އަންނަ ފުޓުބޯޅަ ސީޒަން ފަށާނެ ތާރީހެއް ޔަގީންނުވާތީ މާޒިޔާ ސްޕޯޓްސް އެން ރެކްރިއޭޝަނުގެ ފަރިތަކުރުންތައް މެދުކަނޑާލައިފިއެވެ.
އެފްއޭއެމުން ފުރަތަމަ ޑިވިޝަނުގެ ކްލަބްތަކަށް ފޮނުވާފައިވާ ޑްރާފްޓް ކަލަންޑަރުގައިވާ ގޮތުން ޖެނުއަރީ 24 ވަނަ ދުވަހު ސީޒަން ފަށާނެ އެވެ. މާޒިޔާއިން ފަރިތަކުރުންތައް ފަށާފައިވަނީ އެ ކަލަންޑަރަށް ބެލުމަށްފަހު މިދިޔަ މަހުގެ 27 ގައެވެ.
ޕީއެސްއެމް ސްޕޯޓްސްއާ ވާހަކަދައްކަމުން މާޒިޔާގެ އޮފިޝަލަކު ބުނީ އަންނަ މަހު ސީޒަން ފެށުމަށް ޕްލޭނުގައި އޮތް ނަމަވެސް އެ މަންޒަރެއް ނުފެންނާތީ ޕްރީ ސީޒަން ޕްރެކްޓިސް ބްރޭކެއް ނެގުމަށް ކުލަބުގެ މެނޭޖުމަންޓުން ނިންމީ ކަމަށެވެ.
ކޮންމެ ސީޒަނަކަށްވެސް އެންމެ ފުރަތަމަ ފަރިތަކުރުންތައް ފަށާ ޓީމަކީ މާޒިޔާ އެވެ. އެފްއޭއެމުގެ ޑްރާފްޓް ކަލަންޑަރު ކުލަބުތަކާ ހިއްސާކުރިތާ މާ ގިނަ ދުވަސްތަކެއް ނުވަނީސް އެ ކުލަބުން ވަނީ ފަރިތަކުރުންތައް ފަށާފައެވެ.
މީގެއިތުރުން މާޒިޔާއިން ވަނީ އެ ޓީމުގެ ކޯޗު ސާބިއާގެ ކޯޗު ޑްރަގަން ޑުކަނޯވިޗް އަށް ޗުއްޓީއެއްވެސް ދީފައެވެ. އެއީ ސީޒަން ފެށޭނެ ދުވަހެއް ޔަގީންނުވާތީ އެވެ. މި ޗުއްޓީއާއެކު ކޯޗު އެނބުރި އޭނާގެ ގައުމަށް ދިއުމަށް ނިންމާފައިވާ ކަމަށްވެސް އެ ކުލަބުން ބުނެއެވެ.
މާޒިޔާއިން ވަނީ އޮކްޓޫބަރު މަހު ފަހުކޮޅާއި ނޮވެމްބަރު މަހު ކުރީކޮޅުގައި ކުޅުނު އޭއެފްސީ ޗެލެންޖް ލީގުގައި ކުޅެފައެވެ. މި މުބާރާތާ މާޒިޔާއިން ކުރިމަތިލީ ރަނގަޅު ފެންވަރެއްގެ މެޗުތަކެއް ނުލިބި، ދަތި ހާލުގައެވެ.