މަޖިލީހުގެ އަމީން ޢާއްމާއި ކައުންސިލަ ޖެނެރަލާއި ސާޖެންޓް އޮފް އާމްސް އިތުރު ދައުރަކަށް އައްޔަންކުރަން ފާސްކޮށްފި

ރައްޔިތުންގެ މަޖިލީހުގެ އަމީންއާންމު، ކައުންސެލް ޖެނެރަލް އަދި ސާޖަންޓް އެޓް އަރމްސްގެ މަޤާމުގައި ތިއްބެވި ބޭފުޅުން އިތުރުދައުރަކަށް ޢައްޔަންކުރުމަށް ރައްޔިތުންގެ މަޖިލީހުން ފާސްކޮށްފިއެވެ.

ރައްޔިތުންގެ މަޖިލިހުގެ ޤަވައިދު ބުނާ ގޮތުން އަލަށް އެކުލަވާލާ ކޮންމެ މަޖިލިހެއް އިންތިހާބުވެ މަސައްކަތް ފެށުމަށްފަހު، ހިނގާ ފުރަތަމަ ދެ ދައުރު ނިމުމުގެ ކުރިން އަމީން އާންމާއި ކައުންސެލް ޖެނެރަލް އަދި ސާޖެންޓް އެޓް އަރމްސްގެ މަގާމަށް ބޭފުޅަކު އައްޔަން ކުރަން ޖެހެއެވެ. އަދި ގަވައިދަށް އަމަލު ކުރަން ފެށުމަށް ފަހު ހިނގާ ފުރަތަމަ ދެ ދައުރު ނިމުމުގެ ކުރިން މަޖިލިހުން އެހެން ގޮތަކަށް ކަނޑަނާޅާ ހިނދަކު، ހިނގަމުންދާ މަޖިލިހުގައި އެ ތިން މަގާމަށް ބޭފުޅުން އައްޔަން ކުރަން ވާނެ ކަމަށް ގަވައިދުގައިވެއެވެ.

މި ގަވާއިދުގެ ދަށުން ރިޔާސަތުން ވަނީ މިހާރުވެސް މަގާމުގައި ތިއްބެވި ބޭފުޅުންގެ މަގާމު ދަންމާލަން ވޯޓަށް އަހައިފައެވެ. އަމީންއާންމުގެ މަގާމަށް އިއްތިފާގުން ފާސްކޮށްފައިވަނީ މިހާރު ވެސް އެ މަގާމުގައި ހުންނެވި ފާތިމަތު ނިއުޝާގެ ނަމެވެ. އަދި ކައުންސެލް ޖެނެރަލްގެ މަގާމުގައި މިހާރުވެސް ހުންނެވި ފާތިމަތު ފިލްޒާ އައްޔަންކުރުމަށް ފާސްކޮށްފައިވާއިރު، ސާޖަންޓް އެޓް އަރމްސް ކަމަށް ހަމަޖައްސަން ފާސްކޮށްފައިވަނީ ތޮލްހަތު ހަސަންއެވެ.

އަމީން އާންމާއި ކައުންސެލް ޖެނެރަލާއި ސާޖެންޓް އެޓް އަރމްސްގެ މަގާމުގެ މުއްދަތަކީ ފަސް އަހަރު ދުވަހެވެ.

މަޖިލީހުގެ ގަވައިދުގައިވާ ގޮތުން ރައްޔިތުންގެ މަޖިލިހުގެ ރައީސް އާއި ނައިބު ރައީސަށްފަހު، މަޖިލީހުގައި އެންމެ އިސް ބޭފުޅަކަށް ހުންނަވާނީ އަމީން އާންމެވެ. ސާޖެންޓް އެޓް އަރމްސްއަކީ، ރައްޔިތުންގެ މަޖިލީހުގެ އަމީންއާންމުގެ މަގާމާ ޖެހިގެން ދެ ވަނައަށް އެންމެ އިސްވެރިޔާއެވެ.