ޕޯސްޓް މެދުވެރިކޮށް ގްލޯބަލް ދުކާނަށް ރުފިޔާއިން ފައިސާ ދެއްކޭނެ އިންތިޒާމު

ގްލޯބަލް ދުކާންއިން ވިޔަފާރިކުރާ ދިވެހި ކަސްޓަމަރުންނަށް ފަސޭހަކަމާއެކު ފައިސާ ދެއްކޭނެ ގޮތް މޯލްޑިވްސް ޕޯސްޓް މެދުވެރިކޮށް ތައާރަފުކޮށްފިއެވެ.

މޯލްޑިވްސް ޕޯސްޓްއިން ވިދާޅުވީ، ކަސްޓަމަރުން ޗެކްއައުޓް ކުރާ ގަޑީގައި "ޕޭ ތުރޫ މޯލްޑިވްސް ޕޯސްޓް" އިޚުތިޔާރު ކުރެއްވުމަށްފަހު، އެތަނުގައި ދީފައިވާ އިރުޝާދުތަކާ އެއްގޮތަށް ފައިސާގެ މުއާމަލާތް ފުރިހަމަކުރެވޭނެ ކަމަށެވެ. މިގޮތުން ފައިސާ ދައްކާއިރު ޝަރުތުހަމަވާ ކަސްޓަމަރުން، ބޭނުންވާނަމަ ދިވެހި ރުފިޔާއިން ފައިސާ ދެއްކުމަށް ޕޭމަންޓް ލިންކެއް ގްލޯބަލް ދުކާން އެޕްލިކޭޝަން މެދުވެރިކޮށް ލިބޭނެއެވެ.

މި އައު ޚިދުމަތަކީ، ގްލޯބަލް ދުކާން މެދުވެރިކޮށް ތަކެއްޗަށް އޯޑަރުކުރާއިރު ބޭރުގެ ފައިސާއިން މުއާމަލާތްކުރާ ބައިނަލްއަޤުވާމީ ޕޭމަންޓް މެތަޑުތަކުގެ ބަދަލުގައި، ދިވެހި ރުފިޔާއިންވެސް ފަސޭހަކަމާއެކު ފައިސާ ދެއްކުމަށް ހުޅުވިގެންދިޔަ ރަނގަޅު ފުރުސަތެއްކަމަށް ޕޯސްޓްއިން ވިދާޅުވެއެވެ. މި އިންތިޒާމުގެ ސަބަބުން ދިވެހިރާއްޖޭގެ ކަސްޓަމަރުންނަށް ގްލޯބަލް ދުކާންގެ ޚިދުމަތްތައް ހޯދުމުގައި އިތުރު ފަސޭހަތަކެއް ލިބި، ފައިސާ ދެއްކުމުގެ މަރުހަލާ ކުރިއަށްވުރެ ލުއިވެގެންދާނެ ކަމަށްވެސް ވަނީ ފާހަގަކޮށްފައެވެ.

އެ ކުންފުނިން ބުނީ ކުރިއެކޭވެސް އެއްފަދައިން، މޯލްޑިވްސް ޕޯސްޓާއި އިންޑިއާ ޕޯސްޓް ގުޅިގެން އިންޑިއާގެ އީ-ކޮމާސް މާކެޓު ޕްލޭސް ގްލޯބަލް ދުކާން މެދުވެރިކޮށް ތަކެތި ގަތުމުން ދިވެހިރާއްޖޭގެ ކޮންމެ ހިސާބަކަށްވެސް ޑެލިވަރ ކޮށްދޭނެ ކަމަށެވެ. ގްލޯބަލް ދުކާންއިން ވިޔަފާރި ކުރުމަށް އިންޑިޔާގެ އެޑްރެސްއެއް ބޭނުމެއް ނުވާނެއެވެ.

ގްލޯބަލް ދުކާންގައި ހިމެނޭ، އީކޮމާސް ޕްލެޓްފޯމްތަކުގެ ތެރޭގައި އެމެޒަން، މިންތްރާ، ފްލިޕްކާޓް، ނައިކާ، ނައިކާ ފެޝަން، އިކިއާ ފަދަ މަޝްހޫރު ގިނަ ޕްލެޓްފޯމްތައް ހިމެނެއެވެ.

ގްލޯބަލް ދުކާން ޕްލެޓްފޯމަކީ، ދިވެހިންގެ ތެރޭގައި މަޝްހޫރު އަދި އިތުބާރު ލިބިފައިވާ ޕްލެޓްފޯމެކެވެ. ޕޯސްޓް އޮފީހުން ފާހަގަކުރާ ގޮތުގައި، ގްލޯބަލް ދުކާންއިން ވިޔަފާރި ކުރާ ދިވެހި ކަސްޓަމަރުންނަށް ފަސޭހަކަމާއެކު ފައިސާ ދެއްކޭނެ ގޮތް ހަމަޖެހިގެން ދިއުމަކީ، ދިވެހިންނަށް އޮންލައިންކޮށް ވިޔަފާރި ކުރުމަށާއި ގްލޯބަލް މާކެޓްޕްލޭސްއަށް ހުޅުވިފައިވާ ފުރުޞަތުތަކަށް އިތުރުކުރެވުނު ކުރިއެރުމެކެވެ.