ކްރިސްޓިއާނޯ ރޮނާލްޑޯ ޖެހި ދެ ލަނޑާއެކު ސައުދީ ޕްރޯ ލީގުގެ ޗެމްޕިއަންކަން ހޯދުމުގެ ރޭހުން އަލް ނަސްރުން އިތުރު ފިޔަވަޅެއް ކުރިއަށް ޖެހިލައިފިއެވެ. ރޭ ކުޅުނު މެޗުގައި އަލް ހިލާލާ ވާދަކޮށް އަލް ނަސްރު ކުރިހޯދާފައިވަނީ 3-1 ގެ ނަތީޖާއަކުންނެވެ. ރޮނާލްޑޯގެ ފަރާތުން ފެނުނު ދެ ލަނޑުވެސް އޭނާ ޖަހާފައިވަނީ މެޗުގެ ދެވަނަ ހާފުގައެވެ.
ސައުދީ ޕްރޯ ލީގުގެ ޕޮއިންޓް ތާވަލަށް ބަލާއިރު މިވަގުތު އަލް ނަސްރު އޮތީ 54 ޕޮއިންޓާއެކު ތާވަލުގެ ތިންވަނައިގައެވެ. އަލް ނަސްރަށްވުރެ 3 ޕޮއިންޓް އިތުރަށް ހޯދައިގެން އަލް ހިލާލް ދެވަނައިގައި އޮތީ 57 ޕޮއިންޓް ހަމަކޮށްގެންނެވެ. 61 ޕޮއިންޓު ހޯދައިގެން ތާވަލުގެ އެއްވަނައިގައި އޮތީ އަލް އިއްތިހާދެވެ.
މި މެޗުގައި އެންމެ ފުރަތަމަ ލީޑު ނަގާފައިވަނީ އަލް ނަސްރުންނެވެ. ފުރަތަމަ ހާފުގެ އިތުރު ވަގުތުގައި މި ލަނޑު އެ ޓީމަށް ކާމިޔާބުކޮށްދިނީ އަލީ އަލް ހަސަންއެވެ. މި މެޗުގައި އަލް ނަސްރުން ލީޑު ފުޅާކޮށްފައިވަނީ ދެވަނަ ހާފު ފަށައިގެން ދެވަނަ މިނެޓުގައެވެ. ސަޑިއޯ މާނޭގެ އެސިސްޓަކުން މި ލަނޑު ކާމިޔާބުކޮށްދިނީ ރޮނާލްޑޯއެވެ.
ދެޓީމުގެ ފަރާތުންވެސް ފޯރިގަދަ ކުޅުމެއް ފެނިގެންދިޔައިރު، އެންމެ ފަހުގެ ޗެމްޕިއަން އަލް ހިލާލަށް ހަމަޖެހުމުގެ ނޭވާއެއް ލެވުނީ މެޗުގެ 62 ވަނަ މިނެޓުގައި ކޯނަރަކުން އެޓީމުގެ އަލީ އަލް ބުލައިހީ ކާމިޔާބުކޮށްދިން ލަނޑާއެކުގައެވެ. ނަމަވެސް އަލް ހިލާލުގެ ބަދަލު ކުޅުންތެރިޔާ މޫތެބް އަލް ހަރްބީއަށް ހެދުނު ގޯހެއްގެ ސަބަބުން ވީއޭއާރް ބެލުމަށްފަހު އަލް ނަސްރަށް ރެފްރީ ދިން ޕެނަލްޓީއާ ހިސާބުން އަނެއްކާވެސް މެޗުގެ ނަތީޖާ ބަދަލުވެގެންދިޔައެވެ. އެގޮތުން މެޗުގެ 88 ވަނަ މިނިޓުގައި ރޮނާލްޑޯ ވަނީ ޕެނަލްޓީ ކާމިޔާބުކޮށް އަލް ނަސްރަށް ތިން ޕޮއިންޓް ކަށަވަރުކޮށްދީފައެވެ.
މެޗަށްފަހު ނޫސްވެރިންނާ ވާހަކަދައްކަމުން ރޮނާލްޑޯ ބުނީ އޭނާ އަބަދުވެސް މަސައްކަތްކުރަނީ ޓީމާއެކު ކާމިޔާބު ހޯދުމަށް ކަމަށާއި، އެއްވެސް އިރަކު އަމިއްލައަށް ކާމިޔާބު ހޯދުމަށް ވިސްނާފައިނުވާނެ ކަމަށެވެ. ސައުދީ ޕްރޯ ލީގާއި އޭއެފްސީ ޗެމްޕިއަންސް ލީގަކީ ޓީމެއްގެ ގޮތުގައި މަސައްކަތްކޮށްގެން ނޫންގޮތަކަށް ކާމިޔާބު ކުރެވޭނެ މުބާރާތްތަކެއް ނޫންކަމަށްވެސް އޭނާ ފާހަގަކުރިއެވެ. "މިމެޗު ކާމިޔާބު ކުރެވުނީ ޓީމުން ދެއްކި ހިތްވަރުގެ ސަބަބުން. އަހަރެން ލަނޑުޖެހިކަމަށް ވިޔަސް މެޗު ކާމިޔާބު ކުރެވުނީ އެންމެންގެ މަސައްކަތުން" ރޮނާލްޑޯ ބުންޏެވެ.