ލ. ފޮނަދޫގައި ޕީ.އެސް.އެމްގެ ފަރާތުން މިއަހަރުގެ އަޟްހާ ޢީދު ކުލަގަދަ ގޮތެއްގައި ފާހަގަކުރުމަށް ނިންމުމާއި ގުޅިގެން، އެކަމުގެ ތައްޔާރީތަކާ ގުޅޭގޮތުން މަޝްވަރާކުރުމަށްޓަކައި ޕީ.އެސް.އެމްގެ ޚާއްސަ ޓީމަކުން ފޮނަދޫ ކައުންސިލާއި ބައްދަލުކޮށްފިއެވެ.
"ޕީ.އެސް.އެމް ޢީދު އުފާ 1437" ލ. ފޮނަދޫގައި ފާހަގަކުރަން ނިންމީ، އެކަމަށް އެދި ޕްރޮޕޯޒަލް ހުށައެޅި ރަށްތަކުގެ ތެރެއިން ފޮނަދޫއިން ހުށައަޅާފައިވާ ޕްރޮޕޯޒަލަށް އެންމެ މަތިން މާކްސް ލިބުންމުންނެވެ. ޕީ.އެސް.އެމް ޢީދު އުފާ 1473 އެވޯޑްކުރިކަމުގެ ފިލާ ޕީ.އެސް.އެމްގެ ފަރާތުން ފޮނަދޫ ކައުންސިލާ ވަނީ ހަވާލުކޮށްފައެވެ. img:http://s4.psmnews.mv/images/660x400/14685663992503.jpg|ޢީދު ފާހަގަކުރުމާބެހޭ މަޝްވަރާތައް ކުރުމަށް ޕީއެސްއެމްއިން ލ.އަތޮޅަށް ކުރާ ދަތުރުގެ ތެރެއިން - ފޮޓޯ: ޕީއެސްއެމް
ޕީ.އެސް.އެމްގެ ފަރާތުން ފޮނަދޫއަށް ކުރި މި ދަތުރަކީ، އެރަށުގައި ޢީދު ފާހަގަކުރުމަށް ކައުންސިލްގެ ފަރާތުން ވަމުންދާ ތައްޔާރީތަކާއިގުޅޭ މަޢުލޫމާތު އޮޅުންފިލުވާ، ދެ ފަރާތުގެ ދެމެދުގައި އޮތް ގުޅުން މިހާރަށްވުރެ ހަރުދަނާކުރުމުގެ މަޤްޞަދުގައި ކުރި ދަތުރެކެވެ. މި ދަތުރުގައި ޕީ.އެސް.އެމްގެ ފަރާތުން ބައިވެރިވި ޓީމުގައި، މިފަހަރުގެ ޢީދު ކަވަރޭޖް ޕީ.އެސް.އެމްގެ ޗެނަލްތަކުން ކަވަރކުރުމުގައި އެންމެ އިސްކޮށް ހަރަކާތްތެރިވާ ފަރާތްތަކާއި، އެކި ޑިޕާޓްމަންޓްތަކުގެ ވެރިންނާއި، އަދި ޢީދު ކަވަރޭޖްގައި އިސްކޮށް ހަރަކާތްތެރިވާ ފަރާތްތައް ހިމެނެއެވެ.
މި ޓީމްގެ ފަރާތުން ފޮނަދޫ ކައުންސިލްގެ މެމްބަރުންނާއި އެކު ބޭއްވި ބައްދަލުވުމުގައި، އަޟްހާ ޢީދާއި ގުޅުވައިގެން ޕީ.އެސް.އެމުން ކުރިއަށްގެންދާ މި ޚާއްސަ ހަރަކާތް ވިހާވެސް ކާމިޔާބުކަމާއެކު ހިންގިދާނެގޮތްތަކާއި ގުޅޭގޮތުން ވަނީ މަޝްވަރާކޮށްފައެވެ. އެގޮތުން ފާއިތުވި އަހަރުތަކުގައި ކުރެވުނު ތަޖުރިބާއަށް ބަލާ، މިފަހަރުގެ ޢީދު ހަރަކާތްތައް އިންތިޒާމްކުރުމުގައި ވިސްނަންޖެހޭ ކަންތައްތަކާއި ގުޅޭގޮތުން ދެ ފަރާތުގެ ދެމެދުގައި ހިޔާލު ބަދަލުކުރެވުނެވެ. އަދި ހަމައެހެންމެ ޢީދު ދުވަހު ކުރިއަށްގެންދާނެ ހަރަކާތްތަކާއި، އެ ހަރަކާތްތައް ކުރިއަށް ގެންދިއުމުގައި ޕީ.އެސް.އެމުން އެކުލަވާލާފައިވާ ގައިޑްލައިންތަކާއި އެއްގޮތްވާގޮތަށް ކަންކަން ރޭވުމާއި ގުޅޭގޮތުންވެސް މަޝްވަރާކުރިއެވެ. img:http://s1.psmnews.mv/images/660x400/14685658658970.jpg|ޢީދު ފާހަގަކުރުމާބެހޭ މަޝްވަރާތައް ކުރުމަށް ޕީއެސްއެމްއިން ލ.އަތޮޅަށް ކުރާ ދަތުރުގެ ތެރެއިން - ފޮޓޯ: ޕީއެސްއެމް
މީގެ އިތުރުން، އާއްމުންގެ ބައިވެރިވުން ވިހާވެސް ބޮޑަށް މި ހަރަކާތައް ހޯދޭނެ ގޮތްތަކާއި، ސަޤާފީ އެކިކަހަލަ ކުޅިވަރުތައް ކުރިއަށްގެންދިއުމުގެ މުހިއްމުކަމާ ބެހޭގޮތުންވެސް މަޝްވަރާކުރިއެވެ. ޕީ.އެސް.އެމްގެ ޓީމުން ފޮނަދޫއަށް މިކުރާ ދަތުރުގައި، އަޟްހާ ޢީދުގެ ހަރަކާތްތަކާއި ގުޅޭ މަޢުލޫމާތު އޮޅުންފިލުވުމުގެ އިތުރުން، އެ ހަރަކާތްތައް ކުރިއަށްގެންދާނެ ތަންތަން ބަލާލުމަށް ވަނީ ހަމަޖެހިފައެވެ. މީގެ އިތުރުން ފޮނަދޫގެ އިސްފަރާތްތަކާއި، އެރަށުގައި ހަރަކާތްތެރިވާ މުއައްސަސާތަކުގެ ވެރިންނާވެސް ބައްދަލުކުރުމަށްވަނީ ހަމަޖެހިފައެވެ. "ޕީ.އެސް.އެމް ޢީދު އުފާ 1437" މި ހަރަކާތަކީ ދިވެހިންގެ މެދުގައި އެކުވެރިކަމާއި އެއްބައިވަންތަކަން އުފައްދާ، ނެތެމުންދާ މުހިއްމު ސަޤަފީ ކުޅިވަރުތަކާއި ހަރަކާތްތައް ދިރުވާ އާލާކުރުމުގެ މަޤްޞަދުގައި ހިންގާ ވަރަށްވެސް މުހިއްމު ހަރަކާތެކެވެ.