ށ. ފޯކައިދޫގައި ކުޑަކުދިންގެ ޕާކެއް ހެއްދެވުމުގެ މަސައްކަތް ކުރައްވަމުން އެބަގެންދަވައެވެ.
މިއީ ކުޑަކުދިންނަށް އެއްތަނަކަށް އެއްވެ އުޅެވޭ ފަދަ މާޙައުލެއް އެރަށުގައި ނެތުމުން ފޯކައިދޫ ކައުންސިލުން ހިންގަވާ މަޝްރޫޢެއްކަމަށް އެ ކައުންސިލުން ވިދާޅުވެއެވެ.
ޕީއެސްއެމްއަށް މަޢުލޫމާތު ދެއްވަމުން ށ.ފޯކައިދޫ ކައުންސިލްގެ ނާއިބު ރައީސް އަޙްމަދު ޢާސިފް ވިދާޅުވީ އެރަށު ތަރައްޤީކުރައްވާ ކުޑަކުދިންގެ ޕާކަކީ ކައުންސިލުން ހިންގާ އެހީ ޕްރޮގްރާމުން ލިބޭ ފައިދާގެ މިންވަރަކުން ހިންގާ މަޝްރޫޢެއް ކަމަށެވެ. ކުޑަކުދިންގެ ޕާރކް ތަރައްޤީ ކުރެއްވުމުގެ މަސައްކަތުގެ ތެރެއިން މިހާރު ކުރިއަށް ގެންދަވަނީ ވޯރކްވޭތައް ހެދުމާއި ގައު އެތުރުމުގެ މަސައްކަތެވެ. މި މަސައްކަތް ނިމުމުން ޕާރކްގައި ތަކެތި ބަހައްޓަން ފަށާނެކަމަށް އޭނާ ވިދާޅުވިއެވެ. ޢާސިފް ވިދާޅުވީ ޕާރކުގައި ބަހައްޓާ ތަކެތި ގެންނަމުންދަނީ ރާއްޖެއިން ބޭރުންކަމަށާއި، މީގެތެރެއިން ބައެއް ތަކެތި މިހާރު ލިބިފައިވާ ކަމަށެވެ.
ފޯކައިދޫ ރަށުގެ މެދުތެރޭގެ ސަރަޙަދެއްގައި ހެދުމަށް ހަމަޖެހިފައިވާ ކުޑަކުދިންގެ ޕާރކަކީ 200 ފޫޓް 100 ފޫޓްގެ ޕާކެކެވެ.