މޫސުން ގޯސްވުމުގެ ސަބަބުން، ރާއްޖޭގެ ދެކުނުގެ ބައެއް އަތޮޅުތަކުގައި ދިރިއުޅޭ ފަރާތްތަކުން މޫސުމަށް ޚާއްޞަ ސަމާލުކަމެއް ދެއްވުމަށް މޫސުމާއި ބެހޭ ޤައުމީ އިދާރާއިން އިލްތިމާސްކުރައްވައިފިއެވެ.
އެއިދާރާއިން ލަފާކުރައްވާގޮތުގައި ކުރިއަށްއޮތް ސައުވީސް ގަޑިއިރު ރާއްޖޭގެ ދެކުނާއި މެދުތެރޭގެ އެކިހިސާބަށް ވިއްސާރަކުރާނެއެވެ. އަދި ގުގުރުމާއެކު ބޯކޮށް ވާރޭވެހުންވެސް އެކަށީގެންވާކަމަށް އެ އިދާރާއިން ލަފާކުރައްވައެވެ.
މި ވިއްސާރައިގައި އުތުރުގެ ބައެއް އަތޮޅުތަކަށް ކެރީގެ އަސަރު ފޯރިނަމަވެސް، މޫސުން ޢާއްމުގޮތެއްގައި ރަގަޅުވާނެކަމަށްވެސް އެއިދާރާއިން ލަފާކުރައްވައެވެ.
އެއިދާރާއިން ވިދާޅުވީ، ހުޅަނގާއި ހުޅަނގުއުތުރުން ދެކުނުގެ އަތޮޅުތަކަށް ގަޑިއަކު 03 މޭލާ 13 މޭލާ ދެމެދުގެ ބާރުމިނުގައި، އަދި އެހެން ހިސާބުތަކަށް ގަޑިއަކު 07 މޭލާ 17 މޭލާ ދެމެދުގެ ބާރުމިނުގައި ވައިޖެހޭނެކަމަށް ލަފާކުރެވޭ ކަމަށެވެ. އަދި ވިލާގަނޑުގައި ގަޑިއަކު ގާތްގަނޑަކަށް 40 މޭލު ބާރުމިނަށް ވައި ގަދަވުމަކީ އެކަށީގެންވާ ކަމަށާއި ދެކުނުގެ ކަނޑުތައް އާދައިގެވަރަކަށް މަޑުވެފައި، އެހެން ހިސާބުތަކުގެ ކަނޑުތައް އާދައިގެ ވަރަކަށް ގަދަވާނެކަމަށްވެސް މޫސުމާއި ބެހޭ ޤައުމީ އިދާރާއިން ލަފާކުރައްވައެވެ.