ސޫދާންގެ އަސްކަރިއްޔާއާ ދެކޮޅަށް ހަނގުރާމަ ކުރަމުންދާ ރެޕިޑް ސަޕޯޓް ފޯސަސް (އާރްއެސްއެފު)ން އަތްގަދަ ކޮށްފައިވާ ވައްދު މަދަނީ މިނިވަން ކޮށްފިއެވެ. އެއީ، ސޫދާންގެ މެދުތެރޭގައި އޮތް ރަށެކެވެ. މިއީ، އާރްއެސްއެފާ ދެކޮޅަށް އެ ޤައުމުގެ އަސްކަރިއްޔާއިން ކުރަމުންދާ ހަނގުރާމައިގައި ފާއިތުވި ދެ އަހަރު ދުވަހުގެ ތެރޭގައި ހޯދާފައިވާ އެންމެ ބޮޑު ކާމިޔާބީއެވެ.
ސޫދާންގައި އަހުލީހަނގުރާމައެއް ފެށިގެން ދިޔައީ، އާރްއެސްއެފްގެ ވެރިޔާ ޖެނެރަލް މުޙައްމަދު ހަމްދާން ދަގަލޯއާއި އަސްކަރިއްޔާގެ ޖެނެރަލް ޢަބްދުލް ފައްތާޙް އަލް-ބުރްހާނާ ދެމެދު ޚިޔާލު ތަފާތުވުންތަކެއް އުފެދި، އާރްއެސްއެފްގެ ފައުޖުތަކުން ވެރިރަށް ޚަރްތޫމަށް އަރައި އެ ރަށް ހިފުމަށް މަސައްކަތް ފެށުމާ އެކުގައެވެ. އާރްއެސްއެފްގެ ފައުޖުން ޚަރްތޫމަށް އަރައިގަނެފައި ވަނީ 2023ވަނަ އަހަރުގެ އޭޕްރިލް މަހުގެ 15ވަނަ ދުވަހުއެވެ.
ހަނގުރާމައިގެ ތެރެއިން އާރްއެސްއެފްގެ ފައުޖުތަކުން ވަނީ ސޫދާންގެ ބައެއް ސަރަޙައްދުތަކަށް އަތްގަދަ ކޮށްފައެވެ. ނަމަވެސް، އެ މީހުންނާ ދެކޮޅަށް ހަނގުރާމަ ކުރަމުންދާ އަސްކަރިއްޔާގެ ފައުޖުތަކުން މި ވަނީ އަލް-ޖަޛީރާ ސްޓޭޓްގެ ވެރިރަށް، ވައްދު މަދަނީ މިނިވަން ކޮށްފައެވެ. ދަނޑުވެރިކަމާއި ވިޔަފާރީގެ މައި މަރުކަޒެއްގެ ގޮތުގައި ބެލެވޭ ވައްދު މަދަނީއަށް އާރްއެސްއެފްގެ ފައުޖުން އަތްގަދަ ކޮށްފައި ވަނީ 2023ވަނަ އަހަރުގެ ޑިސެންބަރު މަހުއެވެ.
މަސްރަޙު ދިރާސާ ކުރާ ފަރާތްތަކުން ބުނީ، ބުރްހާންގެ އަސްކަރިއްޔާގެ ސިފައިން ވައްދު މަދަނީ މިނިވަން ކުރުމަކީ، ސޫދާންގެ އަހުލީހަނގުރާމައިގެ އޮއިވަރު ބަދަލުވެގެންދާނެ ފަދަ ކާމިޔާބީއެއް ކަމަށް ބެލެވޭ ކަމުގައެވެ. ސޫދާންގެ އަހުލީހަނގުރާމައާ ގުޅިގެން އެ ޤައުމަށް ވަނީ އިންސާނީ މުސީބާތެއް ކުރިމަތިވެފައެވެ. އަދި، 12 މިލިޔަނެއްހާ މީހުންގެ ގެދޮރު ނެތިފައިވާއިރު، އެ ޤައުމުގެ އާބާދީގެ ދެބައިކުޅަ އެއްބައި މީހުންނަށް ހައިހޫނުގައި ޖެހުމުގެ ނުރައްކަލާ ކުރިމަތިލާން ޖެހިފައިވާ ކަމުގައި ބައިނަލްއަޤުވާމީ އިދާރާތަކުން ވަނީ އިންޒާރު ކޮށްފައެވެ.
"އެ މީހުން [ވައްދު މަދަނީ މިނިވަން ކޮށްފައިވާ ސިފައިން] މިހާރު ދަނީ އެ ރަށުގައި ތިބި އިދިކޮޅު ހަނގުރާމަވެރިން ފަހަތަށް ޖައްސައި، ސާފު ކުރުމުގެ މަސައްކަތް ކުރަމުން،" ސޫދާންގެ އަސްކަރިއްޔާއިން ނެރުނު ބަޔާނެއްގައި ބުންޏެވެ. އެ ރަށަށް އަސްކަރިއްޔާގެ ސިފައިން އަރައި، އާރްއެސްއެފްގެ ފައުޖުތައް ފަހަތަށް ޖައްސާފައިވާ ކަން އާރްއެސްއެފްގެ ދަގަލޯ ވެސް ވަނީ ކަށަވަރު ކޮށްދީފައެވެ.
"އަޅުގަނޑުމެންނަށް ވައްދު މަދަނީ ގެއްލިއްޖެ، ނަމަވެސް އަލުން އެ ރަށް ހިފާނަން. މީހުން [އާރްއެސްއެފްގެ ފައުޖުން] ޖެހޭނީ އަލުން ރުކުރުވައިލަން،" ދަގަލޯ ބުންޏެވެ. އޭނާ ބުނީ، އާރްއެސްއެފްގެ ސިފައިން ފަހަތަށް ޖެހެން ފަށާފައި ވަނީ، އީރާނުން ފޯރުކޮށްދީފައިވާ ނުރައްކާތެރި އަސްކަރީ ޑްރޯންތަކެއް ބޭނުންކޮށް، ސޫދާންގެ އަސްކަރިއްޔާއިން ޙަމަލާ ދޭން ފެށުމުން ކަމުގައެވެ. އަދި، ސޫދާންގެ އަސްކަރިއްޔާއަށް އިތިއޯޕިޔާގެ ތުގްރައި ސަރަޙައްދުގެ ހަތިޔާރުއެޅި ޖަމާޢަތްތަކުން އެހީތެރިކަން ފޯރުކޮށްދެމުންދާ ކަމުގައެވެ.
ހުޅަނގުގެ މީޑިޔާތަކުން ބުނީ، އާރްއެސްއެފްގެ ފައުޖުތަކަށް ބޭނުންވާ ހަތިޔާރާއި އަސްކަރީ އެހީތެރިކަން ފޯރުކޮށްދިނުމަށް އެކުވެރި ޢަރަބި ޢިމާރާތް (ޔޫއޭއީ)ން މަސައްކަތް ކުރަމުންދާ ކަމުގައެވެ. މި ގޮތުން، ޔޫއޭއީގެ މަތިންދާބޯޓުތަކެއް ޗޭޑަށް ދަތުރު ކޮށްފައިވާ ކަމަށާއި، އެއީ އާރްއެސްއެފްގެ ފައުޖުތަކަށް ބޭނުންވާ ސާމާނު ފޯރުކޮށްދިނުމަށް ދަތުރު ކޮށްފައިވާ އުޅަނދުތަކެއް ކަމުގައި ހުޅަނގުގެ މީޑިޔާތަކުން ތުހުމަތު ކުރެއެވެ. ޔޫއޭއީން ވަނީ މި ތުހުމަތުތައް ދޮގު ކޮށްފައެވެ.
ސޫދާންގެ އަސްކަރިއްޔާއިން ބުނީ، އަލް-ޖަޛީރާ ސްޓޭޓަށް އަތްގަދަ ކޮށްފައިވާ އާރްއެސްއެފްގެ ސިފައިން އެ ސަރަޙައްދުގައި ދިރިއުޅޭ ޢާންމު ރައްޔިތުންނާ ދެކޮޅަށް ލާއިންސާނީ ޖަރީމާތައް ހިންގާފައިވާ ކަމުގައެވެ. މި ގޮތުން، ޢާންމުންނަށް ޙަމަލާ ދިނުމާއި ޢާންމުން މެރުމުގެ އިތުރުން، އެ މީހުންގެ ދަނޑުބިންތަކުގައި ހުޅުޖެހުމާއި، ހަސްފަތާލުތަކާއި މާރުކޭޓުތައް ލޫޓުވުން ފަދަ އަނިޔާވެރި އަމަލުތައް ހިންގާފައިވާ ކަމުގައި އަސްކަރިއްޔާއިން ބުންޏެވެ.
އަލް-ޖަޛީރާގެ ވެރިރަށް ވައްދު މަދަނީ މިނިވަން ކުރުމުގެ ކުރިން ސޫދާންގެ އަސްކަރިއްޔާއިން ވަނީ އާރްއެސްއެފުން ވެރިވެގަނެފައިވާ އެހެން ސަރަޙައްދެއް ކަމުގައިވާ ސަނާރު ސްޓޭޓްގެ ގިނަ ރަށްތަކެއް ވެސް މިނިވަން ކޮށްފައެވެ. އެއީ، ސޫދާންގެ ދެކުނުގައި އޮތް ސްޓޭޓެކެވެ. އެ ސްޓޭޓަށް އަތްގަދަ ކޮށްފައިވާ އާރްއެސްއެފްގެ ގިނަ އަދަދެއްގެ ސިފައިންނާއި ކޮމާންޑަރުން ވަނީ އަސްކަރިއްޔާގެ ފައުޖުތަކާ ގުޅިފައެވެ. ވައްދު މަދަނީ ހިފުމަށް އަސްކަރިއްޔާއިން ހިންގި އޮޕަރޭޝަނުގައި އެ ފައުޖުތަކުން ވެސް ބައިވެރިވިއެވެ.