މިއަހަރުގެ މަސްވެރިންގެ ދުވަހުގެ ރަސްމީ ޕްރޮގްރާމް ހިންގަވާ ރަށަކީ ހުވަދުއަތޮޅު އުތުރުބުރީ ގެމަނަފުށީކަމުގައި ސަރުކާރުން ކަނޑައަޅުއްވާފައިވާތީ، 36 ވަނަ މަސްވެރިންގެ ދުވަހުގެ ހުރިހާ ޙަރަކާތްތައް ޕީއެސްއެމްގެ ޗެނަލްތަކުން ގެނެސްދިނުމުގެ ފަހުމުނާމާއެއްގައި ޕީއެސްއެމް އާއި ގެމަނަފުށި ކައުންސިލުން ސޮއިކުރައްވައިފިއެވެ.
ގެމަނަފުށީގައި މަސްވެރިންގެ ދުވަސް މިއަހަރު ވަރަށް ތަފާތުގޮތަކަށް ފާހަގަކުރުމަށް ތައްޔާރުވަމުން އަންނަކަމަށް ގެމަނަފުށި ކައުންސިލުން ވިދާޅުވެއެވެ.
ގެމަނަފުށި ކައުންސިލާއި ޕީއެސްއެމް ސޮއިކުރެއްވި ފަހުމުނާމާގެ ދަށުން ގެމަނަފުށީގައި މަސްވެރިންގެ ދުވަހާ ގުޅުވައިގެން ކުރިޔަށް ގެންދަވާ ހުރިހާ ޙަރަކާތަކާއި ގެމަފުށީގެ ހުރި މުހިންމު ކަންތައްތަކާ ތަރައްޤީއާއި އިޖްތިމާޢީ އަދި އިޤްތިޞާދީ ކަންތައްތަކާ ގުޅޭ މުހިންމު ކަންތައްތައް ޕީއެސްއެމުން ކަވަރުކުރާނެއެވެ.
މި ފަހުމުނާމާގައި ޕީއެސްއެމްގެ ފަރާތުން ސޮއިކުރެއްވީ ޑެޕިއުޓީ މެނޭޖިންގ ޑިރެކްޓަރ މުޙައްމަދު އިކްރާމް އަބްދުލްލަޠީފެވެ. ގެނަމަފުށި ކައުންސިލްގެ ފަރާތުން ސޮއިކުރެއްވީ ކައުންސިލްގެ ރައީސް ޢަބްދުﷲ ޝިޔާންއެވެ.
ފަހުމުނާމާގައި ސޮއިކުރެއްވުމަށްފަހު ވާހަކަދައްކަވަމުން ޕީއެސްއެމްގެ ޑީއެމްޑީ އިކްރާމް ވިދާޅުވީ މިފަދަ ޤައުމީ ޙަރަކާތްތައް ކުރިންވެސް ދައުލަތުގެ މީޑިއާއިން ގެނެސްދެމުން އައިކަމަށާއި، އެހެންނަމަވެސް މިފަހަރު ޕީއެސްއެމުން މަސްވެރިންގެ ދުވަސް ގެންސްދޭނީ ވަރަށް ތަފާތުގޮތަކަށް ކަމަށެވެ. އެގޮތުން ކަވަރޭޖް ގެނެސްދިނުމުގައި ޓީވީ އަދި ރޭޑިއޯއަށް ފައްކާކުރެވިފައިވާ ޝޯއެއްގޮތަށް މި ޙަރަކާތްތައް ގެނެސްދޭނެކަމަށް އިކްރާމް ވިދާޅުވިއެވެ.
ގެމަނަފުށި ކައުންސިލްގެ ރައީސް ޢަބްދުﷲ ޝިޔާން ވިދާޅުވީ މަސްވެރިންގެ ދުވަހާ ގުޅުވައިގެން ތަފާތު ޙަރަކާތްތައް ރާއްވަވާފައިވާ ކަމަށާއި، މިފަހަރުގެ މަސްވެރިންގެ ދުވަސް ގެނަމަފުށިން ފެނިގެންދާނީ ވަރަށް ތަފާތު ގޮތަކަށްކަމަށެވެ.
މި ރަސްމިއްޔާތަށްފަހު ޕީއެސްއެމް ނިއުސްއަށް މަޢުލޫމާތުދެއްވަމުން ގެމަނަފުށި ދާއިރާގެ މެމްބަރު ޖަމީލް ޢުޘްމާން ވިދާޅުވީ ގެމަނަފުށީގެ 80 އިންސައްތަ ޒުވާނުންނަކީ މަސްވެރިކަމުގެ ދާއިރާގައި ޙަރަކާތްތެރިވާ ޒުވާނުންކަމަށެވެ. އެހެންކަމުން މިފަދަ ދުވަހެއް ގެމަނަ ފުށީގައި ފާހަގަކުރެއްވުމަކީ ވަރަށް ބޭނުންތެރިކަމެއްކަމަށް ޖަމީލް ވިދާޅުވިއެވެ.
ގެމަނަފުށީގައި މަސްވެރިންގެ ދުވަސް ފާހަގކުރުމަށް ރާވައި ހިންގާ ހުރިހާ ޙަރަކާތެއް މި ފަހުމުނާމާގައި ސޮއުކުރުމަށްފަހު ޕީއެސްއެމުން ދާނީ ކަވަރކުރަމުންނެވެ. ގެމަނަފުށީގައި މިއަހަރު ފާހަގަކުރުމަށް ހަމަޖެހިފައިވަނީ 36 ވަނަ މަސްވެރިންގެ ދުވަހެވެ.