މަޖިލީހުގެ މި ދައުރުގެ މުއްދަތު އިތުރުކުރަނީ
-
ދައުރު އިތުރު ކުރަން ނިންމާފައިވަނީ އަންނަ މަހުގެ 15އާ ހަމައަށް
-
ގަވާއިދުގައިވާގޮތުން ދައުރު މި މަހުގެ 30އަށް ނިމޭނެ
ރައްޔިތުންގެ މަޖިލީހުގެ މި ދައުރުގެ މުއްދަތު އިތުރުކުރަން މަޖިލީހުގެ ރިޔާސަތުން ހުށައަޅުއްވައިފިއެވެ.
ރައްޔިތުންގެ މަޖިލީހުގެ މިއަދުގެ ޖަލްސާ ފަށްޓަވައި މަޖިލީހުގެ ރައީސް ޢަބްދުއްރަޙީމް ޢަބްދުﷲ ވިދާޅުވީ މި ދައުރުގެ މުއްދަތު އިތުރުކުރުމަށް ގަސްތުކުރައްވަނީ މަޖިލީހުގައި ނިންމުމަށް މުހިންމު މަސައްކަތްތަކެއް ހުރުމުން ކަމަށެވެ. އެގޮތުން އަންނަ މަހުގެ 15ވަނަ ދުވަހާ ހަމައަށް ދައުރު ދަންމާލަން އެމަނިކުފާނު ހުށަހެޅުއްވިއެވެ.
ރައްޔިތުންގެ މަޖިލީހުގެ ގަވާއިދުގައިވާ ގޮތުން މަޖިލީހުގެ މި ދައުރުގެ ފަހު ދުވަހަކީ ނޮވެމްބަރު 30 ވަނަ ދުވަހެވެ.
މަޖިލީހުގެ ދައުރު އިތުރުކުރެވޭނީ މެންބަރުންގެ މެދުގައި ނަގާ ވޯޓަކުންނެވެ. އެހެންކަމުން އަންނަ މަހުގެ 15ވަނަ ދުވަހާ ހަމައަށް ދައުރު އިތުރުކުރުމަށް މިއަދުގެ ވޯޓުގެ ވަގުތުގައި ވޯޓަށް އެހުމަށް ވަނީ ތައާވަލުކޮށްފައެވެ.
މަޖިލީހުގެ މި ދައުރު އިތުރު ކުރުމަށް ނިންމާފައިވާއިރު އަންނަ އަހަރަށް ލަފާކުރާ ދައުލަތުގެ ބަޖެޓުގެ މަސައްކަތްވެސް އަދި ނުނިމެއެވެ. އަދި ސަރުކާރުގެ ފަރާތުން ހުށަހަޅުއްވާފައިވާ އެކި ބިލުތަކުގެ މަސައްކަތްވެސް މަޖިލީހުގައި ކުރިއަށް އެބަދެއެވެ.