ރާއްޖެއަށް ކުރި ދަތުރުގައި އުފެދުނު ޝައުގުވެރިކަމުގައި ޖަޕާނު ސިޓިންގރޫމަށް ދިވެހި ޖޯލި

ރަށްރަށުގެ އަތިރިމައްޗާއި މަގުތަކާއި ގޭގޭގެއިން އެންމެ ޢާއްމުކޮށް ފެންނަ އެކައްޗަށްވާނީ ދިވެހީންގެ ޒަމަންވީ ޖޯލިފަތިތަކެވެ. އެއީ ދިވެހީން އެކި ކަންމުގައި ޚިޔާލުފާޅުކުރުމާއި އުފާފާޅުކޮށް ހިންހަމަޖައްސާލާ ތަންތަނެވެ. އެކަކު އަނެކަކާއި ދިމާވެލާ، ހިތްހަމަޖައްސާލާ، ވާހަދައްކާލަން އެކި ޢުމުރުގެ މީހުން ދުވަހުގެ އެކި ގަޑިތަކުގައި ޖޯލިތަކުގައި ވަގުތުހޭދަކުރެއެވެ.

ދިވެހިންގެ ދިރިއުޅުމާއި ގުޅިފައިވާ އަދި އާންމުކޮށް ކުރާކަމަކަށް ވުމުން މިކަމުގެ ޚާއްސަކަން އަޅުގަނޑުމެންނަށް ފާހަގަނުކުރެވުނު ނަމަވެސް ދުނިޔޭގެ އެހެން ހިސާބުތަކަށް ނިސްބަތްވާ މީހުންނަށް މިކަން ތަފާތުވެފައި ހިތްގައިމު ޚިޔާލަކަށް ވެފައިވާކަން މިވަނީ އެނގިފައެވެ. މިއީ ރާއްޖެއަށް ފަތުރުވެރިންގެ ގޮތުގައި ޒިޔާރަތްކުރި ދެމަފިރިއަކަށް ދިވެހި ޖޯލި ކަމުގޮސްގެން އެމީހުންގެ ޤައުމަށް ދިވެހި ޖޯލި ދިޔަގޮތުގެ ވާހަކައެވެ.

މިއީ ޖަޕާނުގެ ދެމަފިރިއެއްގެ ހިތުގައި ޖޯއްޔަށް އުފެދުނު ލޯތްބެއްގެ ވާހަކައެވެ. އެ ދެމަފިރިން ރާއްޖެއަށް އައީ ފަތުރުވެރިންގެ ގޮތުގައެވެ. އެހެންނަމަވެސް ދިވެހީންގެ ދިރިއުޅުމުގެ އާދަކާދަތައް ބަލާލުމަށް މީހުން ދިރިއުޅޭ ބައެއް ރަށްރަށަށް އެމީހުން ވަނީ ޒިޔާރަތްކޮށްފައެވެ. މިދަތުރުތަކުގައި އެންމެ ތަފާތު އެއްކަމަކަށް އެދެމަފިރިންނަށް ފާހަގަކުރެވުނީ، ހުރިހާ ރަށެއްގެ އެކި ތަންތަނުން ފެންނަމުންދިޔަ ޖޯލިތަކެވެ. އެކި ގަޑިތަކުގައި އެކި ޢުމުރުގެ މީހުން މިޖޯލިތަކުގައި ސައްލާކުރަން ތިބޭ މަންޒަރުވީ އެމީހުންނަށް ވަރަށްވެސް އާދަޔާ ޚިލާފުކަމަކަށެވެ. މިގޮތުން ޖޯލީގައި ތިބެ ދެކެވޭ ވާހަކަތަކާއި ކުރެވޭ ސައްލާއަކީ، އިޖުތިމާޢީ ގުޅުންތައް ބަދަހިވާކަމެއްކަމަށް އެމީހުންނަށް ޤަބޫލުކުރެވުނެއެވެ.

އެހެންކަމުން އެނބުރި ޖަޕާނަށް ދިޔައީ ރާއްޖޭގެ އެކި ރަށްރަށުން ފެނުނު ޖޯލިތަކުގެ ފޮޓޯތައް ނަގައިގެންނެވެ. ޖަޕާނަށް ގޮސް މިދެމަފިރިން މަސައްކަތް ފެށީ ޖޯއްޔެއް ހެދުމަށެވެ. އެގޮތުން ސޯޝަލް މީޑިއާގެ އެކި ވަޞީލަތްތަކުގެ އެހީ ހޯދައިގެން، މިކަމުގެ ދިރާސާއެއްކޮށްގެން އަމިއްލައަށް ޖޯއްޔެއް މިހާރުވަނީ ތައްޔާރުކޮށްފައެވެ.

އެދެމަފިރިން ފާހަގަކޮށްފައިވާގޮތުން، ޖޯލި ހެދުމުގައި އެންމެ އުނދަގޫވީ، ޖޯލީގެ ފުންމިން ވަކި ވަރެއްގައި ބެހެއްޓުމަށެވެ. އެގޮތުން ފުރަތަމަ ޖޯލީގެ މަސައްކަތް ނިންމުމަށް 4 ގަޑިއިރު، އަދި 2 ވަނަ ޖޯލި ނިންމަން 3 ގަޑިއިރު ހޭދަވިކަން އެ މީހުން ފާހަގަކުރިއެވެ.

އެމީހުންވަނީ ދިވެހީންގެ ޖޯލީގައި ހުންނަ އެވޭލާ ގެތުންގަނޑުވެސް ދަސްކޮށް ޖޯލިތައް ދިވެހިންގެ ފައްޓަފާޅިއަށް ތައްޔާރުކޮށްފައެވެ.

އެހެންކަމުން ދިވެހީންގެ ޒަމާންވީ ޖޯލި މިހާރު މިވަނީ ދިވެހިރާއްޖެ އަސްދަނޑިން ބޭރުވެ ޖަޕާނުގެ ގެއެއްގެ ސިޓިންގރޫމްގެ ޒީނަތުގެ ބަޔަކަށްވެފައެވެ. އަދި ޖޯލީގެ މަޤުބޫލުކަން އިތުރުވެ، ދުނިޔޭގެ ކުރިއަރާފައިވާ ބޮޑެތި ސިޓީތަކުގައި ދިރިއުޅޭ މީހުންނަށް އުފާވެރި ވަގުތުކޮޅެއް ހޭދަކޮށްލުމަށް މަގުފަހިކުރުވާ އެއްޗަކަށްވެސް މިވަނީވެފައެވެ.