ހއ.މާރަންދޫ ފުޓްބޯޅަ ދަނޑުގެ ލައިޓް ޖުހުމާއި، ރޮސްޓްރަމް ހެދުމުގެ އިތުރުން މުޅިން އަލަށް އާ ފުޓްސެލް ދަނޑެއް ހެދުމުގެ މަސައްކަތް ވައުދެވަފާވާގޮތަށް ކުރިއަށް ގެންދަވާނެ ކަމަށް ރައީސުލްޖުމްހޫރިއްޔާ ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ހއ.އޮތަޅަށް ކުރައްވަމުންގެންދަވާ ދަތުރުފުޅުގައި މާރަންދޫ ރައްޔިތުންނާ ބައްދަލުކުރައްވައި ވާހަކަފުޅުދައްކަވަމުންނެވެ. ރައީސުލްޖުމްހޫރިއްޔާ ރިޔާސީ ކެމްޕޭނުގައި އެރަށަށް ވަޑައިގެންވަނީ ދަނޑުގެ ލައިޓް ޖެހުމާއި، ރޮސްޓްރަމް ތަރައްގީކޮށްދެވާނެކަމަށް ވައުދުވެވަޑައިގެންފައެވެ.
މި ދެ މަޝްރޫޢުގެ ޢަމަލީ މަސައްކަތްވެސް ވީހާ އަވަހަކަށް ފަށްޓަވާނެކަމަށް ކުޅިވަރާ ބެހޭ ވުޒާރާއިން ވަނީ މައުލޫމާތު ދެއްވާފައެވެ. އަދި މީގެއިތުރުން ފުޓްސެލް ދަނޑެއް ހެދުމުގެ މަސައްކަތް މި ދައުރުގައި ކުރިއަށްދާނެކަމަށް ކުޅިވަރާބެހޭ ވުޒާރާއިން މައުލޫމާދެއްވައެވެ.