ހިޔާ ޓަވަރުތަކުގައި ލިފްޓު ބެހެއްޓުމުގެ މަސައްކަތްކުރަނީ ލިބުނު އެންމެ ކުޑަ އަގަށް: އެޗްޑީސީ

ހުޅުމާލެ ދެވަނަ ފިޔަވަހީގައި ޢިމާރާތްކޮށްފައިވާ ހިޔާ ޓަވަރުތަކުގައި އިތުރު ލިފްޓު ބެހެއްޓުމުގެ މަޝްރޫޢު ޙަވާލުކޮށްފައިވަނީ އެންމެ ކުޑަ ހުށަހެޅި ކުންފުންޏާކަމަށް އެޗްޑީސީގެ މެނޭޖިން ޑިރެކްޓަރ އިބްރާހިމް ފަޒުލް ރަޝީދު ވިދާޅުވެއްޖެއެވެ.

ފަޒުލް މިހެން ވިދާޅުވީ ހިޔާ ޓަވަރުތަކުގައި އިތުރު ލިފްޓުތައް ބެހެއްޓުމުގެ މަސައްކަތް ހަވާލުކޮށްފައިވަނީ ބޮޑު އަގަކަށްކަމަށް ބުނެ ބައެއް ފަރާތްތަކުން ދައްކަމުންދާ ވާހަކަތަކާއި ގުޅިގެނެވެ.

ހިޔާ ޓަވަރުތަކުގައި އިތުރު ލިފްޓް ބެހެއްޓުމުގެ މަސައްކަތް އެޗްޑީސީން ޙަވާލުކޮށްފައިވަނީ ޗައިނާގެ ޝެންޔަންގް ޔުއާން އިންޓެލެކްޗުއަލް ގްރޫޕާއެވެ. އެ މަސައްކަތް އެ ކުންފުންޏާއި ހަވާލުކޮށްފައިވަނީ 18 މިލިޔަން ޑޮލަރުގެ އަގަކަށެވެ. މި އަގަކީ ބޮޑު އަގެއްކަމަށް ބައެއް ފަރާތްތަކުން ތުހުމަތުކުރާތީ ފަޒުލް ވިދާޅުވީ 25 ފަންގިފިލާގެ 16 ޓަވަރުގައި އިތުރު ލިފްޓް ބެހެއްޓުމުގެ މަސައްކަތަކީ ބުރަ މަސައްކަތެއްކަމަށެވެ. އަދި ލިފްޓް ބެހެއްޓުމުގެ ކުރިން އިތުރު މަސައްކަތްތަކެއް ކުރަންޖެހޭކަން ފާހަގަކޮށް، ފަޒުލް ވިދާޅުވީ އެ މަސައްކަތް ހަވާލުކޮށްފައިވާ އަގަކީ ބޮޑު އަގެއް ނޫންކަމަށެވެ.

" ރަނގަޅަށް ކަލްކިއުލޭޝަން ހައްދަވާލައްވާ 32 ލިފްޓްގެ ކަލްކިއުލޭޝަންގެ އަލީގައި.. 10 ބުރީގެ އިމާރާތެއްގައި ލިފްޓެއް ބަހައްޓާއިދޭ އަގަކީ ކިހާވަރެއްތޯ ބަލާއިރު 8 ލައްކައާއި މިލިޔަނަކާ ދެމެދުގެ އަދަދެއް. މިއީ ކޮންކްރީޓްކޮށްފައި ހުންނަ އިމާރާތެއްގައި ލިފްޓް ހަރުކުރުމުގެ އަގު ހަމައެކަނި" އެޗްޑީސީގެ މެނޭޖިން ޑިރެކްޓަރ އިބްރާހިމް ފަޒުލް ރަޝީދު ވިދާޅުވިއެވެ.

ފަޒުލް ވިދާޅުވީ ލިފްޓު ބެހެއްޓުމުގެ މަސައްކަތް މިހާރުވެސް ބާރު ދުވެލީގައި ކުރިއަށްދާކަމަށެވެ.

ހިޔާ ޓަވަރުތަކުގައި އިތުރު ލިފްޓު ހަރުކުރުމުގެ މަސައްކަތް ކުރިއަށްދާއިރު ކޮންމެ ޓަވަރަކަށް 2 ލިފްޓު އިތުރުކުރާނެއެވެ. އެގޮތުން ޖުމްލަ 32 ލިފްޓު ބަހައްޓާއިރު މި ލިފްޓުތަކަކީ ބަލި މީހުން އުފުލޭނެ އިންތިޒާމާއެކު ސްޓްރެޗަރ އެރުވޭގޮތަށް ހުންނަ ލިފްޓުތަކެކެވެ. 14 މީހުންގެ ޖާގައިގެ މި ލިފްޓުތަކުގައި ލޮލަށް ފެނުމުން މަޙުރޫމްވެފައިވާ މީހުންނަށް އެނގޭނެހެން ފަންގިފިލާގެ ނަމްބަރު ބްރެއިލް ބޭނުންކޮށްގެން ތައްޔާރުކޮށްފައި ހުންނާނެކަމަށް އެޗްޑީސީން ވިދާޅުވެއެވެ.