ބަޣާވާތަކުން ވެރިކަމުން ދުރުކޮށްފައިވާ ސޫރިޔާގެ ކުރީގެ ރައީސް ބައްޝާރް އަލް-އަސަދު ނިސްބަތްވެ ވަޑައިގަންނަވާ އަލް-ޢަލަވިއްޔަތު ނުވަތަ އަލް-ޢަލަވީ ދަރިކޮޅުގެ މީހުންނާ ދެކޮޅަށް ސޫރިޔާގެ ސަލާމަތީ ބާރުތަކުން ހިންގަމުންދާ އަސްކަރީ ހަރަކާތްތަކުގައި މަރައިލާފައިވާ މީހުންގެ އަދަދު 1,000ށް އުފުލިއްޖެއެވެ. މި ކަން ހާމަކޮށްފައި ވަނީ ސޫރިޔާގެ މަސްރަޙު ދިރާސާ ކުރާ ސީރިޔަން އޮބްޒަރވޭޓަރީ ފޯ ހިޔުމަން ރައިޓްސް (އެސްއޯއެޗްއާރު)ންނެވެ.
އަސަދުގެ ސަރުކާރު ވައްޓައިލާފައި ވަނީ ނިރުބަވެރި ޖަމާޢަތެއް ކަމުގައިވާ ހަޔިއަތު ތަޙްރީރް އަލް-ޝާމް (އެޗްޓީއެސު)ންނެވެ. އެ ޖަމާޢަތުގެ ހަނގުރާމަވެރިން ވެރިރަށް ދިމިޝްޤަށް އެރުމާ އެކު، އަސަދު ވަނީ އޭނާގެ ޢާއިލާއާ އެކު ފިއްލަވައިގެން ރަޝިޔާއަށް ވަޑައިގެން އެގައުމުގެ ހިމާޔަތް ހޯއްްދަވާފައެވެ. އަސަދު ވެރިކަމުން ދުރު ކުރުމަށް ފަހު އެޗްޓީއެސުން ވަނީ އެ ޖަމާޢަތުގެ ސަރުކާރެއް އެކުލަވައިލައި، އެ ޖަމާޢަތުގެ ވެރިޔާ އަޙްމަދު އަލް-ޝަރާޢު އެ ސަރުކާރުގެ އިންތިޤާލީ ރައީސް ކަމުގެ މަޤާމަށް އިސްކޮށްފައެވެ.
މި ކަމާ ދެކޮޅަށް އަސަދަށް ވަފާތެރި ހަތިޔާރު އެޅި ޖަމާޢަތްތަކުން ވަނީ ތެދުވެފައެވެ. އަދި، އެޗްޓީއެސްގެ ސިފައިންނަށް އަމާޒުކޮށް ޙަމަލާ ދޭން ފަށާފައެވެ. އެންމެ ފަހުގެ ޙަމަލާތައް އަމާޒު ކޮށްފައި ވަނީ ސޫރިޔާގެ އައްސޭރިފަށުގައި އޮތް އަލް-ލާޒިޤިއްޔާއާއި ޙުއްމުޞް ޕުރޮވިންސުގެ ސަރަޙައްދުތަކަށެވެ. އެއީ، ޢަލަވީ ދަރިކޮޅުގެ އާބާދީ ބޮޑު ސަރަޙައްދުތަކެކެވެ. އަސަދަށް ވަފާތެރި ހަނގުރާމަވެރިން ހުއްޓުވުމުގެ ނަމުގައި އެޗްޓީއެސުން ވަނީ އެ ސަރަޙައްދުތަކަށް ގިނަ އަދަދެއްގެ ސިފައިންނާއި ހަތިޔާރު ފޮނުވާފައެވެ.
އެސްއޯއެޗްއާރުން ބުނީ، މާރިޗު 7ވަނަ ދުވަހުން ފެށިގެން އެޗްޓީއެސްގެ ސިފައިންނާއި އަސަދަށް ވަފާތެރި ހަނގުރާމަވެރިންނާ ދެމެދު ބަދަލު ކުރަމުންދާ ޙަމަލާތަކުގައި މަރުވެފައިވާ ޢާންމުންގެ އަދަދު 745ށް އުފުލިފައިވާ ކަމުގައެވެ. އަދި، އެޗްޓީއެސްގެ ސިފައިންގެ 125 މަރުވެފައިވާ ކަމަށާއި، އަސަދަށް ވަފާތެރި ފައުޖުގެ 148 މީހުން މަރުވެފައިވާ ކަން ވެސް އެ ޖަމުޢިއްޔާއިން ހާމަކުރިއެވެ. ނަމަވެސް، އެސްއޯއެޗްއާރުން ހާމަކޮށްފައިވާ މި އަދަދުތައް ކަށަވަރު ކުރެވޭ ގޮތް ވެފައެއް ނެތެވެ.
ޢަލަވީންނާ ދެކޮޅަށް ޤަތުލުޢާންމެއް ހިންގަމުންދާ ކަމުގައި ތުހުމަތު
އެސްއޯއެޗްއާރުގެ ވެރިޔާ ރާމީ ޢަބްދުއްރަޙްމާން ވިދާޅުވީ، އެޗްޓީއެސްގެ ސިފައިންނާއި އަސަދަށް ވަފާތެރި ފައުޖާ ދެމެދު އެންމެ ނުރައްކާތެރި ޙަމަލާތަކެއް ބަދަލު ކުރަމުން ދަނީ ސޫރިޔާގެ އައްސޭރިފަށުގައި އޮތް ޖަބްލާ އަދި ބާނިޔަސް ސަރަޙައްދުގައި ކަމުގައެވެ. އެއީ، ޢަލަވީ ދަރިކޮޅުގެ އާބާދީ ބޮޑު ސަރަޙައްދުތަކެކެވެ. 13 އަހަރަށް ދެމިގެން ދިޔަ ސޫރިޔާގެ ދާޚިލީ ހަނގުރާމައިގައި ވެސް އެ ސަރަޙައްދުތަކުގައި ލޭއޮހޮރުވުންތައް ހިންގާފައިވެއެވެ. އަދި، ޢަލަވީ ދަރިކޮޅުގެ ގިނަ އަަދަދެއްގެ އަންހެނުންނާއި ކުޑަކުދިން މަރައިލާފައިވެއެވެ.
އެ ސަރަޙައްދުގައި މިހާރު ހިނގަމުންދާ ކުރިމަތިލުންތަކާއި ހަމަނުޖެހުންތައް ކޮންޓުރޯލު ކުރަން ހަރުދަނާ ފިޔަވަޅުތަކެއް އަޅަމުންދާ ކަމުގައި އެޗްޓީއެސްގެ ސަރުކާރުގެ ދިފާޢީ ވުޒާރާއިން ހާމަކުރިއެވެ. މި ގޮތުން، ސޫރިޔާގެ އައްސޭރިފަށުގައި އޮތް ޖަބްލާއާއި ބާނިޔަސް ސަރަޙައްދަށް ދަތުރު ކުރެވެން އޮތް ހުރިހާ މަގުތަކެއް ވަނީ ބަންދު ކޮށްފައެވެ. އަދި، އެ ސަރަޙައްދުތަކުގެ މަގުތަކުގައި ސިފައިން ފޯރިމަރަމުންދާ ކަން ވެސް އެ ވުޒާރާއިން ހާމަކުރިއެވެ. މީގެ އިތުރުން، އަސްކަރިއްޔާގެ އަމުރުތަކާ ދެކޮޅު އަމަލުތަކާއި ކުށްތައް ހިންގާ ސިފައިންނާއި ޢާންމުންގެ މައްސަލަ ބެލުމަށް ޚާއްޞަ ކޮމިޓީއެއް އެކުލަވައިލާފައިވާ ކަމުގައި ވެސް އެ ވުޒާރާއިން ބުންޏެވެ.
ބައެއް ރިޕޯޓުތައް ބުނާ ގޮތުގައި، އެޗްޓީއެސްގެ ސިފައިން ދަނީ ޢަލަވީ ދަރިކޮޅުގެ މީހުންނާ ދެކޮޅަށް ޤަތުލުޢާންމެއް ހިންގަމުންނެވެ. މި ގޮތުން، އެއް އަވަށުގައި ދިރިއުޅޭ އެ ދަރިކޮޅުގެ ހުރިހާ ފިރިހެނުން މަރައިލާފައިވާ ކަމުގައި ވެސް ރިޕޯޓުތައް ބުންޏެވެ. މި ކަން ކަށަވަރު ކުރެވިފައި ނުވާއިރު، އެޗްޓީއެސް ސަރުކާރުގެ ރައީސް ޝަރާޢުގެ ވަޢުދަކީ ސޫރިޔާގައި ދިރިއުޅޭ ހުރިހާ ދަރިކޮޅަކާއި ޤަބީލާއެއްގެ މީހުންގެ ބައިވެރިވުން އޮތް ގުޅިފައިވާ ސަރުކާރެއް އެކުލަވައިލައި، ސޫރިޔާގައި އެއްބައިވަންތަ ކަން ޤާއިމު ކުރުމެވެ. ނަމަވެސް، ސަރުކާރު އެކުލަވައިލުމުގެ މަޝްވަރާތަކަށް ޢަލަވީ ދަރިކޮޅުގެ މީހުންނަށް ދަޢުވަތު އަރުވާފައި ނުވާ ކަން އެ މީހުން ހާމަކުރިއެވެ.