މިއަހަރުގެ ބަޖެޓުން ދެއްވަދޫ ބަނދަރާއި ރަށްގިރުމުގެ މައްސަލަ ހައްލުކުރަނީ

މިއަހަރުގެ ބަޖެޓުގެ ތެރެއިން ގއ. ދެއްވަދޫގެ ބަނދަރާއި، ރަށްގިރުމުގެ މައްސަލައާއި، ކުނި މެނޭޖްކުރުމުގެ މައްސަލައަށް ވަށާޖެހޭ ހައްލެއް ގެނެސްދެއްވާނެކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ މިހެން ވިދާޅުވީ ހުވަދު އަތޮޅަށް ކުރައްވަމުންގެންދަވާ ދަތުރުފުޅުގެ ތެރެއިން ދެއްވާދޫ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވީ ދެއްވަދޫގެ ރައްޔިތުންގެ އުއްމީދުތަކާއި ގުޅިފައިވާ ކަންކަމަށް ޚާއްސަ އިސްކަމެއް ދެއްވައިގެން ރަށުގައިހުރި މައްސަލަތަކަށް ޙައްލު ހޯއްދަވައިދެއްވުމުގެ މަސައްކަތް ކުރައްވާނެކަމަށެވެ. އެގޮތުން މިވަގުތު ދެއްވަދޫއަށް ކުރިމަތިވެފައިވާ އެންމެ ބޮޑު އެއްމައްސަލައަކީ ރަށްގިރުމުގެ މައްސަލަކަން ރަށުގެ ކައުންސިލުން ފާހަގަކުރައްވާފައިވާތީ، ބަނދަރުގެ ތަރައްޤީކުރުމަށް ކުރިއަށްގެންދާ މަޝްރޫޢުގެ ދަށުން އެކަމަށް ދެމެހެއްޓެނިވި ހައްލެއް ގެނައުމުގެ މަސައްކަތް ކުރައްވާނެކަމަށް ރައީސުލްޖުމްހޫރިއްޔާ ވިދާޅުވިއެވެ.

އަދި ރަށަށް ދިމާވެފައިވާ ކުނީގެ މައްސަލަ ހައްލުކުރުމުގެ މަސައްކަތްވެސް ކުރައްވާނެކަމަށް އެމަނިކުފާނު ވިދާޅުވިއެވެ. މިގޮތުން އެރަށުގެ ބިން ހިއްކައިގެން، އިތުރުކުރެވޭ ބިމުގައި ދާއިމީ ކުނި ކޮއްޓެއް ތަރައްޤީކުރުމަށް ސަރުކާރުގެ އެއްބާރުލުން ލިބޭނެކަމަށް ވިދާޅުވިއެވެ.

President Dr @MMuizzu arrives in Dhevvadhoo Island in North Huvadhu Atoll. Upon arrival the President received a warm welcome from the Island’s community.

The President is scheduled to meet with the Island council, WDC and Island community during his visit. pic.twitter.com/EmTjRZMxCz

— The President's Office (@presidencymv) January 9, 2025

"މިއަހަރުގެ ބަޖެޓުގެ ތެރެއިން އެންމެ އިސްކަމެއް ދޭކަންކަމުގެ ތެރޭގައި ސިއްޙީ ދާއިރާއަށް ކުރިއެރުން ގެނެސްދިނުން ހިމެނޭ، އަދި ތަޢުލީމީ ދައިރާއިން ރަނގަޅު ކަންކަން ރަށްރަށަށް ކޮށްދިނުމަށް ހަމަޖެހިފައިވޭ. މިރަށުގެ ސިއްޙީ މަރުކަޒުގައި އިތުރު ފެސިލިޓީތައް ޤާއިމުކުރުމުގެ މަސައްކަތަކީ އަޅުގަނޑުމެން ކުރާނެކަމެއް. ކުޑަކުދިންގެ ޑޮކްޓަރެއް ހޯދުމާއި އެކްސްރޭ ޚިދުމަތް ލިބިދުން ފަދަ ކަންކަން އިރާދަކުރެއްވިއްޔާ ކޮށްދޭނަން." ރައީސް ވިދާޅުވިއެވެ.

ދެއްވަދޫގެ ސިއްޙީ ދާއިރާއާއި ތަޢުލީމީ ދާއިރާއަށް މުހިއްމު ކަންތައްތަކެއް ކޮށްދެއްވާނެކަން ރައިސުލްޖުމްހޫރިއްޔާވަނީ ފާހަގަކުރައްވާފައެވެ. އެގޮތުން ދެއްވަދޫ އަތޮޅުގެ އެހެން ރަށްތަކާއި ދުރުގައި އޮންނާތީ ސިއްޙީ ކުއްލި ޙާލަތްތަކުގައި ސީ އެމްބިއުލާންސްގެ ދަތިކަން ކުރމަތިވާތީ، ދެމެހެއްޓެނިވި ގޮތެއްގައި މުޅި ރާއްޖޭގައި މިޚިދުމަތް ދިނުމަށް ކުރަމުންދާ މަސައްކަތުގެ ދަށުން ދެއްވަދޫގައިވެސް ސީ އެމްބިއުލާންސްގެ ޚިދުމަތް މިހާރަށްވުރެ ފުޅާކުރުމަށް މަސައްކަތް ކުރައްވާނެކަމަށް ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހުރިއްޔާ ވިދާޅުވީ ދެއްވަދޫ އައިސްޕްލާންޓް މަރާމާތުކޮށް އެރަށުގައި އިތުރު އައިސްޕްލާންޓެއް ޤާއިމުކުރުމުގެ މަސައްކަތް މަސްވެރިކަމާބެހޭ ވުޒާރާއިން ކުރައްވަމުންގެންދަވާކަމަށެވެ.

މަސްވެރިކަމުގެ ސިނާޢަތަކީ ރާއްޖޭގެ އިޤްތިސާދުގައި މުހިއްމު ސިނާއަތެއް ކަމަށާއި، މިއީ ދިވެހިންގެ ގިނަ ބަޔަކު އާމްދަނީ ހޯދުމަށް ކުރާ މަސައްކަތްކަން ފާހަގަކުރައްވާ ރައީސް ވިދާޅުވީ މި ސިނާއަތަކީ ޤައުމީ އުފެއްދުންތެރިކަމުގެ ނިސްބަތުން ވަރުގަދަ ސިނާޢަތަކަށް ކުރިމަގުގައިވެގެންދާނެ ކަމަށެވެ.