ގުޅީފަޅު އެފްޑީސީގެ ދަށަށް ބަދަލުކުރަނީ

މާލެ ސަރަހައްދުގައި ހިއްކައިގެން ތަރައްގީ ކުރަމުން އަންނަ ކ. ގުޅީފަޅު, ހައުސިން ޑިވެލޮޕްމަންޓު ކޯޕަރޭޝަން ބެލުމުގެ ދަށުން ނަގައި, ފަހި ދިރިއުޅުން ކޯޕަރޭޝަންއަށް ބަދަލުކުރުމުގެ މަސައްކަތް ފަށައިފިއެވެ.

ފަހި ދިރިއުޅުން ކޯޕަރޭޝަނުން ވިދާޅުވީ ގުޅިފަޅު އެ ކުންފުނީގެ ދަށަށް ބަދަލުކުރުމަށްޓަކައި ކުރަން ޖެހެ މަސައްކަތްތައް ކުރަމުންދާކަމަށެވެ. އެގޮތުން ލިޔެކިޔުންތައް ބަދަލުކުރުމާއި މަޝްވަރާތައް ކުރިއަށްދާކަމަށް އެ ކުންފުނިން ވިދާޅުވެއެވެ. އަދި ގުޅީފަޅާ ގުޅޭގޮތުން ހަދާފައި ހުރި އެގްރިމަންޓުތައް ރިވިއު ކުރުމުގެ މަސައްކަތް ވެސް ކުރިއަށް ގެންދާކަމަށް އެފްޑީސީން ވިދާޅުވެއެވެ.

އެޗްޑީސީން އެފްޑީސީއަށް ގުޅީފަޅު ދިނުމަށް ނިންމާފައިވާއިރު، ކެބިނެޓުން ވަނީ އެފްޑީސީއަކީ އެޗްޑީސީގެ ސަބްސިޑަރީ ކުންފުންޏެއްގެ ގޮތުގައި ހަމަޖެއްސުމަށް ނިންމައިފައެވެ. މިއާއެކު ސަރުކާރުގެ ހުރިހާ އިޖްތިމާއީ ބޯހިޔާވަހިކަމުގެ މަޝްރޫއުތައް ހިންގާނީ އެފްޑީސީގެ ތެރެއިންނެވެ.

ގުޅީފަޅުގެ ބިމުގެ ބޮޑު ބައެއް ވަނީ ބޯހިޔާވަހިކަމަށް ހާއްސަކޮށްފައެވެ. ކުރީ ސަރުކާރުގެ ބޯހިޔާވަހިކަމުގެ ޕްލޭންގެ ދަށުން ދޫކުރާ ބިންވެރިޔާ ސްކީމްގެ ގިނަ ބިންތައް ދޫކުރުމަށް ހަމަޖެހިފައިވަނީ ގުޅީފަޅުންނެވެ.