މާލޭގެ އިރުދެކުނު ފަރާތުގައި ސަރުކާރުން ތަރައްޤީކުރައްވާ އިންޑަސްޓްރިއަލް ވިލެޖްގެ ބިންހިއްކެވުގެ މަސައްކަތް މިއަދު ފައްޓަވައިފިއެވެ.
އިންޑަސްޓްރިއަލް ވިލެޖް ހެއްދެވުމަށް ބޭނުންވާ ބިން ތައްޔާރުކުރުމަށްޓަކައި، ޓީޖެޓީ ސަރަޙައްދުން ފެށިގެން މޭރީބްރައުން ހުރި ހިސާބަށް، އެ ސަރަޙައްދުގެ ފަޅުތެރެއިން ގާތްގަނޑަކަށް 4.5 ހެކްޓަރުގެ ބިން ހިއްކެވުމަށް ހަމަޖެހިފައިވާކަމަށް ހައުސިންގ މިނިސްޓްރީން ހާމަކުރައްވައެވެ. އަދި ބިންހިއްކެވުމުގެ މަސައްކަތާއެކު އެސަރަޙައްދުގެ ބޭރު ތޮށީގައި ހިލަޖެހުމުގެ މަސައްކަތްވެސް ފައްޓަވާނެކަމަށް ހައުސިންގ މިނިސްޓްރީން މަޢުލޫމާތު ވިދާޅުވެއެވެ.
އިސްޑަސްޓްރިއަލް ވިލެޖްގެ ބިން ހިއްކަވާ ސަރަޙައްދުގެ ތޮށިގަނޑު ކުރިން އޮތްވަރަށްވުރެ ބޭރަށް ޖައްސަވާ، އޮޑިދޯނިފަހަރު ވަދެނިކުމެ އުޅުމަށް ނެރެއްކަނޑުއްވާ، އެ ނެރު މިހާރު ވަނީ ހުޅުވާލައްވާފައެވެ.
ހައުސިންގ މިނިސްޓްރީން ވިދާޅުވީ، ބިން ހިއްކެވުމުގެ މަސައްކަތް މިއަދުން ފެށިގެން، މިއަންނަ ޖުލައި މަހުގެ 3 ވަނަ ދުވަހުގެ ނިޔަލަށް ކުރިއަށް ގެންދެވުމަށް ހަމަޖެހިފައިވާކަމަށެވެ. އަދި މި މަސައްކަތަށް ބޭނުންވާ ހޮޅިލައިން އެޅުމުގެ މަސައްކަތް މިހާރުވެސް ބާރު ސްޕީޑުގައި ކުރިއަށްގެންދަވާކަމަށާއި، ހޮޅިލައިން އޮންނަ ސަރަޙައްދުގައި ކަނޑުދަތުރުކުރާ އުޅަނދުފަހަރުގެ ސަމާލުކަމަށްޓަކައި، ސަލާމަތީ ނިޝާންތައް ހަރުކުރެވިފައި ހުންނާނެކަމަށެވެ. އެހެންކަމުން މި މަސައްކަތް ކުރިއަށްދާ ވަގުތު ދިމާވެދާނެ ނުރައްކާތެރި ޙާދިސާއަކުން ސަލާމަތް ވުމަށްޓަކައި، އެ ސަރަޙައްދުން ދަތުރުކުރާ ފަރާތްތަކުން މިކަމަށް ސަމާލުވުމަށް އެ މިނިސްޓްރީން ވަނީ އިލްތިމާސްކުރައްވާފައެވެ.
img:http://s1.psmnews.mv/images/660x400/14666885500915.jpg|މާލޭގެ ދެކުނު ފަރާތުގައި އިންޑަސްޓްރިއަލް ވިލެޖް ތަރައްޤީކުރުމުގެ މަސައްކަތުގެ ތެރެއިން / ފޮޓޯ: ހައުސިންގ
މީގެ އިތުރުން، މާލޭ ދެކުނު ކޮޅުގައި އަލަށް ކަނޑާފައިވާ ނެރުގެ ފައިކަށި ޖެހުމުގެ މަސައްކަތް މިހާރުވެސް ކުރިއަށްދާތީ، ސްޓެލްކޯއަށް ތެޔޮ ގެންދާ ބާޖާއި، ކުނި އުކާލާ ދޯނިތައް ފިޔަވައި، އެހެން އުޅަނދުތައް އެ ނެރުން ވަދެ ނުކުތުމަކީ ނުރައްކާތެރި ޙާދިސާއެއް ހިނގާފާނެ ކަމަކަށް ވާތީ، އެ ނެރު ބޭނުން ނުކުރެއްވުމަށްވެސް ހައުސިންގ މިނިސްޓްރީން ވަނީ އިލްތިމާސްކުރައްވާފައެވެ.
އިންޑަސްޓްރިއަލް ވިލެޖްގެ މަޝްރޫޢަކީ ގާތްގަނޑަކަށް 160 މިލިއަން ރުފިޔާއަށް އެމް.ޓީ.ސީ.ސީއަށް ޙަވާލުކުރައްވައިގެން ސަރުކާރުން ކުރިއަށްގެންދަވާ މަޝްރޫޢެކެވެ. ސަރުކާރުގެ އަމާޒަކީ މިއަހަރުގެ ޖުލައި 26ގެ ނިޔަލަށް އިންޑަސްޓްރިއަލް ވިލެޖްގެ މަސައްކަތް ނިންމެވުމެވެ. މި މަޝްރޫޢުގެ ދަށުން މާލޭގެ ކުނި މެނޭޖްކުރުމުގެ މަސައްކަތާއި، މާލެތެރޭގައި ހުރިއެކި ކަހަލަ ކެމިކަލް ގުދަންތަކާއި، ވޯކްޝޮޕް، ގަރާޖްފަދަ ތަންތަން ބަދަލުކުރުމަށް ހަމަޖެހިފައިވެއެވެ. މިއާއެކު މާލޭގެ ތޮށްޖެހުން ކުޑަވެ، މާލޭގެ ވެއްޓަށް ހެޔޮބަދަލެއް ގެނެވޭނެކަމަށް ސަރުކާރުން ދެކެވަޑައިގަންނަވައެވެ.