"ޕީ.އެސް.އެމް ޢީދުއުފާ 1437" ލ. ފޮނަދޫގައި ފާހަގަކުރުމުގެ ތައްޔާރީތައް މިހާރުވަނީ ފެށިފައެވެ.
މިފަހަރުގެ އަޟްހާ ޢީދު ޕީ.އެސް.އެމްގެ ފަރާތުން ލ. ފޮނަދޫގައި ފާހަގަކުރުމަށް ހަމަޖެހިފައިވުމާއި ގުޅިގެން، ޕީ.އެސް.އެމްގެ އިސްބޭފުޅުންގެ މައްޗަށް އެކުލެވޭ ޓީމަކުން ވަނީ ފޮނަދޫއަށް 3 ދުަވަހުގެ ދަތުރެއްކޮށްފައެވެ.
ޕީ.އެސް.އެމްގެ އެކި ޑިޕާޓްމަންޓްތަކުގެ ވެރިންނާއި، "ޕީ.އެސް.އެމް ޢީދު އުފާ 1437"ގެ ކަވަރޭޖްގައިއިސްކޮށް ހަރަކާތްތެރިވާ ފަރާތްތައް ހިމެނޭހެން ލ. ފޮނަދޫއަށް ކުރި މި ދަތުރަކީ، އެރަށުގައި ޢީދުގެ ހަރަކާތްތައް ވީހާވެސް ކުލަގަދަކޮށް ކުރިއަށް ގެންދިއުމަށްޓަކައި ވާންޖެހޭ ތައްޔާރީތަކާއި ގުޅޭގޮތުން ކަމާގުޅޭ ފަރާތްތަކާއެކު މަޝްވަރާކުރުމަށް ކުރި ދަތުރެކެވެ. އެގޮތުން މި ދަތުރުގައި ޕީ.އެސް.އެމްގެ ޓީމުން ވަނީ ލ. ފޮނަދޫ ކައުންސިލް މެމްބަރުންގެ އިތުރުން، އެރަށުގެ އެކި އިދާރާތަކާއި މުއައްސަސާތަކުގެ ވެރިންނާއެކު މަޝްވަރާ ބައްދަލުވުންތަކެއް ކުރިއަށްގެންގޮސްފައެވެ. img:http://s4.psmnews.mv/images/660x400/14685651813261.jpg|ޢީދު ފާހަގަކުރުމަށް ޕީއެސްއެމްއިން ލ.އަތޮޅު ކައުންސިލާ ބައްދަލުކުރެއްވުން - ފޮޓޯ: ޕީއެސްއެމް
މިބައްދަލުވުންތަކުގައި މިފަހަރުގެ "ޕީ.އެސް.އެމް ޢީދު އުފާ 1437" ކުރިއަށް ގެންދިއުމުގައި ޕީ.އެސް.އެމްގެ މައިގަނޑު ވިސްނުން ހުރިގޮތާއި ގުޅޭގޮތުން ޓީމު މެންބަރުންގެ ފަރާތުން މައުލޫމާތު ހިއްސާކުރިއެވެ. އަދި މި ހަރަކާތް ވިހާވެސް ފުރިހަމަކޮށް ކުރިއަށް ގެންދިއުމުގައި އިދާރީގޮތުން ހަމަޖައްސަންޖެހޭ ކަންތައްތަކާއި ގުޅޭގޮތުންވެސް މަޝްވަރާ ކުރެވިގެން ދިޔައެވެ. ހަމައެހެންމެ ޕީ.އެސް.އެމްގެ ޓީމުން ވަނީ ފޮނަދޫ އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ މެންބަރުންނާއި، މި ހަރަކާތުގެ އެކި ކަންކަމަށް ކަނޑައަޅާފައިތިބި ފޯކަލް ޕޮއިންޓްތަކާވެސް ބައްދަލުކޮށް، ޢީދު ފާހަގަކުރުމަށްޓަކައި ވަމުންދާ ތައްޔާރީތަކާއި ގުޅޭގޮތުން މައުލޫމާތު އޮޅުންފިލުވާފައެވެ.
މިކަމުގައި އެންމެ އިސްކޮށް ހަރަކާތްތެރިވާ އެއް ފަރާތްކަމަށްވާ ޕީ.އެސް.އެމްގެ މެނޭޖަރ ރޭޑިއޯ ޕްރޮފްރާމްސް، ނަސްރުﷲ އިދްރީސް ވިދާޅުވީ، މިމަޝްވަރާތަކުގެ ސަބަބުން "ޕީ.އެސް.އެމް ޢީދު އުފާ 1437" ފާހަގަކުރުމުގެ ކަންތައްތައް ވަރަށް ކުލަގަދަކޮށް ކުރިއަށް ގެންދެވޭނެކަމުގެ ވަރަށް ބޮޑު ޔަޤީންކަމެއް ފޮނަދޫ ރައްޔިތުންގެ ފަރާތުން ލިބިގެންދިޔަ ކަމަށެވެ. މި ބައްދަލުވުންތަކުގައި މަޝްވަރާކުރެވުނު ބައެއް މުހިއްމު ކަންތައްތަކާއި ގުޅޭގޮތުން ވާހަކަދައްކަވަމުން ނަސްރުﷲ ވިދާޅުވީ، ޢީދު ކުޅިވަރުތައް ބޭވުމަށްޓަކައި އެރަށުގެ ވަކި ޚާއްސަ ސަރަޙައްދެއް ކަނޑައަޅާ، ސްޓޭޖު ހެދުމުގެ ކަންތައްތައް ކުރިއަށް ގެންދާނެ ގޮތްތައް މި ބައްދަލުވުންތަކުގެ ތެރެއިން ރޭވިގެންދިޔަ ކަމަށެވެ. އަދި ޢީދު ކުޅިވަރުތަކުގެ ލައިވްކަވަރޭޖް ޕީ.އެސް.އެމްގެ ޓީވީއާއި ރޭޑިއޯ ޗެނަލްތަކުން ގެނެސްދިނުމާއި ގުޅޭގޮތުންވެސް މަޝްވަރާކުރި ކަމަށެވެ. img:http://s4.psmnews.mv/images/660x400/14685663992503.jpg|ޢީދު ފާހަގަކުރުމާބެހޭ މަޝްވަރާތައް ކުރުމަށް ޕީއެސްއެމްއިން ލ.އަތޮޅަށް ކުރި ދަތުރުގެ ތެރެއިން - ފޮޓޯ: ޕީއެސްއެމް
ޕީ.އެސް.އެމްއާއި ވާހަކަދައްކަވަމުން ލ. ފޮނަދޫ ކައުންސިލްގެ ރައީސް އަޙްމަދު ރިޔާޒް ވިދާޅުވީ، ޕީ.އެސް.އެމްއާއި ގުޅިގެން މިފަދަ ބޮޑު ޙަރަކާތެއް ޤައުމީ ފެންވަރެއްގައި ފޮނަދޫގައި ބޭއްވުމަކީ، އެ އަތޮޅުގެ އާދަކާދަތަކާއި، ސަޤާފަތް މުޅި ރާއްޖެއަށް ދައްކާލުމަށް ހުޅުވިގެންދިޔަ ދޮރެއް ކަމަށެވެ. އަދި މިކަމުގެ ސަބަބުން ލ.އަތޮޅު އިތުރަށް ޕްރޮމޯޓް ކުރުމަށް އިތުރު ފުރުސަތެއް ލިބިގެންދާނެ ކަމަށެވެ.
ފޮނަދޫ ކައުންސިލާއި ގުޅިގެން "ޕީ.އެސް.އެމް ޢީދު އުފާ 1437" ގެ ހަރަކާތްތައް ހިންގުމުގައި އެންމެ މުހިއްމު ދައުރެއް އަދާކުރާ އެއް ފަރާތަކީ އެރަށުގެ އަންހެނުންގެ ތަރައްޤީއަށް މަސައްކަތް ކުރާ ކޮމެޓީއެވެ. އެ ކޮމެޓީގެ ރައީސާ ފާތުމަތު ޒައީމާ ވިދާޅުވީ، މިއީ އެރަށަށްވެސް ލިބޭ ބޮޑު ފަޙުރެއް ކަމަށެވެ. މިކަމުގައި އެ ކޮމެޓީގެ ފަރާތުންނާއި، ފޮނަދޫ އަންހެންވެރިންގެ ފަރާތުން ފުރިހަމަ އެހީތެރިކަމާއި އެއްބާރުލުން ފޮނަދޫ ކައުންސިލަށާއި، ޕީ.އެސް.އެމްގެ ޓީމަށް ދެއްވާނެކަމަށް ޒައިމާ ވިދާޅުވިއެވެ.
ފޮނަދޫގައި ޢީދުގެ ފާހަގަކުރުމުގެ ތައްޔާރީތައް ފެށުމުގެ ގޮތުން ޕީ.އެސް.އެމްގެ ޓީމާއެކު މަޝްވަރާ ބައްދަލުވުންތަކެއް ކުރިއަށް ގެންގޮސްފައިވާއިރު، އެކަމަށް ޚާއްސަ އޮފީހެއް އެކުލަވާލާ، އިދާރީގޮތުން ހަމަޖައްސަންޖެހޭ ކަންތައްތައް ހަމަޖެއްސުމުގެ މަސައްކަތް މިހާރު ދަނީ ކުރަމުންނެވެ.