ޚަބަރު

ޣައްޒާ އެއްބަސްވުމުގެ ދެވަނަ މަރުޙަލާއަށް ދާން ޔަހޫދީން ދެކޮޅު ހަދައި، ބިރު ދައްކަން ފަށައިފި


ފަލަސްޠީނުގެ ޣައްޒާގައި ވެރިކަންކުރާ ޙަމާސް ޖަމާޢަތާއި ޔަހޫދީންނާ ދެމެދު ވެފައިވާ ޢުދުވާން ހުއްޓާލުމުގެ އެއްބަސްވުމުގެ ފުރަތަމަ މަރުޙަލާގެ މުއްދަތު އިތުރު ކުރުމަށް ޔަހޫދީން ހުށަހަޅާފައިވާ ހުށަހެޅުމަށް އެއްބަސްނުވެއްޖެނަމަ، "ނަތީޖާ ހިތި"ވާނެ ކަމަށް ބުނެ، ބިރު ދައްކަން ފަށައިފިއެވެ.

15 މަސް ދުވަހަށް ހަނގުރާމަ ދެމިގެން ދިޔުމަށް ފަހު ޖަނަވަރީ މަހުގެ 19ވަނަ ދުވަހު ޔަހޫދީންނާއި ޙަމާސާ ދެމެދު ވަނީ ޢުދުވާން ހުއްޓާލުމުގެ އެއްބަސްވުމެއް ޤާއިމު ކޮށްފައެވެ. އެ އެއްބަސްވުމުގެ ދަށުން ޙަމާސުން ގެންދިޔަ އަސީރުންގެ ބަދަލުގައި ޔަހޫދީންގެ ޖަލުތަކުގައި ތިބި ގިނަ ޢަދަދެއްގެ ފަލަސްޠީނުގެ ރައްޔިތުން މިނިވަން ކުރުމަށް ޔަހޫދީން ވަނީ އެއްބަސްވެފައެވެ.
އެ އެެއްބަސްވުމުގެ ފުރަތަމަ މަރުޙަލާގައި ޔަހޫދީ ޖަލުތަކުގައި ތިބި 2000އެއްހާ ފަލަސްޠީނުގެ ރައްޔިތުންގެ ބަދަލުގައި ޙަމާސުން ވަނީ ޔަހޫދީ ދައުލަތަށް ނިސްބަތްވާ 33 އަސީރުން މިނިވަން ކޮށްފައެވެ.

އެއްބަސްވުމުގެ ފުރަތަމަ މަރުޙަލާ ނިމުމަކަށް އައުމުން ދެވަނަ މަރުޙަލާއަކާ ގުޅޭގޮތުން ގޮތެއް ނިންމުމަަށް މަޝްވަރާ ކުރުމަށް އޮތީ ނިންމާފަައެވެ. ނަމަވެސް ޔަހޫދީން ބޭނުންވީ ދެވަނަ މަރުޙަލާއަކަށް ނުގޮސް ފުރަތަމަ މަރުޙަލާގެ މުއްދަތު އިތުރު ކުރުމަށެވެ.

އެއީ ޔަހޫދީ ނިރުބަވެރި ދަޢުލަތުގެ އެންމެ ބޮޑު މަދަދާރު، އެމެރިކާގެ ރައީސް ޑޮނަލްޑް ޓްރަމްޕްގެ ޙާއްސަ މަންދޫބު، ސްޓީވް ވިޓްކޮފްގެ ހުށަހެޅުއްވުމުކެވެ.

ދެވަނަ މަރުޙަލާއަށް ނުދިޔުމުގެ އިތުރުން، މިއަދުން ފެށިގެން ޣައްޒާއަށް އެހީ ވެއްދުމުގެ ހުރިހާ މަގުތައް ބަންދުކުރާނެ ކަމަށް ވެސް ޔަހޫދީން ވަނީ ބުނެފައެވެ.

ޓްރަމްޕްގެ މެދުއިރުމަތީގެ މަންދޫބު ވިޓްކޮފް ވަނީ، މިހާރު ޙަމާސްގެ ބެލުމުގެ ދަށުގައި ތިބި ދިރިހުރި އަދި މަރުވެފައިވާ އަސީރުންގެ ދެ ބައި ކުޅަ އެއްބައި ޔަހޫދީންނާ މިއަދުން މިއަދަށް ޙަވާލުކޮށް، ދާޢިމީކޮށް ޙަމަލާތައް ހުއްޓައިލުމާ ހަމައަށް ދެވިއްޖެނަމަ، ދެން ތިބި އަސީރުން މިނިވަން ކުރަން ވަނީ ހުށަހަޅުއްވައިފައެވެ.

2023ވަނަ އަހަރުގެ އޮކްޓޯބަރު މަހުގެ 7 ވަނަ ދުވަހު ޔަހޫދީން ވަނީ ޙަމާސް ނައްތާލުމުގެ ނަމުގައި ޣައްޒާއަށް ޢުދުވާނީ ޙަމަލާތައް ދޭން ފަށައިފައެވެ. އެއީ އެ ދުވަހު ޙަމާސްގެ މުޖާހިދުން ޒަޔަނިސްޓުންނަށް އަމާޒު ކޮށް ޖިހާދީ ޙަމަލާތަކެއް ދިނުމާ ގުޅިގެންނެވެ. އެއީ، ޔަހޫދީންގެ އަޅުވެތިކަމާއި އިސްތިޢުމާރީ ވެރިކަމަށް ކެތް ނުކުރެވިގެން ޙަމާސްގެ މުޖާހިދުން ދީފައިވާ ޙަމަލާއެކެވެ. އެ ދުވަހު ޙަމާސުން ވަނީ 250އެއްހާ މީހުން ރަހީނުކޮށްފައެވެ.

މި ހުށަހެޅުންތަކަށް ޙަމާސުން އެއްބަސްނުވެއްޖެނަމަ، ޢުދުވާނުތައް އަލުން ފަށާނެ ކަމުގެ އިންޒާރުވެސް ޔަހޫދީންގެ ނިރުބަވެރި ދަޢުލަތުން ވަނީ ދީފައެވެ.

ނަމަވެސް ޙަމާސުން ބޭނުން ވަނީ ދެވަނަ މަރުޙަލާއާ ގުޅޭ މަޝްވަރާތައް ވީ އެންމެ އަވަހަށް ފަށައި، ދާއިމީ ގޮތަކަށް ހަނގުރާމަ ހުއްޓާލުމުގެ އެއްބަަސްވުމަކާ ހަމައަށް އައުމަށް ކަމަށް އެ ޖަމާޢަތުން ވަނީ ބުނެފައެވެ.

އަދި ޣައްޒާއަށް އެހީ ވެއްދުމުގެ މަގުތައް ބަންދުކުރަނީ، އެއްބަސްވުމެއްގެ ދެވަނަ މަރުޙަލާއަށް ނުގޮސް، ޔަހޫދީން ބޭނުންވާ ގޮތަށް ގަދަބާރުން އެއްބަސްކުރުވަން ކަމަށެވެ.

ޣައްޒާއަށް ކޮންމެހެން ބޭނުންވެފައިވާ އިންސާނީ އެހީތެރިކަން ފޯރުކޮށްދިނުމަށްޓަކައި، ޙަމަލާތައް ހުއްޓައިލުމުގެ އެއްބަސްވުން ދަމަހައްޓަންޖެހޭ ކަމަށް ބައިނަލްއަޤްވާމީ އިންސާނީ ހައްޤުތަކާބެހޭ ޖަމްޢިއްޔާތަކުން ދަނީ ތަކުރާރުކޮށް ބުނަމުންނެވެ.