ޕީއެންސީގެ މެންބަރުންގެ ޢަދަދު 96،000އަށް، އަމާޒަކީ އެއްލައްކަ: ޢަބްދުއްރަޙީމް

ރާއްޖޭގައި ސިޔާސީ ޕާޓީތަކުގެ ތެރެއިން އެންމެ ފުރަތަމަ އެއްލައްކަ މެންބަރުން ހަމަކުރާ ޕާޓީއަކަށް ޕީއެންސީ ވާނެކަމަށް އެޕާޓީގެ ޗެއަރޕާސަން ޢަބްދުއްރަޙީމް ޢަބްދުﷲ ވިދާޅުވެއްޖެއެވެ. ޢަބްދުއްރަޙީމް މިހެން ވިދާޅުވީ، ޕީއެންސީގެ އެތެރޭގެ އިންތިޙާބުގެ ކަންކަން ބައްލަވާލެއްވުމަށް ދަރުބާރުގެއަށް ވަޑައިގެން މީޑިއާއާ ވާހަކަފުޅު ދައްކަވަމުންނެވެ.

ވެރިކަން ކުރާ ޕާޓީ، ޕީއެންސީގެ އެތެރޭގެ އިންތިޚާބަކީ ރާއްޖޭގައި ސިޔާސީ ޕާޓީއަކުން ބޭއްވި އެންމެ ބޮޑު އިންތިޚާބެވެ. މި އިންތިޚާބުގައި ދެހާހަށްވުރެ ގިނަ މަޤާމަށް މެންބަރުން އިންތިޚާބުކުރެއެވެ.

ޕީއެންސީގެ މަޤާމުތަކަށް މެންބަރުން އިންތިޚާބުކުރުމުގެ އިތުރުން އެޕާޓިން ދަނީ ޕާޓީއަށް މެންބަރުން އިތުރުކުރުމަށްވެސް ގިނަ މަސައްކަތްތަކެއް ކުރަމުންނެވެ. މިކަންކަމާ ގުޅޭގޮތުން ވާހަކަފުޅު ދައްކަވަމުން ޕީއެންސީގެ ޗެއަރޕާސަން ޢަބްދުއްރަޙީމް ޢަބްދުﷲ ވިދާޅުވީ، އެ ޕާޓީއަށް މެންބަރުން އިތުރުކުރުމަށް ރައީސުލްޖުމްހޫރިއްޔާ ފުރަތަމަ ކަނޑައެޅުއްވި އަމާޒު މިހާރު ހާސިލްވެފައިވާ ކަމަށެވެ. އެގޮތުން ބައި ލައްކައަށްވުރެ ގިނަ މެންބަރުން އިތުރުކުރެވިފައިވާކަން ފާހަގަކުރައްވަމުން ޢަބްދުއްރަޙީމް ވިދާޅުވީ މިހާރު އެޕާޓީގެ ޞައްޙަ މެންބަރުންގެ ޢަދަދު ނުވަދިހަ ހަހާހަށް ވުރެ އިތުރުކުރުމަށް ބޭނުންވާ ފޯމުތައް ޕާޓީއަށް ލިބިފައިވާކަމަށެވެ. އަދި އަމާޒަކީ ރާއްޖޭގައި އެއްލައްކަ މީހުން ހަމަވާ ފުރަތަމަ ސިޔާސީ ޕާޓީއަށް އެޕާޓީ ހެދުންކަމަށްވެސް ޕީއެންސީގެ ޗެއަރޕާސަން ވިދާޅުވިއެވެ.

"ޕާޓީއަށް 97،000 ފޯމު ލިބިފައި އެބަހުރި. އެތޭރޭގެ ދަފްތަރު ކުރެވިފައި އެބަވޭ 75،000 އަށް ވުރެ ގިނަ މެންބަރުން. އިލެކްޝަންސް ކޮމިޝަންގެ ޕްރޮސެސް ތެރެއިން އިތުރުވަމުންދަނީ ހަފްތާއަކުން ހަފްތާއަކުން. ކުރިއަށް އޮތް ދުވަސްތަކުގެ ތެރޭގައި 100،000 މެންބަރުންނާއެކު ހަރަކާތްތެރިވާ ފުރަތަމަ ސިޔާސީ ޕާޓީއަށް ޕީއެންސީ ވާނެ." ޢަބްދުއްރަޙީމް ވިދާޅުވިއެވެ.

ޕީއެންސީއަށް ކުރުމުއްދަތެއްގެ ތެރޭގައި ގިނަ ޢަދަދެއްގެ މެންބަރުން ސޮއިކޮށްފައިވުމަކީ ޕާޓިއަށް ލިބޭ ކުރިއެރުމެއްކަމަށް ފާހަގަކުރައްވާ އަބްދުއްރަހީމް ވިދާޅުވީ، ޕާޓީ ހިންގުން ހަރުދަނާ ކުރުމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވަރަށް ބޮޑު އިސްކަމެއް ދެއްވާ ކަމަށެވެ.

އެގޮތުން މިހާރު އެޕާޓީއަށް ލިބެމުންދާ ކާމިޔާބީތަކުން އެނގިގެންދަނީ ރައްޔިތުން ރައީސުލްޖުމްހޫރިއްޔާ ޑރ. މުހައްމަދު މުޢިއްޒު އަދި ޕާޓީގެ ސިޔާސަތުތައް ބަލައިގަނެފައިވާކަން ކަމުގައިވެސް ވިދާޅުވިއެވެ.

"ވެރިކަމަށް އައިރު ޕާޓީގައި ތިބީ 3022 މެންބަރުން. 100،000 މެންބަރުންނާއި ހަމައަށް މިދިޔައީ ރައީސް ޑރ. މުހައްމަދު މުޢިއްޒުގެ ސިޔާސަތު ރައްޔިތުން ވަރަށް ބޮޑަށް ބަލައިގަތީމަ. ޕާޓީ ހިންގުމުގައި އެމަނިކުފާނު ގެންގުޅުއްވާ އުސޫލްތައް ހަރުދަނާވީމަ." ޢަބްދުއްރަޙީމް ވިދާޅުވިއެވެ.

އަބްދުއްރަހީމް ވިދާޅުވީ، ޕާޓީ ވަރުގަދަ ކުރުމަށް އެޕާޓިގެ ރައީސް އަދި ރައީސުލްޖުމްހޫރިއްޔާ ވަރަށް އިސްކަންދެއްވާކަަމަށެވެ. އެހެނީ ރާއްޖޭގެ ވެރިކަމުގެ ނިޒާމު އޮތްގޮތުން ވެރިކަމަށް ވަޑައިގަންނަވަނީ ސިޔާސީ ޕާޓީއެއްގެ ޓިކެޓުގައިކަމަށާއި، ވުމާއެކު މި ނިޒާމުގައި އެންމެ ބާރުގަދަ އެއް ފަރާތަކަށް ސިޔާސީ ޕާޓީ ވާންޖެހޭނެކަމަށް ރައީސުލްޖުމްހޫރިއްޔާ ޤަބޫލުކުރައްވާކަމުގައިވެސް ޢަބްދުއްރަޙީމް ވިދާޅުވިއެވެ.