ކުށުގެ ވެށީގައި އުޅޭ ކުޑަކުދިން އިސްލާޙްކުރުމަށް ޖުވަނައިލް ޖަސްޓިސް ޔުނިޓާއި ފުލުހުން ގުޅިވަޑައިގެން ކުރިޔަށްގެންދަވާ އުންމީދު ޕްރޮގްރާމުގެ ފުރަތަމަ މަރުޙަލާ ކާމިޔާބުކަމާއެކު ނިންމަވައިފިއެވެ.
ހޯމް މިނިސްޓްރީގެ އިރުޝާދުގެ ދަށުން ޖުވަނަލް ޖަސްޓިސްޔުނިޓާއި، ފުލުހުން ގުޅިވަޑައިގެން ކުރިޔަށްގެންދަވާ މި ޕުރޮގުރާމަކީ ޤާނޫނާއި ޚިލާފުވާ އަށާރައަހަރުން ދަށުގެ ކުދިން އަނބުރާ މުޖުތަމަޢަށް ގެނައުމަށްޓަކާ ބޭނުންވާ ތަޢުލީމާއި ތަމްރީނާއި ހުނަރު އެކަށީގެންވާ މާޙައުލެއްގައި ކަށަވަރުކޮށްދިނުމަށް ފައްޓަވާފައިވާ ޕްރޮގްރާމެކެވެ.
ކުޑަކުދިންގެ ޙައްޤުތައް ރައްކާތެރިކުރުމުގެ ޤާނޫނުގެ ދަށުން އެކިއެކި ކުށްތަކަށް އަރައިގަންނަ ކުދިންގެ ތެރޭން ބޮޑެތި އަދި މެދުމިނުގެ ކުށްތަކަށް އަރައިގަންނަ ކުދިންގެ އިސްލާޙްކޮށް އަނބުރާ މުޖްތަމަޢަށް ގެނައުމާއި، މުޖްތަމަޢުގައި އުޅޭއިރު ރިވެތި އަޚްލާޤާއި ސްލޫކު ދަސްކޮށްދިނުންފަދަ މަޤްޞަދުތަކެއް ހާޞިލްކުރެއްވުން މި ޕްރޮގްރާމުގެ މަޤްޞަދު ތަކުގެ ތެރޭގައި ހިމެނެއެވެ.
މި ޕްރޮގްރާމް ހިނގަމުންދާ ގޮތާއި ބެހޭގޮތުން މަޢުލޫމާތު ދެއްވަމުން ޖުވަނައިލް ޖަސްޓިސް ޔުނިޓްގެ އެގްޒެކްޓިވް ޑިރެކްޓަރ ހާމިދު ޔޫސުފް ވިދާޅުވީ މި ޕްރޮގްރާމްގެ ފުރަތަމަ މަރުޙަލާ ނިމުމުއިރު ކުދިންގެ އަޚްލާޤާއި އަދި ވިސްނުމަށް ހެޔޮބަދަލެއް ގެނެވިފައިވާކަމަށެވެ.
މި ޕްރޮގްރާމުގެ ދެވަނަ މަރުހަލާގައި އޮންނާނީ ކުދިންނަށް ބޭނުންވާ ހުނަރާއި، ތަމްރީނު ދިނުންކަމަށާ މިބައިވެސް ވަރަށް އަވަހަށް ފެށިގެންދާނެކަމަށް ހާމިދު ވިދާޅުވިއެވެ. ހާމިދު ވިދާޅުވީ މިޕޮރޮގްރާމްގެ ދެވަނަ މަރުޙަލާގައި ކުދިންނަށް ތަމްރީނު ދިނުމަށްފަހު ކުދިން އެއް އަހަރުދުވަހުގެ އިންޓާންޝިޕެއްގެ ދަށުން މަސައްކަތުގެ ދާއިރާއަށް ފޮނުވާނެކަމަށެވެ. އެހެންކަމުން މި ޕްރޮގްރާމް ނިމޭއިރު މިކުދިން ތިބޭނީ މުޖްތަމަޢަށް ބޭނުންތެރި ހުނަރުވެރި ކުދިންގެ ގޮތުގައިކަމަށް ހާމިދު ވިދާޅުވިއެވެ. އަދި ޕްރޮގްރާމް ނިމުމުން މިކުދިންގެ މައިންބަފައިންނާއި އަދި މުޅިމުޖްތަމަޢުންވެސް މިކުދިން ބަލައިގަތުމަށް ހާމިދު އިލްތިމާސްކުރެއްވިއެވެ.
ކުށުގެ ވެށީގައި އުޅޭ ކުޑަކުދިން އިސްލާޙްކުރުމަށްކުރިޔަށްގެންދަވާ އުންމީދު ޕްރޮގްރާމުގެ ފުރަތަމަ މަރުހަލާ 20 ކުއްޖަކު ބައިވެރިކޮށްފައިވެއެވެ. މިކުދިންނަށް ބޭނުންވާ ތަޢުލީމާއި ހުނަރުތައް ދީފައިވަނީ މި ކުދިން ދ.ވާނީއަށް ގެންދިޔުމަށް ފަހު އެރަށުގައި ބައިތިއްބައިގެންނެވެ.