ރާއްޖޭގައި ފުރަތަމަ ފަހަރަށް ބާއްވާ ބައިނަލްއަޤުވާމީ ޒަކާތު މަހާސިންތާ ފަށައިފި

ދިވެހިރާއްޖޭގައި ފުރަތަމަ ފަހަރަށް ބާއްވާ ބައިނަލްއަޤުވާމީ ޒަކާތު މަހާސިންތާ ފަށައިފިއެވެ.

ޒަކާތު ހައުސްއިން އިންތިޒާމްކޮށްގެން ބާއްވާ މިމަހާސިންތާ ފެށުމުގެ ގޮތުން މިއަދު ހެނދުނު ވަނީ ޚާއްސަ ރަސްމިއްޔާތެއް ބާއްވާފައެވެ. މި ރަސްމިއްޔާތު ޝަރަފްވެރިކޮށްދެއްވީ ދިވެހިރާއްޖޭގެ އިސްލާމީ ޔުނިވަރސިޓީގެ ވައިސް ޗާންސެލަރ ޑރ. ޢަލީ ޒާހިރު ބިން ސަޢީދު ޤާސިމެވެ.

ޒަކާތު މަހާސިންތާ ފެށުމުގެ ރަސްމިއްޔާތުގައި ޒަކާތު ހައުސްގެ ޑިރެކްޓަރ ޖެނެރަލް އަލްއުސްތާޛު އިއްޒައްދީން ޢަދްނާން ވިދާޅުވީ މިމަހާސިންތާގެ އަމާޒަކީ، ރާއްޖޭގެ އިޖްތިމާއީ އަދި އިޤްތިޞާދީ މައިދާނަށް ފެތޭ ގޮތަށް، އަވަސް އަދި ފަސޭހަ ގޮތަކަށް ޚިދުމަތްދެވޭ ޒަކާތުގެ އޮނިގަނޑެއް ޤާއިމުކޮށް، މިނިޒާމުގެ ތެރެއިން ދެމެހެއްޓެނިވި ތަރައްޤީއަށް މަގުފަހިކޮށްދިނުންކަމަށެވެ.

" ރާއްޖޭގެ އިޖުތިމާޢީ ހަމަހަމަކަމާއި ތަރަޤީއަށް ވާޞިލްވުމަށްޓަކައި ޒަކާތުގެ ބެހެނިވެރިންނާ ގުޅުންހުރި ޒަމާނީ ފިޤުހީ މައްސަލަތަކަށް އަލިއަޅުވާލެވޭނެ." ޒަކާތު ހައުސްގެ ޑިރެކްޓަރ ޖެނެރަލް އަލްއުސްތާޛު އިއްޒައްދީން ޢަދްނާން ވިދާޅުވިއެވެ.

މި ރަސްމިއްޔާތުގައި އިސްލާމީ ޔުނިވަރސިޓީގެ ވައިސް ޗާންސެލަރ ޑރ. ޢަލީ ޒާހިރު ބިން ސަޢީދު ޤާސިމް ވިދާޅުވީ ޒަކާތުގެ ކަންކަން ރަނގަޅަށް ބައްޓަން ކުރުމަށްޓައި މުހިންމު ޚިޔާލުތައް ލިބޭނެކަމަށް އުއްމީދުކުރައްވާކަމަށެވެ. އޭނާ ވިދާޅުވީ ޒަކާތު ފަންޑުން ރަނގަޅަށް މެނޭޖްކުރުމަކީ ދުވަހުން ދުވަށް ފަޤީރުންގެ ލިސްޓުގައި ތިބި މީހުންގެ އަދަދު މަދުވާނެކަމެއްކަމަށެވެ.

"ރާއްޖޭގައި ޒަކާތް ދޭ އަދަދު އިތުރުވަމުން ދިޔަނަމަވެސް އަދިވެސް ޒަކާތް ދެއްކުން އިތުރުކުރަންޖެހޭ. މިކަން ކުރުމަށް ހޭލުންތެރިކަން އިތުރުކުރަންވެސް ޖެހޭ." އިސްލާމީ ޔުނިވަރސިޓީގެ ވައިސް ޗާންސެލަރ ޑރ. ޢަލީ ޒާހިރު ބިން ސަޢީދު ޤާސިމް ވިދާޅުވިއެވެ.

އިންޓަރނޭޝަނަލް ޒަކާތު ކޮންފަރެންސް 2024 އަކީ ދެމެހެއްޓެނިވި ގޮތެއްގައި ރާއްޖޭގައި ޤާއިމުކުރެވިފައިވާ ޒަކާތުގެ ނިޒާމެއް ކުރިއެރުވުމުގެ މަގުސަދުގައި ބާއްވާ މަހާސިންތާއެކެވެ. މިމަހާސިންތާގައި ޢިލްމުވެރިންނާއި، މިމަސައްކަތުގައި އުޅޭ މީހުންނާއި ސިޔާސަތުތައް ކަނޑައަޅާ ފަރާތްތަކާއި، މުޖުތަމަޢުގެ އިސްވެރީން ގުޅިގެން، އިޖްތިމާޢީ ދުޅަހެޔޮކަމާއި އިޤްތިޞާދީ ހަމަޖެހުމަށް މުހިންމު ވަސީލަތެއްގެ ގޮތުގައި ޒަކާތުގެ ހިންގުން ހަރުދަނާކޮށް، ހަރުދަނާކަން އިތުރުކުރެވޭނެ އިސްތިރާޖުތައް ދެނެގަތުމަށް ވަނީ ހަމަޖެހިފައެވެ.

މިމަހާސިންތާގައި ރާއްޖޭގެ އެކި މުއައްސަސާތަކުން އަދި މެލޭޝިޔާގެ ބައެއް އިންސްޓިޓިއުޝަންތަކުން ބައިވެރިވެވަޑައިގަންނަވައެވެ. ޕެނެލިސްޓުންގެ ގޮތުގައި ރާއްޖޭގެ މަޝްހޫރު ދީނީ ޢިލްމުވެރިންނާއި، އިސްލާމިކް ފައިނޭންސާއި އިޤްތިޞާދީ ދާއިރާގެ މާހިރުން ބައިވެރިވެވަޑައިގަންނަވާ ކަމަށް ޒަކާތު ހައުސްއިން ވިދާޅުވެއެވެ.

މި މަހާސިންތާ މިރޭގެ ނިިޔަލަށް ކުރިއަށްދާއިރު، 4 ކީނޯޓް ސްޕީކަރުންގެ ވާހަކަފުޅު ދެއްކެވުމާއި 4 ޕެނަލް ޑިސްކަޝަނެއް ކުރިއަށް ގެންދާ ގޮތަށް ވަނީ ހަމަޖެހިފައެވެ.