މާމިގިލީ "ކަނދިލި މިސްކިތް" ތަރިކައިގެ ރަސްމީ ލިސްޓަށް

އދ. މާމިގިލީ ކަނދިލި މިސްކިތް ތަރިކައިގެ ރަސްމީ ލިސްޓުގައި ހިމަނަން ދިވެހިބަހާއި ސަގާފަތާއި ތަރިކައާބެހޭ ވުޒާރާއިން ނިންމައިފިއެވެ.

ދިވެހި ޤައުމިއްޔަތު ޢިއާދަކުރުމުގެ މަސައްކަތަކީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އެންމެ އިސްކަން ދެއްވައިގެން ފަށްޓަވާފައިވާ އެއް މަޝްރޫޢެވެ. އެގޮތުން ތާރިޚީ ބިނާތައް ޙިމާޔަތްކޮށް، ޤައުމިއްޔަތު އާލާކުރުމުގައި ވަރަށް ގިނަ މަސައްކަތްތަކެއް ސަރުކާރުން ދަނީ ކުރަމުންނެވެ.

ރާއްޖޭގެ ރަށްތަކުގައި ހުރި ދުވަސްވީ ތަރިކަ ރައްކާތެރިކޮށް އާސާރީ ބިނާތައް އަންނަ އޮތް ޖީލުތަކަށް ފެންނާނެގޮތަށް ރައްކާތެރިކޮށް ދެމެހެއްޓުމުގެ މަސައްކަތްކައްތާއި އެތަންތަނުގެ ހާލަތު ދެނެގަތުމަށް ދިވެހިބަހާއި ސަގާފަތާއި ތަރިކައާބެހޭ ވުޒާރާއިން ދަނީ އެރަށްރަށް ޒިޔާރަތްކުރަމުންނެވެ.

އދ. މާމިގިލީ ކަނދިލި މިސްކިތް ތަރިކައިގެ ރަސްމީ ލިސްޓުގައި ހިމަނަން ވުޒާރާއިން ނިންމައިފި. މިއީ ވަރަށް މަތީފެންވަރުގެ ރީތި ހިރިގަލުގެ ފަންނީ މަސައްކަތްތަކެއް ފެންނަ މިސްކިތެއް. #ދައުލަތުގެޓީމުhttps://t.co/Z9gRyUIWeM pic.twitter.com/0XqKDICs4n

— Ministry of Dhivehi Language, Culture and Heritage (@MoDLCH) April 3, 2025

މި މިސްކިތް ތަރިކައިގެ ލިސްޓުގައި ހިމެނުމާއި ގުޅޭގޮތުން ދިވެހިބަހާއި ސަގާފަތާއި ތަރިކައާބެހޭ ވަޒީރު އާދަމް ނަޞީރު އިބްރާހީމާއި މާމިގިލީ ކައުންސިލްގެ ރައީސް ޢިމާދު ފާރޫޤު ވަނީ މަޝްވަރާކުރައްވާފައިއެވެ. އަދި މި ބައްދަލުވުމުގައި ކައުންސިލުން ވަނީ ތަރިކައިގެ ލިސްޓުގައި މި މިސްކިތް ހިމެނުމަށް އެދިފައެވެ.

އަދި މިއާ އެކު ‏އދ. މާމިގިލީ ކަނދިލި މިސްކިތް ތަރިކައިގެ ރަސްމީ ލިސްޓުގައި ހިމަނަން އެ ވުޒާރާއިން ވަނީ ނިންމައިފައިއެވެ. އެވުޒާރާއިން ވިދާޅުވީ މިއީ ވަރަށް މަތީފެންވަރުގެ ރީތި ހިރިގަލުގެ ފަންނީ މަސައްކަތްތަކެއް ފެންނަ މިސްކިތެއްކަމަށެވެ. އެގޮތުން މިސްކިތުމުގެ ގަލު ވަޑާމަކީ ފާހަގަކޮށްލެވޭ ތަފާތު މަސައްކަތްތަކެއް ކަމަށާއި މިސްކިތް ބެލެހެއްޓުމުގެ މަސައްކަތް ކައުންސިލުން މިހާތަނަށް ވަރަށް ފުރިހަމައަށްކޮށްފައިވާކަން ދިވެހިބަހާއި ސަގާފަތާއި ތަރިކައާބެހޭ ވުޒާރާއިން ފާހަގަކުރައްވައެވެ.
އަދި މާމިގިއްޔާއި ފެންފުއްޓަކީ ގަލު ވަޑާމުގައި ފާހަގަކޮށްލެވޭ މީހުން ތިބި ރަށްތަކަށްވާއިރު، މިފަދަ މަސައްކަތްތައް ފެންނަ ތަންތަން ހިމާޔަތްކޮށް އަންނަ އޮތް ޖީލުތަކަށް ފޯރުކޮށްދިނުން މުޙިއްމުކަމަށްވެސް އެ ވުޒާރާއިން ވިދާޅުވެއެވެ.

ތަރިކަ ރައްކާތެރިކުރުމުގައި ސަރުކާރުގެ ސިޔާސަތަކީ ތަނުގެ އަސްލުވަންތަކަމާއި ޤުދުރަތީ ރީތިކަމަށް އެއްވެސް އުނިކަމެއް ނާންނާނެ ގޮތަކަށް މާއްދީ ތަރިކައިގެ ދާއިރާ ތަރައްޤީކުރުމެވެ.

ދިވެހިބަހާއި ސަގާފަތާއި ތަރިކައާބެހޭ ވުޒާރާއިން މިހާތަނަށް ހާމަކޮށްފައިވާ މަޢުލޫމާތަށް ބަލާއިރު، ރާއްޖޭގައި 400 އެއްހާ ތަރިކަ އެބަހުއްޓެވެ. އަދި ފަސްޖެހި ވަޅުލެވިފައިވާ ބިމު އަޑީގައި ހުރި ތަރިކަތައް ހިމެނޭހެން ރާއްޖޭގައި ހުރި ތަރިކަތަކުގެ އަދަދު 2000އާ ގާތްކުރާކަމަށް އެ ވުޒާރާއިން ވިދާޅުވެއެވެ.