މިފްކޯގެ ކޮރަޕްޝަންތައް މުލުން ލުހެލާނަން، މަސްވެރިން ބޭނުންވާ ބަދަލުތައް ފެންނާނެ: ރައީސް
-
ވަޢުދުވި ގޮތަށް 48 ގަޑިއިރު ތެރޭ ފައިސާ ދިނުން ކުރިއަށްދާނެ
-
މިފްކޯއިން ކުރެވޭ ބޭކާރު ޚަރަދުތައް ކުޑަކުރެވޭނެ ކަމަށް ރައީސް ވިދާޅުވި
މިފްކޯގެ ކޮރަޕްޝަންތައް މުލުން ލުހެލާނެ ކަމަށާއި މަސްވެރިން ބޭނުންވާ ބަދަލުތައް މިފްކޯއިން ފެންނާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވެފައިވަނީ ހުވަދުއަތޮޅަށް، އެމަނިކުފާނު ކުރެއްވި ދަތުރުފުޅު ނިންމަވާލައްވާ މީޑިއާތަކަށް ދެއްވި ބަސްތީގަތުމެއްގައެވެ.
ރައީސުލްޖުމްހޫރިއްޔާ ވަނީ މަސްވެރިކަމުގެ ސިނާއަތް ކުރިއެރުވުމަށް ގިނަ މަސައްކަތް ކުރައްވަމުން ގެންދަވާކަން ފާހަގަކުރައްވާފައެވެ. އެގޮތުން މި ސިނާޢަތަކީ އެންމެ ބޮޑު އާމްދަނީއެއް ލިބޭ ސިނާޢަތަށް ހެދޭނެކަމަށް ޤަބޫލުކުރައްވާކަމަށް ވިދާޅުވިއެވެ. އަދި ފަތުރުވެރިކަން ކުރިއެރުވުމަށް ކުރާ މަސައްކަތް ނުހުއްޓި ކުރިއަށްދާނެކަން ފާހަގަކުރައްވާ އެމަނިކުފާނު ވިދާޅުވީ މަސްވެރިކަންވެސް ކުރިއެރުވައި ސިންދާފާތު ކުރާނެ ކަމަށެވެ.
ރައީސް ވިދާޅުވީ، މަސްވެރިކަމުގެ ސިނާއަތުގައި މިހާރު އެންމެ ބޮޑު އިސްކަމެއްދެއްވަނީ، މަސްވެރިންގެ ކަންބޮޑުވުންތައް ހައްލުކޮށްދިނުމަށް ކަމަށެވެ. އެގޮތުން 48 ގަޑިއިރުތެރޭ މަސްވެރިންނަށް ފައިސާ ޖަމާކޮށްދިނުމަށްވީ، ވަޢުދު ފުއްދަވަމުން ގެންދަވާކަން ފާހަގަކުރައްވާ އެމަނިކުފާނު ވަނީ އެ މަސައްކަތްވެސް ނުހުއްޓި ކުރިއަށްދާނެ ކަމުގެ ޔަޤީންކަން ދެއްވާފައެވެ. އަދި މަސްވެރިންނަށް ހެޔޮއަގުގައި ތެޔޮ ފޯރުކޮށްދިނުމުގެ މަސައްކަތްވެސް ރޭވިފައިވާ ގޮތަށް ކުރިއަށްދާނެކަން ރައީސުލްޖުމްހޫރިއްޔާ ފާހަގަކުރެއްވިއެވެ.
މަސްވެރިކަމުގެ ސިނާޢަތް ކުރިއަރުވައި ތަރައްޤީކުރުމަށް ކުރެވޭ މަސައްކަތައް އަލިއަޅުވާލައްވަމުން އެމަނިކުފާނު ވަނީ ސަރުކާރުން މިފްކޯއަށް ގިނަ ބަދަލުތަކެއް ގެންނަމުންދާކަން ފާހަގަކުރައްވާފައެވެ. އެގޮތުން މިފްކޯގައި ތެރޭގައި ހުރި ޒަމާންވީ މައްސަލަތައް ހައްލުކޮށް، މަސްވެރިން ބޭނުންވާގޮތަށް މިފްކޯގެ ހިންގުން ހަރުދަނާ ކުރުމުގެ މަސައްކަތްކުރަމުންދާ ކަމަށް އެމަނިކުފާނު ވިދާޅުވިއެެވެ.
"އަޅުގަނޑު ޤަބޫލުކުރަނީ ކޮރަޕްޝަންގެ ޢަމަލުތަކެއް ގޮތުގައި ފެންނަ ކަންތައްތަކޭ. އަޅުގަނޑުމެން ހުރިހާ ކަމެއް އެތަނުން މުލުން ލުހެލާނަން. އެތަނާއި އެހުރީ އަޅުގަނޑުމެންގެ ސަރަހައްދުގައި ނޫޅޭ ބޭފުޅަކާއި އެކަން ހަވާލުކޮށްފައި. ތަނުގެ ހިނގުން އަޅުގަނޑުމެން ސީދާ ވަރަށް ގާތުން ރިފޯމް ތެރޭގައި މިކުރިއަށްގެންދަނީ. މިފްކޯ ހަރުދަނާ ކުރެވި އެދާ ވެސްޓޭޖް ހަރުދަނާ ކުރެވި މަސްވެރިން ބޭނުންވާ ގޮތަށް އެތަން ހަރުދަނާ ކުރުމުގެ މަސައްކަތް އޮތީ ފެށިފައި." ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާ، ވިދާޅުވީ މިފްކޯގެ ހިންގުން ހަރުދަނާ ކުރުމަށް، ކުންފުނީގެ ސީ.އީ.އޯގެ މަޤާމަށް ބޭރުގެ ފަރާތެއް ގެނެސް މަސައްކަތް ފަށާފައިވާއިރު، މިހާރު ކުރެވޭ މަސައްކަތުން މިފްކޯތެރެއިން ކުރެވޭ ބޭކާރު ޚަރަދުތައް ކުޑަކުރެވޭނެ ކަމަށެވެ.
ސަރުކާރުން މަސްވެރިކަމުގެ ސިނާއަތް ތަރައްޤީކުރުމުގެ މުހިންމު މަޝްރޫޢަތަކެއް ވަނީ ފަށާފައެވެ. މިގޮތުން ކޯލްޑް ސްޓޯރޭޖްތަކާއި ޕްރޮސެސިންގ ޕްލާންޓުތަކުގެ މަސައްކަތް ފެށިފައިވާކަން ފާހަގަކުރައްވާ އެކަންކަން ކުރިއަށްދާނެ ކަމުގެ ޔަޤީންކަން އެމަނިކުފާނު ވަނީ ދެއްވާފައެވެ.
އަދި މިކުރެވޭ މަސައްކަތްތަކާއިއެކު މަސްވެރިކަމުގެ ސިނާޢަތުން ލިބޭ ނަފާ އިތުރުވެ، މިކަމުގެ ހެޔޮ އަސަރު ޤައުމުގެ އިޤްތިސާދަށްވެސް ކުރާނެކަން ރައީސް ފާހަގަކުރެއްވިއެވެ.