައި ޒަމާނީ ޓެކްނޮލޮޖީގެ ބޭނުން ހިފިދާނެ ގޮތްތައް ހިމެނިފައިވާނެކަމަށެވެ.
"ފެމްބޯސާ" މި ބައްދަލުވުމަކީ، ދެކުނު އޭޝިއާގެ އިލެކްޝަންސް ކޮމިޝަންތަކުގެ މެދުގައި އޮންނަ ގުޅުން ބަދަހިކޮށް ވަރުގަދަކުރުމާއި، މިނިވަން މުސްތަޤިއްލު އިންތިޚާބެއް ބޭއްވުމަށް ކުރަންޖެހޭ ކަންކަމުގައި އެއްބާރުލުން ދިނުމާއި، އެކަމަށް ކުރަންޖެހޭ ކަންކަން ކުރާނެ ގޮތްތަކާއިމެދު މަޝްވަރާ ކުރުމުގެ ބޭނުމުގައި އަހަރަކު އެއް ފަހަރު ބާއްވަމުން އަންނަ ބައްދަލުވުމެކެވެ. އަންނަ އަހަރު މި ބައްދަލުވުން ބޭއްވުމަށް ހަމަޖެހިފައިވަނީ އަފްޣާނިސްތާނުގައެވެ.