ފުރަތަމަ 10 މަސްދުވަސް: ރާއްޖެއަށް އައި ފްލައިޓްތަކުގެ އަދަދު 13،000 އިން މަތީގައި

މިއަހަރުގެ 10 މަސްދުވަހު ރާއްޖެއަށް އައި ބައިނަލްއަޤްވާމީ ފްލައިޓްތަކުގެ އަދަދު އިތުރުވެފައިވާކަމަށް މޯލްޑިވްސް މަނިޓަރީ އޮތޯރިޓީ، އެމްއެމްއޭގެ ރިޕޯޓަކުން ދައްކައިފިއެވެ.

ރާއްޖެއައި ފްލައިޓްތަކުގެ އަދަދު އިތުރުވެފައިވާއިރު ރާއްޖެއަށް ޒިޔާރަތްކުރި ފަތުރުވެރިންގެ އަދަދުވެސް މިދިޔަ އަހަރާއި އާޅަބަލާއިރު މިއަހަރު ވަނީ ވަރަށް ބޮޑަށް އިތުރުވެފައެވެ.

އެމްއެމްއޭގެ ނޮވެމްބަރ މަހުގެ މަންތްލީ ރިޕޯޓުން ދައްކާގޮތުން މިއަހަރުގެ އޮކްޓޯބަރ މަހުގެ ނިޔަލަށް ރާއްޖެއަށް ބައިނަލްއަޤްވާމީ 13،671 ފްލައިޓެއް ވަނީ ދަތުރުކޮށްފައެވެ. މިދިޔަ އަހަރުގެ މި މުއްދަތުގައި ރާއްޖެ އައިސްފައިވަނީ 13،018 ފްލައިޓެވެ. އެހެންކަމުން މިއީ 653 ފްލައިޓްގެ އިތުރުވުމެކެވެ.

މި މުއްދަތުގައި ރާއްޖެއަށް ޝެޑިއުލްކޮށްގެން އައި ފްލައިޓްތަކުގެ އަދަދުވެސް އިތުރުވެފައިވާކަމަށް މި ރިޕޯޓުން ދައްކައެވެ. އެގޮތުން މިއަހަރުގެ ފުރަތަމަ 10 މަސްދުވަހު ޝެޑިއުލްކޮށްގެން ރާއްޖެ އައިސްފައިވަނީ 12،565 ފްލައިޓެވެ. މިދިޔަ އަހަރުގެ މި މުއްދަތުގައި ރާއްޖެ އައިސްފައިވަނީ 11،975 ފްލައިޓެވެ.

ޝެޑިއުލް ފްލައިޓްތަކުގެ އިތުރުން ރާއްޖެއަށް ޗާޓަރ އަދި ޕްރައިވެޓް ޖެޓްތައްވެސް ގިނަ އަދަދަކަށް އާދެއެވެ.

މި މުއްދަތުގައި މިގޮތަށް ރާއްޖެއަށް އައި ފްލައިޓްގެ އަދަދުވެސް އިތުރެވެ. އެގޮތުން ޖެނެރަލް ފްލައިޓްސްގެ ގޮތުގައި 1106 ފްލައިޓް ވަނީ ރާއްޖެ އައިސްފައެވެ. މިދިޔަ އަހަރުގެ މި މުއްދަތުގައި ޖެނެރަލް ފްލައިޓްސްގެ ގޮތުގައި ރާއްޖެ އައިސްފައިވަނީ 1043 ފްލައިޓެވެ.

ރާއްޖެ އައި ފްލައިޓްތަކުގެ އަދަދު އިތުރުވެފައިވާއިރު މިއަހަރުގެ މިހާތަނަށް ރާއްޖެ އައި ފަތުރުވެރިންގެ އަދަދުވެސް ވަނީ މިދިޔަ އަހަރާއި އަޅާބަލާއިރު ބޮޑުތަނުން އިތުރުވެފައެވެ. މިމަހުގެ 17 ވަނަ ދުވަހުގެ ނިޔަލަށް ރާއްޖެއަށް 1.9 މިލިޔަން ފަތުރުވެރިން ވަނީ އައިސްފައެވެ. މިދިޔަ އަހަރުގެ މި މުއްދަތުގައި ރާއްޖެ އައިސްފައިވަނީ 1.8 މިލިޔަން ފަތުރުވެރިންނެވެ.

މިއަހަރު ސަރުކާރުން އަމާޒުހިފާފައިވަނީ ރާއްޖެއަށް 2 މިލިޔަން ފަތުރުވެރިން ގެނައުމަށެވެ. މި އަމާޒު ހާސިލްވާން ދެން އިތުރަށް ބޭނުންވަނީ 58،805 ފަތުރުވެރިންނެވެ.