މުޖުތަމަޢު ހޭލުންތެރިކުރުމުގެ އެންމެ ބޮޑު ޒިންމާއެއް އޮތީ ބްރޯޑްކާސްޓަރުންނަށް

ކޮންމެ ޤައުމެއްގައިވެސް ބްރޯޑްކާސްޓަރުންނަކީ، އެ ޤައުމެއްގެ މުޖުތަމަޢުގެ މޫނު ބަލާ ލޯގަނޑެވެ. ޤައުމުގައި ހިނގާ ކަންކަމާއި ދުނިޔޭގެ މަސްރަހުގައި ހިނގާ ކަންކަމުގެ ހަގީގީ މަންޒަރާ އަޑު ގެނައުމުގެ ޒިންމާ އުފުލަންޖެހޭ ފަރާތްތަކަކީ، ބްރޯޑްކާސްޓަރުންނެވެ. ރާއްޖޭގައި ކޮންމެ އަހަރެއްގެ އޮކްޓޯބަރު މަހުގެ 4ވަނަ ދުވަސް ބްރޯޑްކާސްޓިން ދުވަހުގެ ގޮތުގައި ފާހަގަކުރަނީ ޤައުމު ބިނާކުރުމާއި، ޑިމޮކްރެސީ އާލާކުރުމާއި، ރައްޔިތުންގެ ހޭލުންތެރިކަން އިތުރުކޮށް މަޢުލޫމާތު މުއްސަނދި ކުރުމުގައި ބްރޯޑްކާސްޓަރުން އަދާކުރާ މުހިންމު ދައުރުގެ އަގުވަޒަންކޮށް، އެ ސިނާއަތުގެ ތަރައްޤީއަށް މަގުފަހިކުރުމުގެ ބޭނުމުގައެވެ.

ރާއްޖޭގައި ބްރޯޑްކާސްޓިންގެ ޚިދުމަތް ފެށުނުތާ މިއަހަރު 64 އަހަރު ފުރޭއިރު، އެންމެ ފުރަތަމަ މި ޚިދުމަތް ފެށިގެން އައީ 29 ޑިސެމްބަރ 1962ގައި ރޭޑިއޯގެ ޚިދުމަތާއެކުގައެވެ. އެއަށްފަހު 29 މާރިޗު 1978ގައި ޓީވީ މޯލްޑިވްސްއާއެކު ރާއްޖޭގައި ޓީވީ ބްރޯޑްކާސްޓިންގެ ޚިދުމަތް ފެށިގެން ދިޔައެވެ. މި ދެ ޚިދުމަތްވީ، ޖަޒީރާ ރަށްތަކަށް ބެހިފައިވާ މި ޤައުމުގެ މުޖުތަމަޢުތައް ގުޅުވާލަދިން މުހިންމު
ޚިދުމަތްތަކަކަށެވެ.

މިއަދު ރާއްޖެއިން ވަނީ، ބްރޯޑްކާސްޓިން ދާއިރާއިން ބޮޑެތި ކުރިއެރުންތަކެއް ހޯދާފައެވެ. އެގޮތުން އެންމެ ފުރަތަމަ ބްރޯޑްކާސްޓިންގެ ޚިދުމަތް ފެށިގެން އައިއިރު އެ ޚިދުމަތް ސަރުކާރަށް ޚާއްސަވެފައި އޮތް ނަމަވެސް މިއަދު ބްރޯޑްކާސްޓިންގެ ފުރުސަތު ވަނީ އަމިއްލަ ފަރާތްތަކަށްވެސް ހުޅުވާލާފައެވެ. މިއާއެކު ޓީވީއާއި ރޭޑިއޯގެ ޚިދުމަތާއި ރީ -ބްރޯޑްކާސްޓިންގެ ޚިދުމަތް ދޭ އެތައް ބަޔަކު މިއަދު ރާއްޖޭގައި އެބަތިއްބެވެ.

ކިތަންމެ ގިނަ ބަޔަކު މި ޚިދުމަތް ފޯރުކޮށްދިން ނަމަވެސް މިޚިދުމަތް ދޭންވާނީ، ކޮންމެ ބްރޯޑްކާސްޓަރެއްގެ ކޮނޑުގައިވެސް ބޮޑު ޒިންމާއެއް އެޅުވިފައިވާކަން ދަނެގެންނެވެ. ރައްޔިތުން ބްރޯޑްކާސްޓަރުންގެ ޚިދުމަތް ހޯދަނީ ތެދު މަޢުލޫމާތު ހޯދަންކަން އަބަދުވެސް ހަނދުމަކުރަންވާނެއެވެ.

ސޯޝަލް މީޑިއާ ކުރިއަރާފައިވާ މިޒަމާނުގައި ބްރޯޑްކާސްޓަރުންގެ ޒިންމާ ކުރިއަށްވުރެވެސް ބޮޑެވެ. އެކި މަންސަތައް ބޭނުން ކޮށްގެން ސިކުންތުކޮޅެއްގެ ތެރޭގައި ޚަބަރާއި މައުލޫމާތު ފެތުރިގެންދާއިރު، އޭގެ ސައްޙަ މައުލޫމާތު ފޯރުކޮށްދޭންޖެހޭނީ ބްރޯޑްކާސްޓަރުންނެވެ. ރައްޔިތުން އަދިވެސް އެ މައުލޫމާތުތަކުގެ ސައްޙަކަން ކަށަވަރުކުރަން ބަރޯސާވަނީވެސް ބްރޯޑްކާސްޓަރުންނަށެވެ.

ދުނިޔޭގެ އެކި ޤައުމުތަކުގައި މިއަދު ބްރޯޑްކާސްޓަރުންނަށް އެ ޤައުމުތަކުގެ ރައްޔިތުން ކުރާ އިތުބާރު ދަނީ، ދުވަހަކަށްވުރެ ދުވަހެއް ދަށްވަމުންނެވެ. މިހެން ދިމާވާ އެންމެ ބޮޑު ސަބަބަކީ ރައްޔިތުންނަށް އޮޅުވާލައި، ވަކި މަޤުސަދެއް ހާސިލުކުރުމަށް ދޮގު ޚަބަރާއި މައުލޫމާތު އެ ފަރާތްތަކުން ފަތުރާކަމަށް ރައްޔިތުންނަށް ގަބޫލުކުރެވޭތީއެވެ. މީގެ ސަބަބުން، އެ ޤައުމުތަކުގައި ސޯޝަލް މީޑިއާގައި ފެތުރޭ ވާހަކަތަކަށް ބަރޯސާވާ މީހުންގެ އަދަދު އިތުރުވެ، މުޖުތަމަޢުގެ ތެރޭގައި ދޮގު ޚަބަރާއި ތެދު ޚަބަރުގެ ފަރަގު ވަނީ ގެއްލިފައެވެ.

އަޅުގަނޑުމެންގެ މިކުޑަކުޑަ މުޖުތަމަޢުގައިވެސް ބްރޯޑްކާސްޓަރުންނަށް އެ ފަރާތްތަކުގެ ޒިންމާ އެންމެ ރަނގަޅު ގޮތުގައި އަދާނުކުރެވިއްޖެނަމަ މި ހާލަތްތައް ކުރިމަތިވުމަކީ ދުރުގައި އޮތްކަމެއް ނޫނެވެ. މުޖުތަމަޢުގެ ހަމަޖެހުން ޤާއިމުކުރުމަށް ހަމައެކަނި ޚަބަރު ފެތުރުމުގެ ބަދަލުގައި، އެހެނިހެން މުހިންމު މައުޟޫތަކަށްވެސް މުޖުތަމަޢު އަހުލުވެރިކުރުވަން ބްރޯޑްކާސްޓަރުން މަސައްކަތް ކުރަންވާނެއެވެ. އެގޮތުން ސިއްޙީ ހޭލުންތެރިކަން އިތުރު ކުރުމާއި، ތިމާވެށި ރައްކާތެރި ކުރުމާއި، ތަޢުލީމީ ޕްރޮގްރާމްތަކާއި، ދީނީ އަދި ސަޤާފީ ކަންކަމާއި ގުޅޭގޮތުން ހޭލުންތެރިކަން އިތުރު ކުރުމަކީ ބްރޯޑްކާސްޓަރުންގެ މުހިންމު ޒިންމާއެކެވެ.

ދިވެހިރާއްޖޭގައި ބްރޯޑްކާސްޓިންގެ ޚިދުމަތް ދޭ ހުރިހާ ފަރާތްތަކުންވެސް މިއަދު ސަމާލުކަން ދޭންވާނީ، ޤައުމުގެ ރައްޔިތުން އެ ފަރާތްތަކަށް ކުރާ އިތުބާރު ދެމެހެއްޓުމަށެވެ. އެކަން ކުރެވޭނީ، ރައްޔިތުންނަށް އެންމެ ސައްޙަ މަޢުލޫމާތު ފޯރުކޮށްދީގެންނެވެ. ޤައުމުގައި ހިނގާ ކަންކަމުގެ އިތުރަށް ބައިނަލްއަޤުވާމީ މަސްރަހުގައި ހިނގާ ކަންކަމުގެ ފުރިހަމަ މައުލޫމާތު ފޯރުކޮށްދީގެންނެވެ.