ހައުސިން މިނިސްޓްރީ ޢިމާރާތުގައި ރޯވެ އަނދަނީ

10:00 - އަލިފާނުގެ ހާދިސާ ހިނގުމުން އެންމެ ބޮޑު އިސްކަމެއްދެއްވީ އަލިފާންގަނޑު ނިއްވުމާއެކު އާންމު ރައްޔިތުން ސަލާމަތުގެ އައްސޭރިއަށް ގެންދިޔުމަށްކަމަށް ދިފާޢީ ވަޒީރު މުޙައްމަދު ޣައްސާން މައުމޫން ވިދާޅުވެއްޖެއެވެ.

އަލިފާން ރޯވި ޢިމާރާތަކީ ގެދޮރުވެރިކަމާއި ބިމާއި އުމްރާނީ ތަރައްގީއާބެހޭ ވުޒާރާގެ އިތުރުން އިމާރާތްކުރުމާއި ބިނާރާބެހޭ ވުޒާރާވެސް ހިންގަމުން އަންނަ އިމާރާތުގައި ރޯވުމާ ގުޅިގެން އަލިފާން ނިއްވުމަށް ކުރަމުންދާ މަސައްކަތްތައް ވަޒީރުވަނީ ޕީއެސްއެމް ނިއުސްއަށް ހިއްސާކުރައްވާފައެވެ.

އެގޮތުން ވަޒީރު ޣައްސާން ވިދާޅުވީ އަލިފާނުގެ ހާދިސާ ހިނގައިގެން އުޅޭކަމުގެ މަޢުލޫމާތު ލިބުމާއެކު ހެނދުނު 6:30 ހާއިރުންފެށިގެން އެމްއެންޑީއެފްގެ ފަޔަރ ޓީމުން ހަރަކާތްތެރިވާން ފެށިކަމަށެވެ.

9:24 - އެންވަޔަރަމެންޓް މިނިސްޓްރީ ހިންގަމުން އަންނަ "ގްރީން ބިލްޑިންގ" އާ ހަމައާށްވެސް އަލިފާ ވަނީ ފޯރާފައި: އެމްއެންޑީއެފް

9:20 - އިމަންޖަންސީ އިވެކުއޭޝަން ސެންޓަަރެއް މިވަގުތުވަނީ ސޯޝަލް ސެންޓަރގައި ގާއިމްކޮށްފައެވެ. އެހީތެރިކަން ބޭނުންވާ ފަރާތްތަކުން 115 އަށް ގުޅައިގެން އެހީ ހޯދުމަށް ނުވަތަ މިސެންޓަރަށް ދިއުމަށް އެންޑީއެމްއޭއިން އިލްތިމާސްކުރައްވައެވެ.

9:14 - އަލިފާން ރޯވެފައިވާ އިމާރާތުގެ ވަށައިގެންވާ އިމާރާތްތަކުން މީހުން ހުސްކޮށް ސޯޝަލް ސެންޓަރަށް ބަދަލު ކުރުމުގެ މަސައްކަތް ދިވެހި ރެޑްކްރެސެންޓާއި އެންޑީއެމްއޭ އިން އަންނަނީ ކުރަމުން.

9:01 - އެމްއެންޑީއެފުން މައުލޫމާތު ދެއްވާ ގޮތުގައި އަލުފާން އަދިވެސް ކޮންޓްރޯލް ނުކުރެވެއެވެ. މުޅި އިމާރާތުގައި ރޯވެފައިވާއިރު މިހާރު މަސައްކަތް ކުރަނީ އެހެން ޢިމާރާތަކަށް އަލިފާން ފޯރިޔަނުދިނުމަށްކަމަށް އެމްއެންޑީއެފުން ވިދާޅުވެއެވެ.

އަލިފާން ރޯވެފައިވާ އިމާރާތުގެ ވަށައިގެންވާ އިމާރާތްތަކުން މީހުން ހުސްކުރުމުގެ މަސައްކަތް އަންނަނީ ކުރަމުންނެވެ. އެ ސަރަހައްދުގައި ދިރިއުޅޭ ފަރާތްތައް ސޯޝަލް ސެންޓަރަށް ބަދަލު ކުރުމުގެ މަސައްކަތް ފަށާފައިވާކަމަށް އެންޑީއެމްއޭއިން މައުލުމާތު ދެއްވައެވެ.

8:50 - މި ހާދިސާގައި ބޮޑުތަކުރުފާނު މަގާ ދިމާއިން ގެދޮރުވެރިކަމާއި ބިމާއި އުމްރާނީ ތަރައްގީއާބެހޭ ވުޒާރާގެ އިމާރާތުގެ ބޮޑު ބައެއް ވަނީ މިހާރު ވެއްޓިފައެވެ.

8:43 - ގެދޮރުވެރިކަމާއި ބިމާއި އުމްރާނީ ތަރައްގީއާބެހޭ ވުޒާރާގެ އީމާރާތާ އިންވެގެން ހުންނަ ތިމާވެއްޓާބެހޭ ވުޒާރާއަށްވެސް އަލިފާނުގެ އަސަރުކޮށްފައިވާކަމަށް މައުލޫމާތު ލިބެއެވެ.

8:38 - މި ހާދިސާއާ ގުޅިގެން އެމްޓީސީސީން ވަނީ އަމީނީމަގުން ކުރާ ދަތުރުތައް މެދުކަނޑާލާފައެވެ. އަދި ވެސްޓްޕާކު ރޫޓުން ކުރާ ދަތުރުތަކަށް ބުރޫ އެރުން އެކަށީގެންވާ ކަމަށްވެސް އެ ކުންފުނިން ވިދާޅުވެއެވެ.

8:30 - ރައީސުލްޖުމްހޫރިއްޔާގެ އިތުރުން ދިފާއީ ވަޒީރު މުޙައްމަދު ޣައްސާން މައުމޫންވެސް ގެންދަވަނީ އެ ސަރަހައްދުގައި ހަރަކާތްތެރިވެވަޑައިގަންނަވަމުންނެވެ.

8:29 - އަލިފާނުގެ ހާދިސާއާއި ގުޅިގެން ސަމާލުކަން ދެންވީ ކަންތައްތައް: އެޗްޕީއޭ
- ދުމުގެ އަސަރުކޮށްފައިވާ ސަރަހައްދަކަށް ނުނިކުތުން. (ކޮންމެހެން ނުކުންނަން ޖެހިއްޖެ ހާލަތެއްގައި މެނުވީ)
- ދުމުގެ އަސަރުކޮށްފައިވާ ސަރަހައްދަކަށް ނުކުތުމުގެ ކުރިން އަނގައާއި ނޭފަތް ނިވާކުރުން.
- ނޭވާލާ ނިޒާމް އަދި ހިތުގެ ބަލިތައް ހުންނަ ފަރާތަތްކަށް ދުނުގެ ސަބަބުން ކުރާ ނޭދެވޭ އަސަރު ބޮޑުވުން އެކަށީގެންވޭ.
- ގޭގެ ދޮރުތަކާއި ކުޑަދޮރުތައް، ދުން ނުވަންނާނެހެން ބަންދުކުރުން.
- ނޭވާ ކުރުވުން / ނޭވާލާން އުނދަގޫވުން، ގަދަޔަށް ކެއްސުން އަދި ބޯ އެނބުރުން ފަދަ އަލާމާތެއް ފެނިއްޖެނަމަ ލަސްނުކޮށް ޞިއްޙީ އެހީތެރިއެއްގެ ލަފާ ހޯއްދަވާ.

8:24 - އަލިފާނުގެ ޙާދިސާ ހިނގައިގެން އުޅޭ ސަރަހައްދަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވަނީ ވަޑައިގެންފަައެވެ.

8:20 - ޕީއެސްއެމް ނިއުސްއަށް މައުލޫމާތު ލިބިފައިވާ ގޮތުގައި އަލިފާން ރޯވެފައިވާ އިމާރާތުގެ ކުރިމަތީގައި ހުރި އިމާރާތްތަކުން މީހުން ބަދަލުކުރުމުގެ މަސައްކަތް ފުލުހުން ދަނީ ކުރަމުންނެވެ.

ގެދޮރުވެރިކަމާ ބެހޭ ވުޒާރާގެ ޢިމާރާތުގައި އަލިފާންރޯވެ އަނދަމުން އެބަދެއެވެ.

މިއަދު ހެނދުނު ރޯވި މިއަލިފާންގަނޑު ނިއްވާލުމުގެ މަސައްކަތުގައި މިހާރު އެމްއެންޑީއެފުން އަންނަނީ ހަރަކާތްތެރިވަމުންނެވެ. އެމްއެންޑީއެފުން މައުލޫމާތު ދެއްވާގޮތުގައި އަލިފާން ރޯވެފައިވަނީ ގެދޮރުވެރިކަމާ ބެހޭ ވުޒާރާ ހުންނަ އިމާރާތުގެ އަމީނީ މަގާ ދިމާއަށް ހުންނަ އިމާރާތުގައެވެ. އަލިފާން ނިއްވުމުގެ މަސައްކަތް ފަޔަރ އެންޑް ރެސްކިއު ސަރވިސަސްއިން އަންނަނީ މަސައްކަތް ކުރަމުންނެވެ.

މަންޒަރުތައް ފެންނަގޮތުން އިމާރާތުގައި ވަރަށްބޮޑަށް ވަނީ ރޯވެފައެވެ. އަދި މުޅި ސަރަހައްދަށް ދަނީ ދުމުގެ އަސަރު ކުރަމުންނެވެ.

މި އިމާރާތަކީ ގެދޮރުވެރިކަމާއި ބިމާއި އުމްރާނީ ތަރައްގީއާބެހޭ ވުޒާރާގެ އިތުރުން އިމާރާތްކުރުމާއި ބިނާރާބެހޭ ވުޒާރާވެސް ހިންގަމުން އަންނަ އިމާރާތެވެ. އަދި އެ އިމާރާތް ހުންނަ ގޯތީގައި މާލެ ސިޓީ ކައުންސިލްގެ ރެޖިސްޓްރޭޝަން ޑިޕާޓްމަންޓްވެސް ހުރެއެވެ.

ތަފްސީލް އަންނަނީ...