އެފްއެސްއެމްގެ ތެލުން ވަގު ވިޔަފާރި؛ ސަރުކާރުން ވިދާޅުވީ ވަކި މީހަކު އިސްތިސްނާނުކޮށް ފިޔަވަޅު އަޅުއްވާނެކަމަށް

އެފްއެސްއެމްގެ މުވައްޒަފުންތަކެއް އެ ކުންފުނީގެ ތެލުން ވައްކަންކޮށް، ފައިސާ ލޯންޑަރކުރާކަމަށް ޝައްކުކުރެވޭ މައްސަލައެއް ދިވެހި ފުލުހުންގެ ޚިދުމަތުން ތަހުގީގުކުރަން ފަށައިފިއެވެ.

އެފްއެސްއެމްގެ ތެލުން ވަގު ވިޔަފާރިކުރާކަމަށް ޝައްކުކުރެވޭ މައްސަލަ ތަހުގީގުކުރަމުން ގެންދަވާކަން ހާމަކުރެއްވީ ދާޚިލީ ސަލާމަތާއި ފަންނިއްޔާތާބެހޭ ވަޒީރު ޢަލީ އިޙްސާނެވެ.

ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ވަޒީރު އިޙްސާން ވިދާޅުވީ ފިޔުލް ސަޕްލައި މޯލްޑިވްސް، އެފްއެސްއެމްގެ މުވައްޒަފުންތަކެއް އެކުންފުނީގެ ތެލުން ވައްކަންކޮށް، އޭގެއިން ލިބޭފައިސާ ލޯންޑަރކުރަމުންދާކަމަށް ޝައްކު ކުރެވޭ މައްސަލައެއް ދިވެހި ފުލުހުންގެ ޚިދުމަތުން ތަހުގީގު ކުރަމުންދާ ކަމަށެވެ. އަދި މި މައްސަލާގައި މިހާތަނަށް 10 މީހުންނާއި 2 ގެއެއް އަދި ތެޔޮއުފުލާ 2 ބާޖު ފުލުހުންގެ ޙާއްސަ ޓީމުތަކުން ބަލައިފާސްކޮށްފައިވާކަމަށްވެސް ވަޒީރު ވިދާޅުވިއެވެ. އަދި މި މައްސަލައާ ގުޅުންހުރި އިލެކްޓްރޯނިކް ސާމާނާއި ލިޔެކިޔުން ހޯދާފައިވާކަމަށްވެސް ވަޒީރު ވިދާޅުވިއެވެ.

ވަޒީރު ވިދާޅުވީ މި މައްސަލައިގެ ތަހުގީގު ކުރިއަށްދާވަރަކުން ފުލުހުންގެ ފަރާތުން މައްސަލައާގުޅޭ އިތުރު ތަފްސީލު ހާމަކުރައްވާނެ ކަމަށެވެ. އަދި މިފަދަ މައްސަލަތައް ފާހަގަކޮށް، ފުރިހަމައަށް އަވަހަށް ތަހުގީގުކޮށް، ވަކި މީހަކު އިސްތިސްނާނުކޮށް ޤާނޫނީ ފިޔަވަޅު އެޅުއްވުމަކީ ރައީސުލްޖުމްހޫރިއްޔާ ޑރ. މުއިއްޒު ވަރަށް އިސްކަންދެއްވާކަމެއް ކަމަށްވެސް ވަޒީރު ވިދާޅުވިއެވެ.

ފިއުލް ސަޕްލައިސް މޯލްޑިވްސްގެ މުވައްޒަފުންތަކެއް އެކުންފުނީގެ ތެލުން ވައްކަންކޮށް، އޭގެއިން ލިބޭފައިސާ ލޯންޑަރކުރަމުންދާކަމަށް ޝައްކު ކުރެވޭ މައްސަލައެއް ދިވެހި ފުލުހުންގެ ޚިދުމަތުންދަނީ ތަހުގީގު ކުރަމުން.

މި މައްސަލާގައި މިހާތަނަށް ފުލުހުންގެ ހާއްސަ ޓީމުތަކުންވަނީ 10 މީހުނާއި…

— Minister of Homeland Security & Technology (@min_mohst) December 1, 2024

އެފްއެސްއެމްގެ މުވައްޒަފުންތަކެއް ތެލުން ވައްކަންކޮށްގެން ފައިސާ ލޯންޑަރ ކުރުމުގެ މައްސަލައެއް ތަހުގީގު ކުރަމުންދާއިރު މީގެ ކުރިންވެސް އެ ކުންފުނީގެ މިފަދަ މައްސަލައެއް ވަނީ ފެންމަތިވެފައެވެ. އެގޮތުން، އެފްއެސްއެމް އާއި މޯލްޑިވްސް ޕޯޓްސް ލިމިޓެޑް، އެމްޕީއެލގެ މުވައްޒަފުންތަކެއް ގުޅިގެން ތެލުގެ މުއާމަލާތްތަކެއްގައި ކޮރަޕްޝަނުގެ އަމަލުތަކެއް ހިންގާފައިވާތީ 3 މީހެއްގެ މައްޗަށް ޕްރޮސިކިއުޓަރ ޖެނެރަލްގެ އޮފީހުން ވަނީ މިއަހަރުގެ ޖެނުއަރީމަހު ދައުވާކޮށްފައެވެ.