ރައީސުލްޖުމްހޫރިއްޔާ ހއ. އުތީމަށް ވަޑައިގެންފި

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހއ. އުތީމަށް ވަޑައިގަންނަވައިފިއެވެ.

ރައީސުލްޖުމްހޫރިއްޔާއަށް މަރުޚަބާ ދެންނެވުމަށް ރަށުގެ ގިނަ ބަޔަކު ބަނދަރު ސަރަޙައްދަށް ޖަމާވެފައިވެއެވެ. އުތީމަކީ ހއ. އަތޮޅަށް ރައީސުލްޖުމްހޫރިއްޔާ ފައްޓަވާފައިވާ ދަތުރުފުޅުގެ ތެރެއިން ވަޑައިގެންނެވި 3 ވަނަ ރަށެވެ.

މި ދަތުރުފުޅުގައި ރަށު ކައުންސިލާ މުއައްސަސާތަކުގެ އިސްވެރިން އަދި އަންހެނުންގެ ތަރައްޤީއަށް މަސައްކަތްކުރާ ކޮމިޓީއާ ބައްދަލުކުރައްވާނެއެވެ. އަދި ރައީސުލްޖުމްހޫރިއްޔާ އުތީމުގެ ރައްޔިތުންނާ ބައްދަލުކުރައްވާނެއެވެ.

މި ދަތުރުފުޅުގެ ތެރެއިން، އެ ރަށުގެ ކައުންސިލް އިދާރާގެ އައު އޮފީސް އިމާރާތުގެ ބިންގާ އެޅުން ކުރިއަށްދާނެއެވެ. އަދި ރަށުގައި އަޅާ ފުލުހުންގެ މަރުކަޒުގެ ބިންގާ އެޅުންވެސް އޮންނާނެއެވެ. މި ދެ ރަސްމިއްޔާތުގައިވެސް ރައީސުލްޖުމްހޫރިއްޔާ ބައިވެރިވެވަޑައިގަންނަވާނެއެވެ. މީގެއިތުރުން ރަށުގައި އޭޓީއެމްގެ ޚިދުމަތް ފެށުމަށް، އެކަމަށް ބޭނުންވާ އިމާރާތް އެޅުމަށް ކައުންސިލާ ހަވާލުކުރުންވެސް ކުރިއަށްދާނެއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހއ. އަތޮޅަށް ކުރައްވަމުންދާ 3 ދުވަހުގެ ދަތުރުފުޅުގައި އަތޮޅުގެ 11 ރަށަށް ވަޑައިގަތުމަށް ވަނީ ހަމަޖެހިފައެވެ.