ތަމްރީނު ހޯދުމުގެ ފަހުމުނާމާއެއްގައި މެލޭޝިއާގެ މެރިޓައިމް އެކަޑަމީއާއި އެމްއެސްއެސްއާ ދެމެދު ސޮއިކޮށްފި

އެމްއެސްއެސްގެ މުވައްޒަފުންނަށް ތަމްރީނު ހޯދުމުގެ ފަހުމުނާމާއެއްގައި ޤައުމީ ޝިޕިންގް ކުންފުނި، މޯލްޑިވްސް ސްޓޭޓް ޝިޕިންގް އާއި މެލޭޝިއާގެ މެރިޓައިމް އެކަޑަމީ އާއި ދެމެދު ސޮއިކޮށްފިއެވެ.

މި ފަހުމުނާމާގައި އެމްއެސްއެސްގެ ފަރާތުން ސޮއިކުރެއްވީ، އެކުންފުނީގެ މެނޭޖިންގ ޑިރެކްޓަރ އަހުމަދު ޝަރީފެވެ. މެލޭޝިއާގެ މެރިޓައިމް އެކެޑެމީގެ ފަރާތުން ސޮއިކުރެއްވީ، އެއެކެޑަމީގެ ސީއީއޯ އެޑީ އަހުމަދު ކޮޑްޒާލީއެވެ. މިފަހުމުނާމާގައި ސޮއިކޮށްފައިވަނީ މެލޭޝިއާގެ މެލަކާގައި ހުންނަ އެއެކެޑަމީގެ ކެމްޕަހުގައެވެ.

މިފަހުމުނާމާގެ ދަށުން އެމްއެސްއެސްގެ ކަލާސީން ސްކޮލަރޝިޕް ލިބޭ ދަރިވަރުންނަށް އެއެކެޑަމީގެ އެންމެ ޒަމާނީ ވަސީލަތްތައް ބޭނުންކޮށްގެން ތަމްރީނުތައް ހޯދުމުގެ ފުރުސަތު ފަހިވެގެންދާނެއެވެ. އެގޮތުން ސިމިއުލޭޝަން ޓެކްނޮލޮޖީއާއި އެފަންނުގެ ތަޖުރިބާކާރުންނާއެކު ތަމްރީންތައް ފުރިހަމަ ކުރުމާއި އެއެކެޑަމީގެ އުޅަނދުތަކުގައި ތަމްރީންތައް ފުރިހަމަކުރުމަށް ފުރުސަތު ލިބިގެންދާނެއެވެ.

މިއާއެކު ކަލާސީން ސްކޮލަރޝިޕް ދަރިވަރުންނަށް ނެވިގޭޝަނާއި، އިންޖިނިއަރިން ދާއިރާއިން ކިޔަވައި ތަމްރީން ހޯދުމަށް މަގުފަހިވެގެންދާނެ ކަމަށް ޤައުމީ ޝިޕިން ކުންފުނިން ވިދާޅުވެއެވެ.

ކަލާސީން ސްކޮލަރޝިޕަކީ 2021 ވަނަ އަހަރު، އެމްއެސްއެސް އިން ތަޢާރަފް ކުރި ސްކޮލަރޝިޕެކެވެ. ކޮންމެ އަހަރަކު ދޭ މި ސްކޮލަރޝިޕަކީ ނެވިގޭޝަނާއި އިންޖިނިއަރިން ދާއިރާއިން މީހުން ބިނާކޮށް އެމްއެސްއެސްގެ އުޅަނދުތަކުގައި ހަރަކާތްތެރިވާނެ ދިވެހިން އުފެއްދުމުގެ މަޤްޞަދުގައި ދޭ ސްކޮލަރޝިޕެކެވެ.