ނިމުނު ހަފްތާ: ރައީސްގެ ދަތުރުފުޅާއެކު އުފާވެރި ޚަބަރުތަކެއް ލިބިގެން ދިޔަ ހަފްތާއެއް

މި ނިމުނު ހަފްތާ އަކީވެސް ރާއްޖޭގެ މަސްރަހުގައި މުހިންމު ގިނަ ކަންކަތައްތަކެއް ހިނގައިދިޔަ ހަފްތާއެކެވެ. އެގޮތުން ސިޔާސީ، އިޤްތިޞާދީ، އަދި ޢުމްރާނީ ތަރައްޤީގެ ދާއިރާއިން ފާހަގަކޮށްލެވޭ މުހިންމު ގިނަ ކަންކަން ނިމުނު ހަފްތާގައި ހިނގާފައިވެއެވެ.

ސިޔާސީ ދާއިރާ:

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރައްޔިތުންނާއި ގާތަށް ކުރައްވަމުން ގެންދަވާ ދަތުރުފުޅުގެ ތެރެއިން، ހއ. އަތޮޅުގެ 10 ރަށަކަށް މި ނިމުނު ހަފްތާއިގައިވަނީ ވަޑައިގެންފައެވެ. މި ދަތުރުފުޅުގައި އެރަށުގެ ރައްޔިތުންނާއި ކައުންސިލާއި އަދި އަންހެނުންގެ ތަރައްޤީއަށް މަސައްކަތް ކުރާ ކޮމެޓީއާއި ބައްދަލުކުރައްވާފައިރު ރަށްރަށުގެ ތަރައްޤީއާއި ގުޅޭ ގިނަ ކަންކަން އެމަނިކުފާނު ވަނީ ހާމަކުރައްވާފައެވެ.

މި ދަތުރުފުޅުގެ ތެރެއިން ދެ ރަށެއްގައި ފުލުހުންގެ ޕޯސްޓު ހުޅުއްވައި ދެއްވައި، ފުލުހުންގެ ޚިދުމަތް ދިނުމަށް ބޭނުންވާ އިމާރާތް އެޅުމުގެ ބިންގާ ވަނީ އަޅާފައެވެ. މީގެ އިތުރުން 6 ރަށެއްގައި ބީއެމްއެލްގެ އޭޓީއެމް ޚިދުމަތް ޤާއިމުކުރުމާއި އެއް ރަށުގައި އެމްއައިބީގެ ޚިދުމަތް ފެށުމަށް ރަށު ކައުންސިލްތަކާއެކު އެއްބަސްވުމުގައި ސޮއިކޮށްފައިވެއެވެ.

މި ދަތުރުފުޅުގެ ތެރެއިން 6 ރަށެއްގެ ރަށު ކައުންސިލް އިދާރާގެ އައު އިމާރާތުގެ ބިންގާ ވަނީ އަޅާފައެވެ. މީގެ އިތުރުން އިހަވަންދޫ ހޮސްޕިޓަލު އިމާރާތުގެ މަޝްރޫޢުގައި ސޮއިކުރުމާއި ފިޝަރީޒް ކޮމްޕެލެކްސްގެ ބިންގާ އެޅުމުގެ ރަސްމީއްޔާތުގައި އެމަނިކުފާނު ބައިވެރިވެވަޑައިގެންނެވެ. މީގެ އިތުރުން ދިއްދޫގައި އައިޑީ ކާޑު ދޫކުރުމުގެ ޚިދުމަތާއި، އިހަވަންދޫގައި ޕާސްޕޯޓު އަދި އައިޑީ ޕްރިންޓުކޮށް ދޫކުރުމުގެ ޚިދުމަތް ވަނީ ފަށާފައެވެ.

ކުޅިވަރު ދަނޑުތަކާއި، ދައުލަތުގެ އެހެން ބައެއް އިމާރާތްތައް ހުޅުއްވައި ދެއްވި މި ދަތުފުޅުގެ ތެރެއިން، އެމަނިކުފާނު ވަނީ މޯލްޑިވްސް އިކޮނޮމިކް ގޭޓްވޭގެ މަސައްކަތް މިއަހަރު މެދުތެރޭ ފެށިގެންދާނެ ކަން ހާމަކުރައްވާފައެވެ. އަދި ބޭރުފައިސާގެ ޤާނޫނަށް ރިސޯޓުތަކުން އެއްބާރުލުން ލިބޭކަން ފާހަކޮށް 25 މިލިޔަން ޑޮލަރުގެ ބޭންކުތަކަށް މާރުކޮށްފައިވާކަން ވަނީ ހާމަކުރައްވާފައެވެ.

ރައީސުލްޖުމްހޫރިއްޔާގެ ދަތުރުފުޅުގެ އިތުރުން، ފަތުރުވެރިކަމާއި ބެހޭ ވަޒީރު އިބްރާހީމް ފައިޞަލް މަޤާމުން ވަކިކުރައްވާ އެ ވުޒާރާ ހިންގެވުން ވަގުތީގޮތުން އިޤްތިޞާދީ ވަޒީރު މުޙައްމަދު ސައީދާއި ޙަވާލުކުރެއްވި ޚަބަރަކީވެސް ނިމުނު ހަފްތާގައި ފާހަގަކޮށްލެވުނު މުހިންމު ޚަބަރެކެވެ.

މީގެ އިތުރުން އިލެކްޝަން ކޮމިޝަނަށާއި އެންޓި ކޮރަޕްޝަން ކޮމިޝަނަށް މެންބަރުން މި ނިމުނު ހަފްތާގައި ވަނީ އައްޔަންކުރައްވާފައެވެ.

މާލީ ގޮތުން ކައުންސިލްތައް ބާރުވެރިކުރުމަށްޓަކައި، ފަޅުރަށްތައް ކައުންސިލްތަކާ ހަވާލުކުރެއްވުމުގެ އުސޫލުގެދަށުން ފުރަތަމަ ފަހަރަށް ފަޅުރަށްތައް ރަސްމީކޮށް ހަވާލުކުރައްވައިފިއެވެ. އެގޮތުން 4 ފަޅުރަށެއްވަނީ 3 ކައުންސިލަކާ ހަވާލުކުރައްވާފައެވެ.

ކައުންސިލަތައް ބާރުވެރިކުރުމަށް ކުރާ މަސައްކަތުގައި ރައީސް ޑރ. މުޢިއްޒުގެ އެންމެ ބޮޑު ވިސްނުންފުޅަކީ ކައުންސިލްތައް މާލީގޮތުން ބާރުވެރިކުރުވާ، އަމިއްލަ ފައިމައްޗަށް ތެދުވެ، ރަށުގެ ތަރައްޤީއަށް ގިނަގުނަ މަސައްކަތްތައް ކުރާ ކައުންސިލްތަކަކަށް، އަތޮޅާއި ރަށު އަދި ސިޓީ ކައުންސިލްތައް ހެއްދެވުމެވެ.

އިޤްތިޞާދީ ދާއިރާ:

މި ނިމުނު ހަފްތާގައި އިޤްތީޞާދީ ދާއިރާއިން ފާހަގަކޮށްލެވުނު މުހިންމު ޚަބަރުތަކަށް ބަލާއިރު، މޯލްޑިވިއަންގެ ސީދާ ދަތުރުތައް ބެއިޖިން އަދި ޝަންހާއިއަށްވެސް ފެށީ ނިމުނު ހަފްތާގައެވެ. މި ފްލައިޓުތަކުގައި ގިނަ އަދަދެއްގެ ފަތުރުވެރިން ޗައިނާއިން ރާއްޖެއަށް އަންނަން ފަށާފާއިރު މިއީ ފަތުވެރިކަމަށް ލިބިގެން ދިޔަ ބޮޑު ކުރިއެރުމެކެވެ.

ފަތުރުވެރިކަމުގެ ދާއިރާ ކުރިއަރުމުން އަންނައިރު، މި ޖަނަވަރީ މަހު މިހާތަނަށް 200،000 އަށް ވުރެ ގިނަ ފަތުރުވެރިން ރާއްޖެ ވަނީ އައިސްފައެވެ. މިއީ އެމަހުގެ ރެކޯޑު އަދަދަކެވެ.

އެސްއޯއީތަކުގެ ވެރިން މުސާރަ 90،000 އިން މަތިނުވާ ގޮތަށްވެސް ނިންމީ މި ނިމުނު ހަފްތާގައެވެ. އެގޮތުން ދެ އަހަރު ދުވަހަށް އެސްއޯއީ ތަކުގެ ވެރިންގެ މުސާރަ ވަނީ ލިމިޓް ކުރުމަށް އަންގާފައެވެ.

މީގެ އިތުރުން ބޭންކް އޮފް މޯލްޑިވްސްއިން މިދިޔަ އަހަރު 2.1 ބިލިޔަން ރުފިޔާގެ ސާފު ފައިދާއެއް ހޯދި ހަބަރަކީވެސް ނިމުނު ހަފްތާގައި ވިޔަފާރިއާއި އިޤްތިޞާދުގެ ދައިރާއިން ފާހަގަކުރެވުނު މުހިންމު ހަބަރެކެވެ.

އެހެނިހެން މުހިންމު ޚަބަރުތައް:

މި ނިމުނު ހަފްތާ ތެރޭގައި ރާއްޖޭގެ މަސްރަހުން ފާހަކޮށްލެވުނު އެހެން ޚަބަރުތަކުގެ ތެރޭގައި، ޤައުމީ ޤުރުއާން ކިޔެވުމުގެ މުބާރާތް ދައުލަތުގެ ޚަރަދުގައި ބޭއްވުމަށް ވަނީ ނިންމާފައެވެ.

މާލޭގައި ހިންގި ފިހާރައެއްގެ ގުދަނުގައި ހިންގި އަލިފާނުގެ ހާދިސާއެއްގެ ސަބަބުން 5 ގޭބިސީއެއްގެ 14 ދިވެހިން އަދި 8 ބިދޭސީންނަށް ވަގުތީ ބޯހިޔާވަހިކަން ފޯރުކޮށްދޭން ޖެހުމަކީ މި ނިމުނު ހަފްތާގައި ފާހަކުރެވުނު މުހިންމު ޚަބަރެކެވެ.

މީގެ އިތުރުން ޤަވާއިދާ ޚިލާފަށް އުޅެމުންދާ ބިދޭސީން ހޯދުމަށް އިމިގްރޭޝަނުން ކުރަމުންދާ މަސައްކަތުގެ ތެރެއިން ކ. ހުރާގައި ހިންގުނު އޮޕަރޭޝަނެއްގެ ތެރެއިން 42 ބިދޭސީން އިމިގްރޭޝަންގެ ބެލުމުގެ ދަށަށް ގެންދިޔަ ޚަބަރަކީވެސް ނިމުނު ހަފްތާގައި ފާހަގަކޮށްލެވުނު މުހިންމު ޚަބަރެކެވެ.