ހުރިހާ ސްކޫލެއް އޭސީކުރުމުގެ މަޝްރޫޢު ސެޕްޓެމްބަރު މަހަށް ނިންމާނަން: ރައީސް
-
ސްކޫލްތައް އޭސީކުރުމުގެ މަޝްރޫޢު ކުރިއަށް ގެންދިއުމަށް ފަހި ގޮތްތަކެއް ވަނީ ހޯދާފައި
-
ހުޅުދުއްފާރުގައި ދަނާލެއް ތަރައްޤީކުރާނެ
-
ސްކޫލަށް 12 ކްލާސްރޫމް އިތުރުކުރުމުގެ މަޝްރޫޢު ބާރަށް ކުރިއަށްދާނެ
ސްކޫލުތައް ފިނިކުރުމަށް ފަށާފައިވާ މަޝްރޫޢުގެ ދަށުން، އިޢާދަކުރަނިވި ހަކަތައިގެ ނިޒާމު ބޭނުންކޮށްގެން މިއަހަރުގެ ސެޕްޓެމްބަރު މަހުގެ ނިޔަލަށް ރާއްޖޭގެ ހުރިހާ ސްކޫލެއް އޭސީކުރާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ރ.ހުޅުދުއްފާރު ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، ހުޅުދުއްފާރުގެ ތަރައްޤީއަށް ފަށާފައިވާ މަޝްރޫޢުތަކާއި، އެމަނިކުފާނު ވެވަޑައިގެންފައިވާ ވަޢުދުތައް ފުއްދުމާއި އައު މަޝްރޫޢުތައް ފަށައި އެމަސައްކަތްތައް ބާރު ސްޕީޑުގައި މިއަހަރު ކުރިއަށް ގެންދިއުމަކީ ރައްޔިތުންނަށް ދެއްވާނެ ޔަޤީންކަންކަމަށެވެ. އަދި މިދިޔަ ސަރުކާރުގައި ފެށި ހުއްޓިފައިވާ މަޝްރޫޢުތަކެއް އެބަހުރިކަމަށާއި، އެކަންކަމަށް ވެސް ހައްލުތަކެއް ހޯދިފައިވާކަމަށް ރައީސް ވިދާޅުވިއެވެ.
"މިސާލަކަށް މިރަށުގެ ގިރާ ސަރަހައްދު ހިމާޔަތްކުރުމަށް އެމްޓީސީސީއާ ހަވާލުކޮށްފައިވާ މަޝްރޫޢަކީ ބޮޑުހިލަ ސަޕްލައި ކުރުމުގައި ދަތިތަކެއްހުރުމުން ހުއްޓެން ދިމާވިކަމެއް. އެކަމަށް ހައްލެއް ހޯދައިފިން. އެކަމަށް ޝެޑިއުލެއްގެތެރޭން މިރަށްވެސް ހިމެނޭހެން ބޮޑުހިލަ ޖެހުމުގެ މަސައްކަތް ރާއްޖޭގެ ހުރިހާ ރަށެއްގައިވެސް ހިނގައިގަންނާނެ. ބޮޑުހިލަ ސަޕްލައިކުރެވޭނެ ގޮތްތަކެއް ސަރުކާރުގެތެރޭން ވާނީ ކަނޑައަޅާފައި. ހައްލުތަކެއް ހޯދިއްޖެ. މިރަށުގެ ގިރާ ސަރަހައްދުގެ މަސައްކަތާއި ބޮޑުހިލަ ނެތުމުން ކުރިއަށް ނުގޮސްހުރި މަޝްރޫޢުތައް ވަރަށް އަވަހަށް ކުރިއަށްދާނެ. މަޝްރޫޢުތައް މޮބިލައިޒްކުރެވި ވަރަށް އަވަހަށް ފަށައިގަނެވޭނެ". ރައީސުލްޖުމްހޫރިއްޔާ ވިދާޅުވިއެވެ.
ރައީސް ވިދާޅުވީ މިއަހަރުގެ ބަޖެޓުން ހުޅުދުއްފާރުގެ ބަނދަރުގެ މަރާމާތާއެކު ބޭރު ތޮށިވެސް ބޭނުންކުރެވޭގޮތަށް ހަމަޖެއްސެވުމަށް މަސައްކަތްކުރައްވާކަމަށެވެ. އަދި އެރަށުގެ ސްކޫލުގެ ޖާގައިގެ މައްސަލައަށްވެސް ހައްލު ބޭނުންވާކަމަށް ރައީސް ވިދާޅުވިއެވެ. އެގޮތުން ހުޅުދުއްފާރު ސްކޫލަށް ޖާގަ އިތުރުކުރުމަށް ފަށާފައިވާ މަޝްރޫޢު ކުރިއަށް ނުގޮސްއޮތުމުގެ ކަންބޮޑުވުން ފާޅުކުރައްވާ ރައީސް ވިދާޅުވީ، އެރަށު ސްކޫލަށް 12 ކްލާސް ރޫމް އިތުރުކުރުމުގެ މަޝްރޫޢު ކޮންޓްރެކްޓަރަށް ކުރިއަށް ގެންދެވޭނެގޮތް ހަދައި އެ މައްސަލަ ހައްލުކޮށްދެއްވާނެކަމަށެވެެ. އަދި ސްކޫލަށް އޮފީސް ޖާގަ އިތުރުކޮށް އެނޫންވެސް ވަސީލަތްތައް ހޯއްދަވައިދެއްވާނެކަމަށްވެސް ރައީސް ވިދާޅުވިއެވެ.
"އަޅުގަނޑު ގަބޫލުކުރާ ސިޔާސަތަކީ ޢިމާރާތެއްގެ އިތުރުން ޤައުމަށް ތަރައްޤީ ގެނެވޭނީ ޒުވާން ޖީލަށް ތައުލީމާއި ތަރުބިއްޔަތު ދީގެން. އެހެންކަމުން ސްކޫލަށް ވަސީލަތް ހޯދައިދިނުމަކީ ވަށައިޖެހޭ ތަރައްޤީ. ހިތްހަމަ ޖެހޭ މާހައުލެއް ޤާއިމްކުރުމަކީ އޭގެ އުފާވެރިކަން ލިބޭނެކަމެއް. އެހެންކަމުން ސްކޫލަކަށް ބޭނުންވާ އިންފްރާސްޓްރަކްޗާއާއި އެނޫންވެސް ވަސީލަތް ޤާއިމްކޮށް ތަޢުލީމީ ދާއިރާއަށް އަޅުގަނޑު ވަރަށް އިސްކަންދެން އިރާދަކުރެއްވިއްޔާ އެކަންކަންވާނެ". ރައީސުލްޖުމްހޫރިއްޔާ ވިދާޅުވިއެވެ.
ހޫނުގަދަ ރަށްރަށުގައި ސްކޫލްތައް ފިނިކުރެވެންޖެހޭކަމަށާއި، އެކަމަށް މަޝްރޫޢެއް ފަށްޓަވާފައިވާކަން ފާހަގަކުރައްވައި، އެ މަޝްރޫޢަށް ރައީސް އަލިއަޅުއްވާލެއްވިއެވެ. އެގޮތުން އެ މަޝްރޫޢު ހިންގާނީ އިއާދަކުރަނިވި ހަކަތައިންކަން ފާހަގަކުރައްވަމުން ރައީސް ވިދާޅުވީ އެމަޝްރޫޢަށް ރަނގަޅު ކުރިއެރުމެއް ލިބިފައިވާކަމަށާއި، މިއަހަރުތެރޭގައި ހުޅުދުއްފާރު ހިމެނޭހެން ރާއްޖޭގެ ހުރިހާ ރަށެއްގެ ސްކޫލްތައް އިއާދަކުރަނިވި ހަކަތަ ބޭނުންކޮށްގެން އޭސީ ކުރައްވާނެކަމަށެވެ. އަދި މަސައްކަތްކުރައްވަނީ ސެޕްޓެމްބަރު މަހުގެ ކުރިން އެ މަޝްރޫޢު ނިންމެވުމަށްކަމަށް ރައީސް ވިދާޅުވިއެވެ.
ފީފާ ފެންވަރުގެ ފުޓުބޯޅަ ދަނޑެއް އެޅުމަށް ވަޢުދުވެފައިވާކަން ފާހަގަކުރައްވާ ރައީސް ވިދާޅުވީ އާރުޑީސީއާއި އެނޫންވެސް ކުންފުނިތަކާއެކު މަސައްކަތްކޮށް އެ ވަޢުދުވެސް ފުއްދަވާނެކަމަށެވެ. އަދި އިންޑޯ އަދި އައުޓްޑޯ ކުޅިވަރު މަރުކަޒެއް އެޅުމަށްވެސް ވަޢުދުވެފައިވާކަމަށާއި، އަންނަ އަހަރު އެ ވަޢުދުވެސް ފުއްދަވާނެކަމަށް ރައީސް ވިދާޅުވިއެވެ.
ރައީސް ވިދާޅުވީ އެމަނިކުފާނު ވެވަޑައިގެންފައިވާ އެއްވެސް ވަޢުދެއް ހަނދާން ނުނެތޭކަމަށެވެ. އެގޮތުން އެރަށުގައި ދަނާލެއް އެޅުމަށްވެސް ވައުދުވެފައިވާކަމަށާއި، ސަބަބަކީ އެރަށަކީ ރަށުން ބޭރުން ގިނަ ޢަދަދެއްގެ ކުދިން ތަޢުލީމު އުނގެނެމުން އަންނަ ރަށަކަށްވުންކަމަށް ވިދާޅުވިއެވެ. ރައީސް ވިދާޅުވީ ދެ އަހަރު ދުވަހުގެތެރޭގައި އެ މަޝްރޫޢުވެސް ކުރިއަށްގެންދަވާނެކަމަށެވެ.
ރައްޔިތުންގެ އުންމީދާ ގުޅިފައިވާ ހުރިހާކަމެއްވެސް ކުރިއަށްދާނެކަމުގެ ޔަޤީންކަންދެއްވަމުން ރައީސް ވިދާޅުވީ ރައްޔިތުންނަށް ކަންކަން ފަހިވާނެގޮތްތައް ހޯދައިގެން ކުރިއަށްދާކަމަށެވެ. އަބަދުވެސް މަސައްކަތްކުރައްވާނީ ރައްޔިތުންގެ އުންމީދުތައް ހާސިލްކޮށް އެ އަމާޒަށް ވާސިލްވުމަށްކަމަށްވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.