ފިޓް މޯލްޑިވްސް ޕޯޓަލް މެދުވެރިކޮށް ކުރިއަށްގެންދަން ހަމަޖެހިފަވާ ތަމްރީން ޕްރޮގްރާމުތައް ހިންގުމަށް މި އަހަރު ނިމުމުގެ ކުރިން ލީޑަރުން ތަމްރީނުކޮށް ނިމޭނެ ކަމަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ. ވަޒީރު މިހެން ވިދާޅުވީ 52 ހަފުތާގައި ހާސިލުކުރެވުނު ނަތީޖާތަކާ ގުޅޭގޮތުން "ޕީއެސްއެމް ނިއުސް" އިން ގެނެސްދިން ޚާއްސަ ޕްރޮގްރާމުގައި ވާހަކަދައްކަވަމުންނެވެ.
ސަރުކާރުގެ ހަފުތާ 14 ގެ ކުޅިވަރު ވައުދުތަކުގެ ތެރޭގައި ހިމެނޭ ފިޓް މޯލްޑިވްސް އެޕްލިކޭޝަން އިފްތިތާހުކޮށް އާންމުންނަށް ރަޖިސްޓްރީވުމުގެ ފުރުސަތު ހުޅުވާލާފައިވަނީ މި އަހަރުގެ ފެބްރުއަރީ މަހުގެ ތެރޭގައެވެ.
ވަޒީރު ވިދާޅުވީ ވުޒާރާއާ ހަވާލުވެ އެންމެ ފުރަތަމަވެސް މަސައްކަތް ކުރެއްވީ ސަރަކުރާރުގެ ކުޅިވަރު މެނެފެސްޓޯގައި ހުރި ކަންކަން ތަންފީޒުކުރެއްވުމަށް ކަމަށާއި، ފިޓް މޯލްޑިވްސް ޕޯޓަލްގެ ބޭނުމަކީ މުސްތަގުބަލުގައި އެ ޕްރޮގްރާމުތައް "މޮޑިފައި" ކުރާނެ ގޮތް ދެނެގަތުން ކަމަށެވެ. އަދި އެ އެޕްލިކޭޝަނަށް ބޭނުންވާ ޑޭޓާތައް "ޓްރަޔަލް" ގޮތުގައި އެޅި، ޖެހޭ މައްސަލަތައް ދެނެގަނެވިފައިވާ ކަމަށްވެސް ވަޒީރު ވިދާޅުވިއެވެ.
ވަޒީރު ވިދާޅުވީ ފިޓް މޯލްޑިވްސްގެ ކަންކަން ކުރިއަށް ގެންދިޔުމަށް ރާއްޖޭގައި ހަރަކާތްތަރެވިމުންދާ އެ ވުޒާރާގެ މުވައްޒަފުން, އޭގެ ތެރޭގައި ޔޫތު އެސޯސިއޭޓުންނާއި ސްޕޯޓްސް ކައުންސިލަރުން ތަމްރީނުކުރުމުގެ މަސައްކަތް ކުރިއަށްގެންދެވުނު ކަމަށެވެ. އޭގެ އެންމެ ބޮޑު ބޭނުމަކީ ގާއިމުކުރެވިގެންދާ ޕޯޓަލްގެ އެހީގެ ކަސްރަތު ޕްރޮގްރާމުތައް ހިންގުން ކަމަށްވެސް ވިދާޅުވިއެވެ. އަދި ތަމްރީނު ޕްރޮގްރާމް ކާމިޔާބުކަމާއެކު ރާއްޖޭގެ އެކި ރަށްރަށުގައި ކުރިއަށްދާ ކަމަށާއި، އަންނަ ޑިސެންބަރު މަހުގެ 26 ވަނަ ދުވަހު ތަމްރީނު ޕްރޮގްރާމުތައް ނިމިގެންދާނެ ކަމަށްވެސް ވަޒީރު ވިދާޅުވިއެވެ.
"އަޅުގަނޑުމެން ތަމްރީނުކުރަނީ ޓްރޭނަރުން. ލީޑަރުން މި އުފައްދަނީ. އެ ލީޑަރުން ރަށްރަށުގައި ޕްރޮގްރާމުތައް ގެންދަން ފަށާނީ. އޭގެ ތެރޭގައި މޫދު ކަސްރަތާއި، ދުޅަހެޔޮކަމަށް ކުރަންޖެހޭ އެކި ފާޑުފާޑުގެ ކަސްރަތު، ޕިޒިކަލް އެކްޓިވިޓީ ޕްރޮމޯޓުކުރުމަށް ކުރަން ހުރި ކަންކަން ކުރުން." ރާފިޢު ވިދާޅުވިއެވެ.
ވަޒީރު ވިދާޅުވީ ރަށްރަށުން ތަމްރީންވެގެން ނުކުންނަ ކުދިން އެޕްލިކޭޝަނަށް މައުލޫމާތު އަޅަމުން ގެންދާނެ ކަމަށާއި، އަދި އެ ޕްރޮގްރާމުތަކުގައި ބައިވެރިވާ އާންމު ރައްޔިތުންނަށްވެސް މައުލޫމާތު އެޅޭ ގޮތަށް އެޕްލިކޭޝަން ފަރުމާކޮށްފައިވާނެ ކަމަށެވެ. އަދި އޭގެ ނަތީޖާއާއެކު ދުޅަހޮޔެ ސިއްހަތެއްގައި ތިބުމަށް ރައްޔިތުންގެ ހަރަކާތްތެރިވާ މިންވަރު ދެނެގަނެވިގެންދާނެ ކަމަށްވެސް ވިދާޅުވިއެވެ. ވަޒީރު ވިދާޅުވީ އެކަމަކުގެ ސަބަބުން ދުޅަހެޔޮ ވެއްޓެއް ގާއިމުކުރުމައްޓަކައި ގައިންގަޔަށް ނާރާ ބަލިތައް، ޕިޒިކަލް އެކްޓެވިޓީސްތަށް މެދުވެރިކޮށް ދެނެގަނެވި، އެކަންކަން "މޮޑިފައި" ކޮށް ތަންފީޒުކުރެވިގެންދާނެ ކަމަށެވެ.
ފާއިތުވެދިޔަ 52 ހަފުތާގެ ތެރޭގައި މި ސަރުކާރުން ވަނީ 25 ފިޓްނަސް ކޯޗުން ތަމްރީނުކޮށްފައެވެ. އަދި "ހަށިހެޔޮ ރާއްޖެ" ޕްރޮގްރާމް ހިންގުމަށް ބޭނުންވާ އިންސާނީ ވަސީލަތްތައް ތަރައްގީކުރުމުގެ މަގުސަދުގައި ހއ. ހދ. އަދި ށ އަތޮޅަށް އަމާޒުކޮށް 43 ލީޑަރުން ވަނީ ތަމްރީނުކޮށްފައެވެ.