މި އަހަރު އިތުރު 80 ރެސްކިއު ޑައިވަރުން ތަމްރީނުކުރެވޭނެ: ވަޒީރު ޝިޔާމް

މަސްވެރިކަން ކުރާ ކޮންމެ ދޯންޏެއްގައި ފީނުމުގެ ތަމްރީން ލިބިފައިވާ ފަޅުވެރިއެއް ބެހެއްޓުމަށް ސަރުކާރުން ފަށާފައިވާ މަސައްކަތުގެ ދަށުން މިއަހަރު 80 ޑައިވަރުން ތަމްރީނު ކުރެވޭނެ ކަމަށް މަސްވެރިކަމާއި ކަނޑުގެ ވަސީލަތްތަކާބެހޭ ވަޒީރު އަހުމަދު ޝިޔާމް ވިދާޅުވެއްޖެއެވެ.

ކޮންމެ ދޯންޏެއްގައި ތަމްރީނު ލިބިފައިވާ ރެސްކިއު ޑައިވަރެއް ބެހެއްޓުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދުފުޅެކެވެ.

މަސްވެރިކަން ކުރާ ކޮންމެ ދޯންޏަކުން މަދުވެގެން އެއް ފަޅުވެރިޔަކު "ރެސްކިއު ޑައިވަރ" ފެންވަރުގެ ސަނަދެއް ހާސިލްކޮށްފައިވާ ފަރާތަކަށް ހެދުމަށް މަސްވެރިކަމާއި ކަނޑުގެ ވަސީލަތްތަކާ ބެހޭ މިނިސްޓްރީން ވަނީ ހާއްސަ ޕްރޮގްރާމެއް ފަށާފައެވެ. އެގޮތުން މިމަސައްކަތުގެ ދަށުން މިދިޔަ އަހަރު، 56 ފަޅުވެރިއަކު މި ތަމްރީނު ފުރިހަމަކޮށްފައިވެއެވެ.

މި ޕްރޮގްރާމާއި ގުޅޭގޮތުން އެކްރޮސް މޯލްޑިވްސް ހަރަކާތުގައި ވާހަކަ ދައްކަވަމުން މަސްވެރިކަމާއި ކަނޑުގެ ވަސީލަތްތަކާއި ބެހޭ ވަޒީރު އަހުމަދު ޝިޔާމް ވިދާޅުވީ، މިއަހަރުގެ ބަޖެޓުގައިވެސް މިމަސައްކަތް ކުރުމަށް ހިމަނާފައިވާ ކަމަށެވެ.

"އަޅުގަނޑު މި އުއްމީދު ކުރަނީ އަދި މިއަހަރު ބަޖެޓުވެސް ކޮށްފައި އޮންނާނީ 80 ޑައިވަރުން ތަމްރީނު ކުރުމަށްޓަކައި، އެެހެންނަމަވެސް އެއަށްވުރެ އަދަދު އިތުރުކުރުމަށް މިމަސައްކަތް ކުރަނީ. އަޅުގަނޑު ބޭނުންވަނީ މަދުވެގެން 3 އަހަރު ތެރޭގައި ދިވެހި ރާއްޖޭގެ މަސްވެރި ފްލީޓުގައި މަދުވެގެން އެއް ޑައިވަރެއް ބެހެއްޓުމަށް " ވަޒީރު ޝިޔާމް ވިދާޅުވިއެވެ.

މަސްވެރިކަން ކުރާ ކޮންމެ އުޅަނދެއްގައި ތަމްރީން ލިބިފައިވާ ރެސްކިއު ޑައިވަރަކު ބެހެއްޓުމުގެ ބޭނުމަކީ ތަމްރީނެއް ނެތި ފުޅިއަޅައިގެން ފީނާ ފަރާތްތަކަށް އަޑިއަށް ފީނުމުގެ ސަބަބުން ދިމާވާ އެކިއެކި ހާދިސާތައް މަދުކުރުމެވެ. މީގެ ސަބަބުން ފީނުމުގެ ރައްކާތެރިކަން ކަށަވަރުކުރެވި މިފަދަ ހާދިސާތަކުގައި ފުރާނައަށް ނުރައްކާވާ މިންވަރު މަދުކުރެވޭނެކަމަށް ސަރުކާރުން ވިދާޅުވެއެވެ.

ޕްރޮގްރާމުގެ ތެރެއިން އޯޕަން ވޯޓަރ ޑައިވިން، އެޑްވާންސް ލެވެލް އަދި ފަސްޓް އެއިޑްގެ ކަންކަން ކިޔަވައިދީ، ތަމްރީންކުރުމަށް ވަނީ ހަމަޖެހިފައެވެ. މި ޕްރޮގްރާމް ފުރިހަމަ ކުރާ ފަރާތްތަކަށް ޑައިވްކުރުމުގެ ތެރޭގައާއި އެ ނޫންވެސް ކަނޑުމަތީގައި ހިނގާފާނެ ހާދިސާއެއްގައި ކުއްލި އެހީތެރިކަން ފޯރުކޮށްދިނުމަށް ބޭނުންވާ ހުނަރުތައް ދަސްކޮށްދެވޭނެ އެވެ.

މި ޕްރޮގްރާމްގެ ދަށުން ސަރުކާރުން ޚަރަދުކޮށްގެން ތަމްރީންދެނީ ކޮންމެ ދޯންޏަކުން އެކަކަށެވެ. މި ތަމްރީން ޕްރޮގްރާމްތައް ހިންގަނީ ޑައިވް ކުރުމުގެ ދާއިރާއިން ތަމްރީން ފުރިހަމަކޮށްފައި ތިބި ފަރާތްތަކުގެ އެހީތެރިކަމާއެކުގައެވެ.