ހިންދޫ ދީނުގެ ރޫހާނީ ފަރުވާ ރާއްޖެގައި އިޝްތިހާރުކުރަމުންދިޔަ 3 ބިދޭސީން ހައްޔަރުކޮށްފި

ރާއްޖޭގަ ރޫހާނީ ފަރުވާދޭކަމަށް އިޝްތިހާރުކޮށް އެ މަސައްކަތްކުރަމުންދިޔަ ބިދޭސީންތަކެއް އިމިގްރޭޝަނުން ހިފަހައްޓާ ހައްޔަރުކޮށްފިއެވެ.

ބިދޭސިއަކު ރާއްޖޭގައި ރޫހާނީ ފަރުވާގެ ޚިދުމަތް ދޭކަމަށްބުނެ އިޝްތިހާރުކުރާ މައްސަލައެއް ބަލަމުންދާކަމަށް ފުލުހުން އިއްޔެ ވަނީ ވިދާޅުވެފައެވެ.

އިމިގްރޭޝަނުން އެކްސްގައި ކުރެއްވި ޕޯސްޓެއްގައި ވިދާޅުވީ، ފުލުހުންނާ ގުޅިގެން ކުރިއަށްގެންދިޔަ އޮޕަރެޝަނެއްގައި މި މައްސަލައާ ގުޅުންހުރި 3 ބިދޭސީއަކު ހައްޔަރުކޮށް އިމިގްރޭޝަންގެ ބެލުމުގެ ދަށަށް ގެނެސްފަވާކަމަށެވެ.

ހައްޔަރުކޮށްފަވަނީ އިންޑިއާއަށް ނިސްބަތްވާ 3 ފިރިހެނުންނެވެ. ހައްޔަރުކުރި މީހުންގެ ތެރޭގަ ހިމެނެނީ 39 އަހަރުގެ މީހަކާ 25 އަހަރުގެ މީހެއް އަދި 18 އަހަރުގެ މީހެކެވެ.

މި މީހުން ޑީޕޯޓްކޮށްލުމަށް ކުރަންޖެހޭ މަސައްކަތް އިމިގްރޭޝަނުން ދަނީ ކުރަމުންނެވެ.

ފުލުހުން ވިދާޅުވީ، ބިދޭސީއަކު ރާއްޖޭގައި ރޫހާނީ ފަރުވާގެ ޚިދުމަތްތަކެއް ދޭކަމަށް ބުނެ ސޯޝަލް މީޑިއާގެ މަންސަތަކުގައި އިޝްތިހާރު ކުރަމުންދާ މައްސަލަ ފުލުހުންގެ ސަމާލުކަމަށް އައިސްފަވާކަމަށެވެ. މި މައްސަލައާ ގުޅިގެން، ޤާނޫނީ ގޮތުން އަޅަންޖެހޭ ފިޔަވަޅުތައް އެޅުމަށްޓަކައި ކުރަންޖެހޭ މަސައްކަތްކަމާބެހޭ އިދާރާތަކާ ގުޅިގެން ފުލުހުން މިހާރު ކުރަމުންދާކަމަށް އެ ޚިދުމަތުން ވަނީ ވިދާޅުވެފައެވެ.

މިގޮތަށް ރާއްޖޭގައި އެހެން ދީންތައް އިޝްތިހާރުކުރުމާއި އަދި އެހެން ދީންތަކުގައި އަޅުކަމުގެ ގޮތުން ކުރަމުންދާ ކަންކަން ކުރިއަށްގެންދަން މަސައްކަތްކޮށްފަވާ މައްސަލަތަކެއް މީގެކުރިންވެސް ފުލުހުން ބަލާފައިވެއެވެ.